វរសេនីយ៍ឯក Ismet Konaro Glu អនុព័ន្ធយោធាទួគី ប្រចាំកម្ពុជា ចូលជួបសម្តែងការគួរសម សម្ដេចពិជ័យសេនា ទៀ បាញ់
សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានអនុញ្ញាតិអោយលោកជំទាវ អ៊ុល ឃឺឃូ ចូអ៊ែវហ្វេ ឯកអគ្គរដ្ឋទូត នៃសាធារណរដ្ឋទូកគី និងលោកវរសេនីយ៍ឯក អាយមេត កូណារូ លូ (Ismet Konaro Glu) អនុព័ន្ធយោធា អមស្ថានទូតទួគី ប្រចាំនៅព្រះរាជាណាចក្រកម្ពុជា ចូលជួបសម្តែងការគួរសម បង្ហាញមុខ និងពិភាក្សាការងារ នៅទីស្ដីការក្រសួងការពារជាតិ កាលពីរសៀលថ្ងៃទី២៧ ខែមេសា ឆ្នាំ២០២៣ កន្លងទៅនេះ បន្ទាប់ពីលោកត្រូវបានរដ្ឋាភិបាល និងកងទ័ពប្រទេសទួគី តែងតាំងជាឯកអគ្គរដ្ឋទូត និងអនុព័ន្ធយោធាប្រចាំកម្ពុជា។
ក្នុងជំនួបនេះ សម្ដេចពិជ័យសេនា ទៀ បាញ់ បានសម្តែងការអបអរសាទរ និងស្វាគមន៍ ចំពោះលោកជំទាវឯកអគ្គរដ្ឋទូត និងលោក វរសេនីយ៍ឯក អនុព័ន្ធយោធាទួគី ដែលបានមកចូលជួបសម្ដែងការគួរសម បង្ហាញមុខ និងពិភាក្សាការងារនាឱកាសនេះ។ សម្ដេចពិជ័យសេនា ទៀ បាញ់ ក្នុងនាមប្រមុខរាជរដ្ឋាភិបាលកម្ពុជា និងថ្នាក់ដឹកនាំក្រសួងការពារជាតិ និងក្នុងនាម សម្តេចផ្ទាល់ បានត្រៀមខ្លួនជានិច្ចក្នុងការធ្វើកិច្ចសហការជិតស្និទ្ធជាមួយទួគី ដើម្បីរួមចំណែកបន្តពង្រឹងពង្រីកទំនាក់ទំនងកិច្ចសហប្រតិបត្តិការដ៏ល្អប្រពៃ ជាផ្លែផ្ការវាងកងទ័ពប្រទេសទាំងពីរនេះទៅមុខទៀត។
សម្ដេចពិជ័យសេនា បានបញ្ជាក់ថា៖ កម្ពុជាបានឆ្លងកាត់សង្គ្រាមស៊ីវិលអស់ជាច្រើនទសវត្សរ៍មកហើយ ចាប់តាំងតែពីឆ្នាំ១៩៧០ មកម្លេះ។ ទើបតែមកដល់ចុងឆ្នាំ១៩៩៨ នោះទេ ដែលកម្ពុជាទទួលបានសុខសន្តិភាព ពេញបរិបូណ៌ ដោយនយោបាយឈ្នះ ឈ្នះ របស់សម្តេចតេជោ ហ៊ុន សែន បានធ្វើអោយកម្ពុជាមានការអភិវឌ្ឍលើគ្រប់វិស័យ ហើយមកដល់ពេលនេះកម្ពុជា ជាប្រទេសដែលមានអធិបតេយ្យ ស្មើមុខស្មើមាត់ជាមួយបណ្តាប្រទេសក្នុងតំបន់ និងសកលលោក ទទួលស្គាល់។ សម្ដេចពិជ័យសេនា ទៀ បាញ់ បានបន្តទៀតថា ក្នុងឆ្នាំ២០២២កន្លងមក កម្ពុជាបានធ្វើម្ចាស់ផ្ទះក្នុងកិច្ចប្រជុំកំពូលអាស៊ានដោយផ្ទាល់ ទទួលបានជោគជ័យយ៉ាងត្រចះត្រចង់ ហើយក្នុងពេលដ៍ខ្លី ខាងមុខនេះ កម្ពុជានឹងធ្វើជាម្ចាស់ផ្ទះការប្រកួតកីឡាស៊ីហ្គេមលើកទី ៣២ និងការប្រកួតកីឡាអាស៊ានប៉ារ៉ាហ្កេមលើកទី ១២ និងការបោះឆ្នោតជ្រើសរើសតំណាងរាស្ត្រអណត្តិទី៧ ផងដែរ។ សម្ដេចពិជ័យសេនា បានសម្តែងនូវក្តីសង្ឃឹមយ៉ាងមុតមាំថា៖ តាមរយៈនៃការមកបំពេញបេសកកម្មការទូតយោធារបស់ លោកវរសេនីយ៍ឯក អាយ មេត កូណារូ លូ អនុព័ន្ធយោធាទួគី នៅកម្ពុជានាអាណត្តិនេះ លោកអនុព័ន្ធយោធា និងប្រឹងប្រែងធ្វើឲ្យកិច្ចទំនាក់ទំនងសហប្រតិបត្តិការរវាងកងទ័ពប្រទេសទាំងពីរ កម្ពុជា-ទួគី កាន់តែត្រូវបានពង្រឹងពង្រីកឥតឈប់ឈរ។ ជាកិច្ចឆ្លើយតប អនុព័ន្ធយោធាថ្មីប្រទេសទួគីប្រចាំនៅកម្ពុជា បានបញ្ជាក់ថា ថ្វីត្បិតរូបលោកពុំមាននិវេសនដ្ឋាននៅកម្ពុជា តែរូបលោកបានយល់ដឹងពីការវឌ្ឍនភាពរីកចំរើនលើគ្រប់ វិស័យរបស់កម្ពុជា ជាពិសេសវិស័យការពារជាតិរបស់កម្ពុជា ដែលមិនត្រឹមតែមានលទ្ធភាពគ្រប់គ្រាន់ក្នុងការការពារអធិបតេយ្យ បូរណៈភាពទឹកដីរបស់ខ្លួនប៉ុណ្ណោះទេ ប៉ុន្តែកម្ពុជា បានបញ្ជូនកងទ័ពមួកខៀវរបស់ខ្លួន ទៅបំពេញភារកិច្ចមនុស្សធម៌ ក្នុងក្របខ័ណ្ឌអង្គការសហប្រជាជាតិ ដើម្បីសន្តិភាព ក្នុងតំបន់ និងពិភពលោកថែមទៀត ៕
