ឯកឧត្តម ឃឹម ប៊ុនសុង បើកការដ្ឋានជួសជុសសាងសង់មជ្ឈមណ្ឌលកីឡា ខ.ភ.ម
ពិធីបើកការដ្ឋានជួសជុលកែលម្អ និងសាងសង់ ហេដ្ឋារចនាសម្ពន្ធ មជ្ឈមណ្ឌលកីឡាកងយោធពលខេមរភូមិន្ទ បានប្រព្រឹត្តឡើងនៅព្រឹក ថ្ងៃទី២៨ ខែមិថុនា ឆ្នាំ២០២៣ ដោយក្រុមប្រឹក្សាកីឡាកងយោធពលខេមរភូមិន្ទ ក្រោមអធិបតីភាពដ៏ខ្ពង់ខ្ពស់ នាយឧត្ដមសេនីយ៍ ឃឹម ប៊ុនសុង រដ្ឋលេខាធិការក្រសួងការពារជាតិ និង ជាប្រធានក្រុមប្រឹក្សាកីឡាកងយោធពលខេមរភូមិន្ទ ដោយមានការអញ្ជើញចូលរួមពីសំណាក់ លោកវរសេនីយ៏ឯកបំរុង ចិន វ៉ាន់តឹម ប្រធានការិយាល័យអនុព័ន្ធយោធាវៀតណាមប្រចាំព្រះរាជាណាចក្រកម្ពុជា ព្រមទាំងនាយទាហាន ក្រសួងការពារជាតិជាច្រើន។
ឧត្តមសេនីយ៏ឯក តែម ម៉ឺន នាយកមជ្ឈមណ្ឌលកីឡាកងយោធពលខេមរភូមិន្ទ និងជាអគ្គលេខា ក្រុមប្រឹក្សា កីឡាកងយោធពលខេមរភូមិន្ទ បានធ្វើរបាយការណ៏ជូនអង្គពិធីឲ្យបានដឹងថា៖ នៅក្នុងផែនការជួសជុលកែរលម្អ និងសាងសង់ ហេដ្ឋារចនាសម្ពន្ធ មជ្ឈមណ្ឌលកីឡាកងយោធពលខេមរភូមិន្ទ ក្នុងពេលនេះរួមមាន៖ -សាងសង់ក្លោងទ្វារចូលថ្មី ដែលមានរចនាបទខ្មែរ, សាងសង់ផ្លូវបេតុងសំរាប់ចំណតរថយន្ត និងសួនថ្មី -សាងសង់អគារការិយាល័យថ្មីមួយខ្នង ដែលមានបន្ទប់ចំនួន ០៦បន្ទប់ -ជួសជុលកែលម្អ អគាររដ្ឋបាល និងសាលប្រជុំថ្មី ជាមួយនឹងទីលានហ្វឹកហាត់ប្រភេទកីឡាប៊ូល និងតង់ -ជួសជុលកែលម្អ អគារកីឡាក្នុងសាល -ជួសជុលកែលម្អ វេទិកា គណៈអធិបតី នៅក្នុងទីលាន រៀបចំការប្រកួតកីឡាបាល់ទាត់ -សាងសង់ ទីរត់ប្រណាំងថ្មី (ទីលានកីឡាអត្តពលកម្ម) -ជួសជុលកែលម្អប្រព័ន្ធរំដោះទឹក -សាងសង់របង និងបង្កាន់ដៃដែកសុវត្ថិភាព - សាងសង់វេទិការទស្សនិកជន កីឡាបាល់ទាត់ និងអគារស្នាក់នៅសម្រាប់គ្រូបង្វឹកកីឡាករ។
ថ្លែងក្នុងឱកាសនោះ ឯ.ឧ ឃឹម ប៊ុនសុង រដ្ឋលេខាធិការ ក្រសួងការពារជាតិ និងជាប្រធានក្រុមប្រឹក្សា កីឡាកងយោធពលខេមរភូមិន្ទ បានបញ្ជាក់ថា៖ នៅថ្ងៃនេះ យើងអាចនិយាយបានថាគឺជាដំណាក់កាលទី៣ ដែលយើងនឹងចាប់ផ្តើមជួសជុលកែលម្អ និងសាងសង់ហេដ្ឋារចនាសម្ព័ន្ធ មជ្ឈមណ្ឌលកីឡាកងយោធពល ខេមរភូមិន្ទ ដែលបានទទួលថវិកាពីរដ្ឋាភិបាលវៀតណាម តាមរយៈទំនាក់ទំនងគ្នា រវាងក្រុមប្រឹក្សាកីឡាកងយោធពលខេមរភូមិន្ទ និងស្នងការហ្វឹកហ្វឺនអគ្គសេនាធិការកងទ័ពប្រជាជនវៀតណាម។ ដោយកន្លងមក ឯ.ឧ បានដឹកនាំប្រតិភូ ក្រុមប្រឹក្សាកីឡាកងយោធពលខេមរភូមិន្ទ ទៅបំពេញទស្សនកិច្ច នៅរដ្ឋធានីហាណូយ សាធារណរដ្ឋសង្គមនិយមវៀតណាម ហើយបានស្នើសុំការឧបត្ថម្ភគាំទ្រ ដែលទាក់ទងនិងវិស័យកីឡា ក្របខណ្ឌ កីឡារបស់កងយោធពលខេមរភូមិន្ទ និងដើម្បីពង្រឹងទំនាក់ទំនងមិត្តភាពឲ្យកាន់តែល្អបន្ថែមទៀត។ ជាលទ្ធផល នៃកិច្ចសហប្រតិបត្តិការយ៉ាងល្អនេះ ទើបថ្ងៃនេះ យើងអាចចាប់ផ្តើមបើកការដ្ឋានជួសជុលកែលម្អ និងសាងសង់ ហេដ្ឋារចនាសម្ពន្ធ មជ្ឈមណ្ឌលកីឡាកងយោធពលខេមរភូមិន្ទ ក្រោមជំនួយរបស់រដ្ឋាភិបាល វៀតណាម។
ឆ្លៀតក្នងឱកាសនោះ ឯកឧត្តម ឃឹម ប៊ុនសុង ក៏បានលើកយកសមិទ្ធផល ដែលរាជរដ្ឋាភិបាលកម្ពុជា ទើបបានបង្កើតឡើងគឺ៖ ការប្រកួតកីឡាស៊ីហ្គេមលើកទី៣២ និងកីឡាប៉ារ៉ាហ្គេមលើកទី១២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ដែលបង្កើតព្រឹត្តិការណ៍អោយភ្ញៀវជាតិ និងអន្តរជាតិកោតសរសើរ ពីការរៀបចំ និងផ្ទាំង ទស្សនីយភាព ការប្រកួតលើគ្រប់វិញ្ញាសា និងការទទួលបដិសណ្ឋារកិច្ចល្អរបស់កម្ពុជា ព្រមជាមួយនឹងលទ្ធផល ដែលអត្តពលិក របស់យើងទទួលបានក្នុងឱកាស នោះផងដែរ។ ជាចុងក្រោយ ឯ.ឧ រំលឹកដល់គណៈកម្មការ ជួសជុល កែលម្អ និងសាងសង់ ហេដ្ឋារចនាសម្ពន្ធ មជ្ឈមណ្ឌលកីឡាកងយោធពលខេមរភូមិន្ទ ត្រូវអនុវត្ត ការងារអោយបានលទ្ធផលល្អប្រសើរ សម្រាប់ក្រុមប្រឹក្សាកីឡាកងយោធពលខេរមភូមិន្ទ និងក្រសួងការពារជាតិ ៕
