កិច្ចប្រជុំ ស្តីពីការគ្រប់គ្រងថែទាំការពារ អគាររដ្ឋបាល សាលប្រជុំ ទីស្តីការក្រសួងការពារជាតិ
ក្រសួងការពារជាតិ បានបើកកិច្ចប្រជុំ ដើម្បីជម្រុញអនុវត្តឲ្យមានប្រសិទ្ធភាព ស្តីពីការគ្រប់គ្រង ថែទាំ ការពារ អគាររដ្ឋបាល សាលប្រជុំ ទីស្តីការក្រសួងការពារជាតិ នាព្រឹកថ្ងៃទី២៧ ខែមេសា ឆ្នាំ២០២៣ ក្រោមអធិបតីភាព នាយឧត្តមសេនីយ៍ ឃុន វុធ រដ្ឋលេខាធិការ ក្រសួងការពារជាតិ និងជាប្រធានគណៈកម្មការថែទាំ គ្រប់គ្រង ការពារ អគារទីស្តីការក្រសួងការពារជាតិ។
យោងតាមសេចក្តីជូនដំណឹងរបស់អគ្គលេខាធិការដ្ឋាន ក្រសួងការពារជាតិ ដែលអានដោយ ឧត្តមសេនីយ៍ឯក ប៉ាង ធារ៉ូ អគ្គលេខាធិការរង បានឲ្យដឹងថា កន្លងមកទៅនេះ គណៈកម្មការគ្រប់គ្រង ថែទាំ ការពារ អគាររដ្ឋបាល សាលប្រជុំ ទីស្តីការក្រសួងការពារជាតិ ដែលមានឯកឧត្តម ឃុន វុធ រដ្ឋលេខាធិការ ក្រសួងការពារជាតិ និងជាប្រធានគណៈកម្មការ បានធ្វើរបាយការណ៍មួយជូនទៅ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ហើយសម្តេចពិជ័យសេនា ក៏បានឯកភាពរួចហើយផងដែរ អំពីការត្រៀមរៀបចំបង្ការអគ្គីភ័យ និងការងារមួយចំនួនរបស់គណៈកម្មការ ក្នុងការគ្រប់គ្រង ថែទាំ នៅអគាររដ្ឋបាល សាលប្រជុំ ទីស្តីការក្រសួងការពារជាតិ។
នៅក្នុងកិច្ចប្រជុំក៏មានការចូលរួមពីតំណាងស្ថាប័ន អង្គភាពពាក់ព័ន្ធជាច្រើន ដែលរួមមាន តំណាងផ្នែក សណ្តាប់ធ្នាប់ ពិធីការ អគ្គលេខាធិការដ្ឋាន, នាយកដ្ឋានបញ្ជូនសារ, នាយកដ្ឋានវិស្វកម្ម, នាយកដ្ឋានហិញ្ញវត្ថុ និង ខុទ្ធកាល័យសម្តេចពិជ័យសេនា។
ក្នុងឱកាសនោះ នាយឧត្តមសេនីយ៍ ឃុន វុធ បានមានប្រសាសន៍ថា សាលប្រជុំ អគាររដ្ឋបាល ទីស្តីការក្រសួងការពារជាតិ គឺជាសំណង់អគារថ្មីមួយទំនើប ដែលមានតម្លៃណាស់សម្រាប់ក្រសួងការពារជាតិក្នុងការបំពេញការងារ ហើយក៏ជាប្រវត្តិសាស្ត្រមួយដ៏ធំធេងណាស់ និងបានលើកមុខមាត់សម្រាប់ ខ.ភ.ម ក៏ដូចជាប្រទេសជាតិ និងប្រជាជនរបស់យើង ដែលមានសំណង់អគារទីស្តីការក្រសួងការពារជាតិមួយនេះ បានទទួលនិងរៀបចំ នូវកិច្ចប្រជុំថ្នាក់រដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធ នៅក្នុងឆ្នាំ២០២២ កន្លងទៅនេះ។ នាយឧត្តមសេនីយ៍ បានបញ្ជាក់ថា នេះគឺមិនដែលមានប្រទេសណាមួយ បានរៀបចំកិច្ចប្រជុំដ៏ធំដូចនេះ នៅឯទីស្តីការក្រសួងការពារជាតិរបស់ខ្លួននោះទេ ហើយបានចូលរួមចំណែកកាត់បន្ថយការចំណាយថវិកាជាតិយ៉ាងច្រើន នៅក្នុងការរៀបចំកិច្ចប្រជុំថ្នាក់រដ្ឋមន្ត្រីការពារជាតិអាស៊ាននេះ ដូចនេះការងារថែទាំត្រូវតែបានការយកចិត្តទុកដាក់ឲ្យបានមត់ចត់បំផុត ដើម្បីឲ្យអគារទីស្តីការក្រសួងការពារជាតិ របស់យើងបានស្ថិតនៅគង់វង្សល្អ ប្រកបដោយផាសុខភាព និងសោភណ្ឌភាពយូរអង្វែងទៅមុខទៀត។
ជាមួយគ្នានេះ នាយឧត្តមសេនីយ៍ ឃុន វុធ ប្រធានគណៈកម្មការ បានផ្តល់អនុសាសន៍ និងជម្រុញដល់អគ្គលេខាធិការដ្ឋានរៀបចំបទបញ្ជាផ្ទៃក្នុងឲ្យឆាប់ និងជម្រុញដល់នាយកដ្ឋានបញ្ជូនសារ និងនាយកដ្ឋានវិស្វកម្ម រៀបចំផែនការ ក៏ដូចជាត្រួតពិនិត្យបំពាក់ឧបករណ៍ និងដាក់ស្លាកសញ្ញាអគ្គីភ័យនៅក្នុងអគារទីស្តីការក្រសួងការពារជាតិ ៕
