នាយឧត្តមសេនីយ៍ ឥត សារ៉ាត់ ជួបពិភាក្សាការងារជាមួយគណៈប្រតិភូ សាកលវិទ្យាល័យការពារជាតិចិន
នៅព្រឹកថ្ងៃទី១៣ ខែកក្កដា ឆ្នាំ២០២៣ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិន្ទ បានអនុញ្ញាតិឲ្យគណៈប្រតិភូនិសិ្សតនាយទាហាន សាកលវិទ្យាល័យការពារជាតិ នៃសាធារណរដ្ឋប្រជាមានិតចិន ដឹកនាំដោយ ឧត្តមសេនីយ៍ឯក ស៊ាវ ធៀនឡាំង (LtG, Xiao Tianliang) សាកលវិទ្យាធិការ នៃសាកលវិទ្យាល័យការពារជាតិ កងទ័ពរំដោះប្រជាជនចិន ចូលជួបសំដែងការគួរសម ក្នុងឱកាសដែលឯកឧត្តម ដឹកនាំគណៈប្រតិភូនិស្សិតនាយទាហាន សាកលវិទ្យាល័យនេះ មកបំពេញទស្សនកិច្ច ដកពិសោធន៍ការងារនៅកម្ពុជា ចាប់ពីថ្ងៃទី១២-១៥ ខែកក្កដា ឆ្នាំ២០២៣។
ក្នុងឱកាសនោះ នាយឧត្តមសេនីយ៍ ឥត សារ៉ាត់ ជំនួសមុខឱ្យថ្នាក់ដឹកនាំក្រសួងការពារជាតិ អគ្គមេបញ្ជាការនៃកងយោធពលខេមរភូមិន្ទ បានសំដែងនូវការស្វាគមន៍ ចំពោះវត្តមានរបស់គណៈប្រតិភូនិស្សិតនាយទាហាន នៃសាកលវិទ្យាល័យការពារជាតិ កងទ័ពរំដោះប្រជាជនចិន មកកាន់ប្រទេសកម្ពុជា។ តាមរយៈនៃដំណើរទស្សនកិច្ចនៅកម្ពុជា នាលើកនេះ ឯកឧត្តម ឥត សារ៉ាត់ បានវាយតម្លៃ និងចាត់ទុកថា កិច្ចសហប្រតិបត្តិការដ៏ល្អ រវាងសាកលវិទ្យាល័យការពារជាតិ កងទ័ពប្រទេសទាំងពីរ កម្ពុជា-ចិន បានពង្រឹងពង្រីកកាន់តែជិតស្និទ្ធ និងរឹងមាំថែមទៀតលើកិច្ចសហប្រតិបត្តិការជាដៃគូគ្រប់ជ្រុងជ្រោយ និងជាមិត្តដែលថែប រវាងកងទ័ពទាំងពីរ។ ជាមួយគ្នានេះដែរ ឯកឧត្តម ឥត សារ៉ាត់ ក៏បានសំដែងនូវអំណរគុណចំពោះបក្ស រដ្ឋាភិបាល និងកងទ័ពរំដោះប្រជាជនចិន ដែលជានិច្ចជាកាលតែងតែបានជួយឧបត្ថម្ភ គាំទ្រ ទាំងស្មារតីសម្ភារៈ ដល់កងយោធពលខេមរភូមិន្ទ លើគ្រប់ផ្នែកបានជួយកសាង និងជួយទំនប់បម្រុងលើការងារបណ្ដុះបណ្ដាលធនធានមនុស្សលើគ្រប់ជំនាញដល់កងយោធពលខេមរភូមិន្ទ ពិសេសសម្រាប់វិទ្យាស្ថានទ័ពជើងគោក នៃកងយោធពលខេមរភូមិន្ទ ដែលមានទីតាំងនៅក្នុងខេត្តកំពង់ស្ពឺ ឱ្យកាន់តែមានលក្ខណៈទំនើប សម្រាប់កងទ័ពកម្ពុជា និងក្នុងតំបន់ តាំងតែពីសាលានេះទើបចាប់ផ្ដើមកសាងពីបាតដៃទទេ រហូតក្លាយជាវិទ្យាស្ថានមួយដែលអាចបណ្ដុះបណ្ដាលធនធានមនុស្សសម្រាប់កងយោធពលខេមរភូមិន្ទ កាន់តែមានគុណភាព និងលក្ខណៈទំនើប បន្ថែមទៀត។ នាយឧត្តមសេនីយ៍ ឥត សារ៉ាត់ បានចាត់ទុកការជួយកសាងវិទ្យាស្ថានទ័ពជើងគោក នៃកងយោធពលខេមរភូមិន្ទ ពីសំណាក់កងទ័ពរំដោះប្រជាជនចិន គឺជានិមិត្តរូបមួយ នៃកិច្ចសហប្រតិបត្តិការដ៏ល្អ រវាងកងទ័ពប្រទេសយើងទាំងពីរ ដែលជារៀងរាល់ឆ្នាំ ភាគីកងទ័ពយើងទាំងពីរតែងតែបានចាត់បញ្ជូនក្រុមការងារបច្ចេកទេសផ្លាស់ប្ដូរទស្សនកិច្ច ដកពិសោធន៍ការងារ ពីគ្នាទៅវិញទៅមក ដើម្បីជួយជំរុញឲ្យបណ្ដាវិទ្យាស្ថានទ័ពជើងគោក និងបណ្ដាសាលា ហ្វឹកហ្វឺនរបស់កងយោធពលខេមរភូមិន្ទ ដំណើរការបណ្ដុះបណ្ដាលធនធានមនុស្សសម្រាប់ វិស័យការពារជាតិ របស់កម្ពុជា កាន់តែមានគុណភាព។ ឯកឧត្តម បានបញ្ជាក់ទៀតថា៖ កន្លងទៅនេះ កងទ័ពប្រទេសយើងទាំងពីរកម្ពុជា-ចិន ទើបតែបានបញ្ចប់ការធ្វើសមយុទ្ធរួមគ្នា នៅមជ្ឈមណ្ឌលមណ្ឌលហ្វឹកហ្វឺនកងរាជអាវុធហត្ថលើផ្ទៃប្រទេសភ្នំជុំសែនរីករាយ នៅខេត្តកំពង់ឆ្នាំង ដែលគិតមកដល់ពេលនេះគឺជាសមយុទ្ធរួមគ្នា កម្ពុជា-ចិន លើកទី៥ហើយ មកដល់ឆ្នាំ២០២៣នេះ។ ទំហំនៃការធ្វើសមយុទ្ធ រាល់លើករវាងកងទ័ពយើងទាំងពីរកាន់តែមានលក្ខណៈទំនើបទៅៗ និងធំឡើងៗ ជាលំដាប់។ ហើយយើងក៏បានឯកភាពគ្នាថា នឹងបន្តរៀបចំធ្វើសមយុទ្ធរួមគ្នាមួយទៀត នាអំឡុងពេលពាក់កណ្ដាលឆ្នាំ២០២៣នេះ ដែលជា សមយុទ្ធរួមគ្នាលើការងារសុខាភិបាល មានឈ្មោះថា "ទេវតាសន្តិភាពឆ្នាំ ២០២៣ កម្ពុជា-ចិន ក្នុងឆ្នាំផងដែរនេះ។
ជាការឆ្លើយតប ឧត្តមសេនីយ៍ឯក ស៊ាវ ធៀនឡាំង (LtG, Xiao Tianliang) បានជម្រាបជូន ឯកឧត្តម ឥត សារ៉ាត់ ថា៖ ប្រតិភូនិស្សិតនាយទាហាន សកលវិទ្យាល័យការពារជាតិ របស់កងទ័ពរំដោះប្រជាជនចិន មកកាន់កម្ពុជាលើកនេះ ចំពេលដែលកម្ពុជាទើបតែបញ្ចប់ការរៀបចំការប្រកួតកីឡាស៊ីហ្គេមលើកទី ៣២ និង អាស៊ានប៉ារ៉ាហ្គេមលើកទី១២ ប្រកបដោយជោគជ័យ ក្នុងនាមកម្ពុជាធ្វើជាម្ចាស់ផ្ទះ ជាលើកដំបូង នៃការប្រកួតកីឡាទាំងពីរនេះប្រចាំឆ្នាំ ២០២៣ ហើយក៏ចំពេលដែលកម្ពុជា កំពុងបើកយុទ្ធនាការឃោសនាបោះឆ្នោតជ្រើសតាំងតំណាងរាស្ត្រនីតិកាលទី ៧ នៃរដ្ឋសភា ផងដែរ។ ឧត្តមសេនីយ៍ឯក ស៊ាវ ធៀនឡាំង បានជូនពរដល់ប្រជាជនកម្ពុជា ក្នុងដំណើរការនៃការបោះឆ្នោតជ្រើសរើសតំណាងរាស្ត្រសម្រាប់នីតិកាលទី ៧ នៃរដ្ឋសភា សូមប្រព្រឹត្តទៅប្រកបដោយសេរី យុត្តិធម៌ និងមានតម្លាភាព។ ឯកឧត្តម ក៏បានជម្រាបជូនឯកឧត្តម នាយសេនាធិការចម្រុះថា ឆ្នាំនេះគឺជាឆ្នាំខួប ៦៥ នៃការបង្កើតទំនាក់ទំនងការទូតចិន-កម្ពុជា ហើយក៏ជាឆ្នាំមិត្តភាព រវាងចិន និងកម្ពុជាផងដែរ។ ឯកឧត្តម បានបញ្ជាក់ទៀតថា កាលខែកុម្ភៈ ឆ្នាំ២០២៣ កន្លងទៅ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានអញ្ជើញទៅបំពេញដំណើរទស្សនកិច្ចជាផ្លូវការ និងផ្លូវរដ្ឋ ជា លក្ខណៈមិត្តភាព នៅប្រទេសចិន។ ដែលតាមរយៈនៃដំណើរទស្សនកិច្ចនេះ របស់សម្ដេចតេជោ ហ៊ុន សែន នៅប្រទេសចិន បានធ្វើឲ្យទំនាក់ទំនងរវាងកងទ័ព និងប្រជាជនប្រទេសយើងទាំងពីរ ចិន-កម្ពុជា ឈានចូលទៅក្នុងយុគ្គសម័យថ្មី និងក្នុងដំណាក់កាលថ្មីមួយ។ បានបន្ថែមទៀតថា៖ សមិទ្ធិផលជាច្រើននៅក្នុងវិទ្យាស្ថានទ័ពជើងគោក នៃកងយោធពលខេមរភូមិន្ទ និងសមិទ្ធផលនានាជាច្រើនទៀត គ្រប់ទីកន្លែងនៅកម្ពុជា ដែលកងទ័ពរំដោះប្រជាជនចិន បានជួយកសាង គឺជានិមិត្តរូប នៃការពង្រឹងពង្រីកចំណងទាក់ទងកិច្ចសហប្រតិបត្តិការ នៃការរឹតចំណងសាមគ្គីភាព មិត្តភាព នៃកងទ័ពប្រទេសយើងទាំងពីរ។ ឯកឧត្តម ស៊ាវ ធៀនឡាំង ក៏បានជំរាបជូន ឯកឧត្តមនាយសេនាធិការចម្រុះ អំពីគោលបំណងរបស់ប្រតិភូនិស្សិតនាយទាហាន សាកលវិទ្យាល័យការពារជាតិ នៃកងទ័ព នៃកងទ័ពរំដោះប្រជាជនចិន មកកាន់កម្ពុជាលើកនេះ គឺដើម្បីធ្វើការផ្លាស់ប្ដូរទស្សនៈបទពិសោធន៍ពីគ្នាទៅវិញទៅមករវាងកងទ័ពទាំងពីរចិន-កម្ពុជា ពិសេសសាកលវិទ្យាល័យការពារជាតិនៃប្រទេសទាំងពីរ ៕
