ឧត្តមសេនីយ៍ឯក គឹម រស្មី ជួបសិក្ខាកាមវគ្គរដ្ឋបាល ជំនាន់ទី៤ ឆ្នាំ២០២៣
ឧត្តមសេនីយ៍ឯក គឹម រស្មី ទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្ត្រី និងជាអគ្គលេខាធិការរង ក្រសួងការពារជាតិ នាព្រឹកថ្ងៃទី២៨ ខែមិថុនា បានអញ្ជើញជួបសំណេះសំណាលថ្នាក់ដឹកនាំ យោធាចារ្យ សាស្ត្រាចារ្យ និងសិក្ខាកាម វគ្គបណ្តុះបណ្តាលការងាររដ្ឋបាល ជំនាន់ទី៤ ឆ្នាំ២០២៣ នៅមជ្ឈមណ្ឌលបណ្ដុះបណ្ដាលការងាររដ្ឋបាល នៃកងយោធពលខេមរភូមិន្ទ អគ្គលេខាធិការដ្ឋាន ក្រសួងការពារជាតិ។
ក្នុងរបាយការណ៍ស្វាគមន៍របស់ ឧត្តមសេនីយ៍ទោ ហៀ ហ៊ីន នាយកមជ្ឈមណ្ឌលបណ្ដុះបណ្ដាលការងាររដ្ឋបាល នៃខ.ភ.ម. បានឲ្យដឹងថា៖ មជ្ឈមណ្ឌលបណ្ដុះបណ្ដាលការងាររដ្ឋបាល នៃកងយោធពលខេមរភូមិន្ទ អគ្គលេខាធិការដ្ឋាន ក្រសួងការពារជាតិ បានបើកវគ្គបណ្ដុះបណ្ដាលចំនួន ៣ជំនាន់រួចមកហើយ ឆ្នាំនេះទទួលបានជំនាន់ទី៤ ឆ្នាំ២០២៣។
វគ្គបណ្ដុះបណ្ដាលការងាររដ្ឋបាល ជំនាន់ទី៤ ឆ្នាំ២០២៣ មានសិក្ខាកាមសរុបចំនួន ២០០នាក់, យោធាចារ្យ និងសាស្រ្តាចារ្យ ចំនួន៤៥នាក់។ មានរយៈពេល ១៨ខែ, គិតចាំពីថ្ងៃទី២៨ ខែមិថុនា ឆ្នាំ២០២៣ ដល់ថ្ងៃទី១៥ ខែមករា ឆ្នាំ២០២៥។ ខ្លឹមសារហ្វឹកហ្វឺន មាន៣២មុខវិជ្ជា រួមមាន៖ ការអនុវត្តការងាររដ្ឋបាល. ចំណេះដឹងស្តីពីច្បាប់. ចំណេះដឹងទូទៅ. ផែនការយុទ្ធសាស្ត្រយោធា. រដ្ឋធម្មនុញ្ញនៃព្រះរាជាណាចក្រកម្ពុជា. កុំព្យូទ័ររដ្ឋបាល. ឋានលេខា. សេនាធិការផែនទី។ ក្រៅពីនេះ នឹងចុះអនុវត្តជាក់ស្ដែងនៅលើទីលានមុខវិជ្ជាឋានលេខា នៅភូមិសាស្រ្តខេត្តកំពង់ស្ពឺ, ទស្សនកិច្ចសិក្សានៅវិមានឈ្នះឈ្នះ នៅភូមិសាស្រ្តរាជធានីភ្នំពេញ និងទស្សនកិច្ចសិក្សានៅតំបន់ប្រវត្តិសាស្រ្តកោះថ្ម X16 នៅភូមិសាស្រ្តខេត្តត្បូងឃ្មុំ។ ចំពោះវគ្គជំនាន់ទី៤ ឆ្នាំ២០២៣ នឹងត្រៀមបើកវគ្គនាពេលខាងមុខនេះ។
ដោយឡែក វគ្គបណ្ដុះបណ្ដាលការងាររដ្ឋបាល ជំនាន់ទី៣ ឆ្នាំ២០២២ មានសិក្ខាកាម ចំនួន ២២៧នាក់ មកពីកងឯកភាពចំណុះក្រសួងការពារជាតិ និងអគ្គបញ្ជាការដ្ឋាន នៃកងយោធពលខេមរភូមិន្ទ -មានយោធាចារ្យ និងសាស្រ្តាចារ្យ ចំនួន ៣៨រូប។ មានរយៈពេល ១៥ខែ បានចាប់ផ្តើម កាលពីថ្ងៃទី២៧ ខែឧសភា ឆ្នាំ២០២២ ដល់ថ្ងៃទី២០ ខែកក្កដា ឆ្នាំ២០២៣។ សិក្សាលើខ្លឹមសារមេរៀន សរុប២២មុខវិជ្ជា។ ជាក់ស្ដែងវគ្គបណ្ដុះបណ្ដាល ជំនាន់ទី៣ ឆ្នាំ២០២២ បានដំណើរមកដល់ថ្ងៃនេះ មានរយៈពេល ១៤ខែរួចមកហើយ, ហ្វឹកហ្វឺនបាន២២មុខវិជ្ជា និងបានប្រឡងបញ្ចប់មុខវិជ្ជា ចំនួន១០មុខវិជ្ជា។ ចំពោះមុខវគ្គបណ្ដុះបណ្ដាលការងាររដ្ឋបាល ជំនាន់ទី៣ ឆ្នាំ២០២២ មជ្ឈមណ្ឌលបានត្រៀមរៀបចំឲ្យធ្វើកិច្ចការស្រាវជ្រាវតាមមុខវិជ្ជា និងធ្វើទស្សនកិច្ចសិក្សានៅវិមានឈ្នះ ឈ្នះ។
នៅក្នុងនាម នាយឧត្តមសេនីយ៍ សំ វណ្ណថន និងថ្នាក់ដឹកនាំ ក្រសួងការពារជាតិ, ឧត្តមសេនីយ៍ឯក គឹម រស្មី បានមានប្រសាសន៍ថា ធនធានមនុស្សគឺជាកត្តាសំខាន់បំផុត ក្នុងកិច្ចដំណើរការ នៃការកសាងសង្គមជាតិមួយ ឱ្យមានការរីកចម្រើនជឿនលឿន និងមានចក្ខុវិស័យវែងឆ្ងាយ ព្រមទាំងភាពប៉ិនប្រសព្វប្រកបដោយស្មារតីទទួលខុសត្រូវរបស់រដ្ឋាភិបាល លើជោគវាសនាអនាគត នៃប្រទេសកម្ពុជា។ ឯកឧត្តម បានបន្តថា ការខិតខំប្រឹងប្រែងរបស់រាជរដ្ឋាភិបាល គឺជាអទិភាពចំពោះវិស័យអប់រំ ចាប់ពីថ្នាក់មត្តេយ្យ រហូតដល់ថ្នាក់ឧត្ដមសិក្សា ដែលជាកត្តាមួយក្នុងចំណោមកត្តានានា បាននាំឱ្យកម្ពុជាក្លាយជាសង្គម មួយមានសុខដុមភាព វឌ្ឍនភាព និងការយោគយល់គ្នា។ ឯកឧត្តម បានគូសបញ្ជាក់ថា៖ «យើងត្រូវបន្តយកចិត្តទុកដាក់ទាំងអស់គ្នា លើការងារអភិវឌ្ឍ វិស័យអប់រំ ដើម្បីសំដៅបន្តលើកកម្ពស់សមត្ថភាព គុណភាព និងប្រសិទ្ធភាព ដើម្បីត្រៀមខ្លួនក្នុងការប្រកួតប្រជែងជាមួយបណ្ដាប្រទេសនានា ជាពិសេសត្រូវបណ្ដុះស្មារតីស្នេហាជាតិ សាមគ្គីភាពឱ្យបានរឹងមាំ និងប្រឆាំងដាច់ខាត់ ចំពោះការប៉ុនប៉ងណាមួយរបស់ពួកអគតិដែលតែងតែ រិះរកគ្រប់មធ្យោបាយ បំបែកបំបាក់សាមគ្គីភាពផ្ទៃក្នុងរបស់កម្ពុជា ដែលកំពុងមានសន្តិភាព ការឯកភាពជាតិពេញលេញ និងការអភិវឌ្ឍដូចសព្វថ្ងៃនេះ»។
ឯកឧត្តម គឹម រស្មី បានថ្លែងថា សមិទ្ធផលជាច្រើន ក្រោមកិច្ចខិតខំប្រឹងប្រែងរបស់រាជរដ្ឋាភិបាល ក្នុងការរក្សាបាននូវសុខសន្តិភាព ស្ថិរភាពនយោបាយ សេដ្ឋកិច្ច សន្តិសុខ សណ្ដាប់ធ្នាប់សង្គម។ កត្តាទាំងអស់នេះ ជាមូលដ្ឋានគ្រឹះ នៃការអភិវឌ្ឍសង្គមជាតិមួយ ទៅមុខបានដោយរលូនលើគ្រប់វិស័យ។ ក្នុងន័យនេះ យើងមិនត្រូវមើលរំលងពីគុណបំណាច់ នៃការខិតខំប្រឹងប្រែងរបស់រាជរដ្ឋាភិបាល ដែលមានសម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានចំណាយពេលពេញមួយជីវិត ក្នុងដំណើរការ នៃការរំដោះប្រទេសជាតិ ចេញពីសង្គ្រាម និងបន្តដឹកនាំអភិវឌ្ឍប្រទេស ឱ្យមានការរីកចម្រើនដូចសព្វថ្ងៃនេះ។
ឯកឧត្តម គឹម រស្មី សង្ឈឹមយ៉ាងមុតមាំថា បងប្អូនសិក្ខាកាមនឹងខិតខំយកចិត្តទុកដាក់ ក្នុងការសិក្សាទាំងទ្រឹស្ដី ការអនុវត្តជាក់ស្ដែង ធ្វើកិច្ចការស្រាវជ្រាវ ដើម្បីយកចំណេះដឹងរបស់ខ្លួនទៅអនុវត្តកាតព្វកិច្ច ឱ្យក្លាយជានាយទាហានបន្តវេនដ៏ឆ្នើម ក្នុងការដឹកនាំ គ្រប់គ្រង អនុវត្តភារកិច្ចជូនអង្គភាព ប្រកបដោយប្រសិទ្ធភាព ទាំងពេលបច្ចុប្បន្ន និងថ្ងៃអនាគតឱ្យកាន់តែល្អប្រសើរឡើង។ ម្យាងទៀតសិក្ខាកាមត្រូវអនុវត្ត និងគោរពឱ្យបានម៉ឺងម៉ាត់ នូវបទបញ្ជាផ្ទៃរបស់មជ្ឈមណ្ឌលបណ្ដុះបណ្ដាលការងាររដ្ឋបាល នៃកងយោធពលខេមរភូមិន្ទ ដើម្បីបញ្ចប់វគ្គទទួលបានលទ្ធផលល្អគ្រប់ៗគ្នា ៕
