នាយឧត្ដមសេនីយ៍ ឥត សារ៉ាត់ ចុះសាកសួរសុខទុក្ខកងទ័ពនៅយោធភូមិភាគទី៣
នាយឧត្ដមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិន្ទ តំណាង សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ អមដំណើរដោយនាយទាហានជាន់ខ្ពស់ ក្នុងក្រសួងការពារជាតិ អគ្គមេបញ្ជាការ នៃកងយោធពលខេមរភូមិន្ទ ជាច្រើនរូប បានអញ្ជើញចុះសាកសួរសុខទុក្ខ សំណេះសំណាល និងនាំយកនូវអំណោយជាសម្ភារៈ គ្រឿងឧបភោគបរិភោគ និងថវិកា ទៅឧបត្ថម្ភដល់កងកម្លាំងប្រដាប់អាវុធ ដែលកំពុងឈរជើងការពារសុវត្ថិភាព សន្តិសុខសណ្ដាប់ធ្នាប់ និងបូរណភាពទឹកដី ក្នុងភូមិសាស្ត្រយោធភូមិភាគទី៣ និងបណ្ដាអង្គភាពចំណុះ ដើម្បីរៀបចំ អបអរពិធីបុណ្យចូលឆ្នាំថ្មីប្រពៃណីខ្មែរ ដែលនឹងខិតជិតមកដល់នាពេលខាងមុខនេះ កាលពីព្រឹកថ្ងៃទី១៦ ខែមីនា ឆ្នាំ២០២៣ កន្លងទៅនេះ នៅទីបញ្ជាការយោធភូមិភាគទី៣ ស្ថិតក្នុងក្រុងច្បារមន ខេត្តកំពង់ស្ពឺ។
ក្នុងឱកាសនោះ បន្ទាប់ពីឧត្តមសេនីយ៍ឯក យឿង សុខុន មេបញ្ជាការរងកងទ័ពជើងគោក និងជាមេបញ្ជាការយោភូមិភាគទី ៣ បានធ្វើសេចក្តីរាយការណ៍អំពីស្ថានការណ៍ សន្តិសុខ សណ្ដាប់ធ្នាប់ នៅតាមតំបន់ព្រំដែន និងតំបន់ផ្ទៃក្នុងភូមិសាស្ត្រ ដែលយោធភូមិភាគទទួលខុសត្រូវ និងវឌ្ឍនភាព នៃការរីកចម្រើនលើគ្រប់វិស័យ ក្នុងភូមិសាស្ត្រ របស់យោធភូមិភាគទី ៣ នាដំណាក់កាលចុងក្រោយ រួចមក នាយឧត្តមសេនីយ៍ ឥត សារ៉ាត់ បានវាយតម្លៃខ្ពស់ចំពោះស្នាដៃ និងសមិទ្ធផល និងវឌ្ឍនភាពនៃការរីកចម្រើនជាច្រើន ដែលនាយទាហាន នាយទាហានរង និងពលទាហាន គ្រប់បណ្ដាលកងឯកភាពនៅទូទាំងយោធភូមិភាគទី៣ សម្រេចបាន នៅក្នុងការបំពេញភារកិច្ចការពារអធិបតេយ្យ បូរណភាពទឹកដី ការពារសុខសន្តិភាព ស្ថិរភាព និងការកសាងអង្គភាពរបស់ខ្លួនឱ្យមានការរីកចម្រើនជាបន្តបន្ទាប់។ ឯកឧត្តម ឥត សារ៉ាត់ បានបញ្ជាក់ថា ការរីកចម្រើនលើគ្រប់វិស័យមកដល់បច្ចុប្បន្ន គឺដោយសារកម្ពុជា មានសុខសន្តិភាព ដែលបានផ្តល់ឱកាស ឲ្យយើងធ្វើការ អភិវឌ្ឍ យ៉ាងឆាប់រហ័ស ហើយប្រជាជនបានរួមរស់ ប្រកបដោយភាពសុខដុមរមនា ក្នុងសង្គមជាតិ។ ឯកឧត្តម ក៍បានក្រើនរម្លឹកឲ្យកងទ័ពទាំងអស់យល់បានទូលំទូលាយ ពីតម្លៃសន្តិភាព ដែលយើងរកបានមកដោយលំបាក ហើយទោះក្នុងតម្លៃណាក៏ដោយ យើងទាំងអស់គ្នា ត្រូវការពារឲ្យបាននូវសន្តិភាព។ «ពេលយើងនិយាយពីសន្តិភាព យើងត្រូវដឹងថា សន្តិភាព បានមកពីណា? បានមកពីនយោបាយ ឈ្នះ ឈ្នះ ដែលមានសម្តេចតេជោ ហ៊ុន សែន ជាស្ថាបនិក និងជាប្រតិបត្តិករនយោបាយឈ្នះឈ្នះ ដែលនាំមកនូវសន្តិភាពពេញលេញជូនជាតិ និងប្រជាជន»។ ឯកឧត្តម ឥត សារ៉ាត់ បានផ្តាំផ្ញើដល់នាយទាហាន នាយទាហានរង និងពលទាហាន គ្រប់រូបត្រូវយល់ដឹងឲ្យបានជ្រាលជ្រៅ ទូលំទូលាយ អំពីស្មារតី នៃនយោបាយ ឈ្នះ ឈ្នះ និងខិតខំលើកកម្ពស់ មនសិកាស្នេហាជាតិ ចូលរួមថែរក្សា ការពារ សន្តិភាព ឱ្យបានគង់វង្ស ទោះក្នុងតម្លៃណាក៏ដោយ។ ហើយត្រូវរួបរួមសាមគ្គីគ្នា ជាធ្លុងមួយ រាំងស្កាត់កុំឱ្យប្រវត្តិសាស្ត្រ ដ៏ឈឺចាប់ពីអតីតកាល កើតមានសារជាថ្មីនៅលើទឹកដីនៃមាតុភូមិ របស់យើងជាលើកទី ២។ ឯកឧត្តម ឥត សារ៉ាត់ ក៏បានប្រគល់ជូនថវិការរបស់សម្តេចពិជ័យសេនា ឧបនាយករដ្ឋមន្ត្រី រដ្ឋក្រសួងការពារជាតិ ដល់បណ្ដាអង្គភាពកងកម្លាំងប្រដាប់អាវុធចំណុះឲ្យយោធភូមិភាគទី៣ ដែលរួមមាន៖ អង្គភាពទីបញ្ជាការយោធភូមិភាគទី ៣, ទីបញ្ជាការជួរមុខយោធភូមិភាគទី ៣, កងពលតូចលេខ ៣១, តំបន់ប្រតិបត្តិការសឹករងខេត្តកំពត, ទីបញ្ជាការកងវរសេនាតូចលេខ ២, ផ្នែកសឹករង និង កងរាជអាវុធហត្ថស្រុកកំពង់ត្រាច, បន្ទាយមាស, ទឹកឈូ និងក្រុងកំពត, នគរបាលការពារព្រំដែនគោក និងព្រំដែនទឹក, តំបន់ប្រតិបត្តិការសឹករងខេត្តតាកែវ, ទីបញ្ជាការកងវរសនាតូចលេខ ១, កងរាជអាវុធហត្ថស្រុកគិរីវង្ស, នគរបាលការពារព្រំដែនលេខ ៦០៣, តំបន់ប្រតិបត្តិការសឹករងខេត្តកោះកុង, ទីបញ្ជាការជួរមុខខេត្តកោះកុង, កងវរសនាតូចលេខ ៣, ផ្នែកសឹកស្រុកមណ្ឌលសីមា, កងរាជអាវុធហត្ថខេត្តកោះកុង និងក្រុមសាងសង់វិមានឈ្នះឈ្នះកោះកុង ដែលមានថវិកាសម្រាប់ពិធីអបអរសាទរបុណ្យចូលឆ្នាំថ្មីប្រពៃណីខ្មែរសរុបចំនួន ៧១លានរៀល ៕
