អគ្គនាយកដ្ឋានយោធសេវា ប្រកាសមុខតំណែង អគ្គនាយករង ចំនួន០៣រូប
អគ្គនាយកដ្ឋានយោធសេវា ក្រសួងការពារជាតិ បានប្រកាសមុខតំណែង អគ្គនាយករង ចំនួន០៣រូប ក្រោមអធិបតីភាព នាយឧត្តមសេនីយ៍ មាស សាវ៉ន អគ្គនាយក អគ្គនាយកដ្ឋានយោធសេវា នាព្រឹកថ្ងៃទី១៧ ខែមីនា ឆ្នាំ២០២៣។ យោងតាមអនុក្រឹត្យរបស់រាជរដ្ឋាភិបាល និងសេចក្តីសម្រេច របស់ក្រសួងការពារជាតិ អានដោយ ឧត្តមសេនីយ៍ត្រី ទេស កុសល អគ្គនាយករង អគ្គនាយកដ្ឋានយោធសេវា ទទួលបន្ទុកបុគ្គលិក បានប្រកាសឲ្យដឹងថា ឧត្តមសេនីយ៍ឯក ពៅ ស៊ា ជាអគ្គនាយករង ទទួលបន្ទុក មជ្ឈមណ្ឌលអភិវឌ្ឍន៍យោធិនពិការ ៣១៧គូលេន, ឧត្តមសេនីយ៍ទោ យ៉ង់ ម៉ៅ ជាអគ្គនាយករង អគ្គនាយកដ្ឋានយោធសេវា ទទួលបន្ទុកសម្របសម្រួលកិច្ចការអន្តរជាតិ និងព័ត៌មាន និងឧត្តមសេនីយ៍ទោ ខៀវ សារ៉ាត់ អគ្គនាយករង អគ្គនាយកដ្ឋានយោធសេវា ទទួលបន្ទុកសម្របសម្រួលកិច្ចការអន្តរក្រសួងស្ថាប័ន។
ក្នុងឱកាសនោះ ឯកឧត្តម មាស សាវ៉ន បានថ្លែងថា៖ ថ្ងៃនេះ អគ្គនាយកដ្ឋានយោធសេវា មានកិត្តិយសដោយទទួលបាននូវនាយទាហាន ជាអគ្គនាយករង អគ្គនាយកដ្ឋានយោធសេវា ចំនួនបីរូបទៀត ដើម្បីបំពេញបន្ថែមក្របខណ្ឌការងាររបស់អគ្គនាយកដ្ឋានយោធសេវា។ ឯកឧត្តម បានសម្តែងនូវការអបអរសាទរ និងស្វាគមន៍ ចំពោះឯកឧត្តម អគ្គនាយករងទាំងបីខាងលើនេះចូលជានាយទាហានថ្នាក់ដឹកនាំ ក្នុងអគ្គយោធសេវា។ ឯកឧត្តម មាស សាវ៉ន បានលើកឡើង ការងាររបស់អគ្គនាយកដ្ឋានយោធសេវា មានការស្មុគស្មាញច្រើន, ក្នុងពេលដែលក្នុងឆ្នាំនេះ ជាឆ្នាំផ្តាច់ព្រ័ត្រដណ្តើមសន្លឹកឆ្នោត សម្រាប់អាណត្តិថ្មីរបស់រាជរដ្ឋាភិបាលកម្ពុជា នៅលើការដឹកនាំ និងអភិវឌ្ឍន៍ប្រទេសជាតិកម្ពុជាតទៅមុខទៀត។ ឯកឧត្តម បានបញ្ជាក់ថា បច្ចុប្បន្ននេះ សភាពការណ៍អន្តរជាតិ កំពុងមានការរត់ប្រណាំងប្រជែងស្រួចស្រាវណាស់ និងសង្គ្រាមលើផ្នែកព័ត៌មាន ដែលសព្វថ្ងៃនេះ ពួកជនអគតិមួយចំនួនតូច កំពុងមួលបង្កាច់បង្ខូចមុខមាត់របស់គណបក្សប្រជាជនកម្ពុជា និងប្រទេសជាតិកម្ពុជាយើង, មួយចំណែកទៀត កំពុងមួលបង្កាច់ថ្នាក់ដឹកនាំយើង ដែលកន្លងមកនេះ មកលើសម្តេចពិជ័យសេនា ទៀ បាញ់, ឯកឧត្តម ទៀ សុខា និងឯកឧត្តម ហ៊ុន ម៉ាណែត ជាដើម។ ព័ត៌មានទាំងនេះ សុទ្ធសឹងជាព័ត៌មានមួលបង្ខូចកិត្តិយស និងមុខមាត់ថ្នាក់ដឹកនាំ និងប្រទេសជាតិរបស់យើង ទាំងនៅក្នុងជាតិ និងនៅលើឆាកអន្តរជាតិ។
ទន្ទឹមនេះ ឯកឧត្តម មាស សាវ៉ន បានផ្តល់អនុសាសន៍ដល់ជួរនាយទាហាន នៃអគ្គនាយកដ្ឋានយោធសេវាទាំងអស់ បន្តអនុវត្តរួបរួមសាមគ្គីគ្នា បំពេញភារកិច្ចជូនក្រសួងការពារជាតិឲ្យទទួលបានជោគជ័យ ក្នុងត្រូវបង្កើនការយកចិត្តទុកដាក់លើការតាមដានរាល់សភាពការណ៍ជាតិ-អន្តរជាតិ និងធ្វើការឆ្លើយតប និងវាយបកឲ្យបានទាន់ពេលវេលានូវព័ត៌មានក្លែងក្លាយ ដែលបានវាយប្រហារមកលើរាជរដ្ឋាភិបាល និងខ.ភ.ម ពិសេសបន្តតាមដានលើគណនីផេករបស់ក្រសួងការពារជាតិ និងផេករបស់ប្រមុខរាជរដ្ឋាភិបាលសម្តេចតេជោ ហ៊ុន សែន។ ជាមួយគ្នានេះ បន្តការអនុវត្តការងារគោលនយោបាយ តាមផែនការឆ្នាំ២០២៣ និងត្រៀមចូលរួមអនុវត្តឲ្យបានខ្លាំងក្លាពិធីបុណ្យតម្កល់អដិធាតុយុទ្ធជនកងកម្លាំងប្រដាប់អាវុធសង្គ្រោះជាតិកម្ពុជា ចំនួន៤៩នាក់ នៅតំបន់ប្រវត្តិសាស្ត្រយោធា(អ៊ីច១៦), ពិធីបុណ្យខួប៤៥ឆ្នាំ របស់អង្គភាព១២៥, ទិវាចងចាំនៃការផ្តួលរំលំរបបប្រល័យពូជសាសន៍ប៉ុលពត ព្រឹត្តិការណ៍រៀបចំការប្រកួតកីឡាស៊ីហ្គេម ២០២៣ និងការបោះឆ្នោតជ្រើសរើសតំណាងរាស្ត្រអាណត្តិទី៧ ដែលជាព្រឹត្តិការណ៍ដ៏មានសារៈសំខាន់ នឹងត្រូវធ្វើនាពេលខាងមុខនេះ ៕
