សិក្ខាសាលា ស្ដីពីការកាត់បន្ថយហានិភ័យផ្នែកគីមីសាស្ត្រ ជីវសាស្ត្រ វិទ្យុសកម្ម និងនុយក្លេអ៊ែរ គម្រោង ៨១
មជ្ឈមណ្ឌលឧត្តមភាព នៃសហភាពអឺរ៉ុប (EU CBRN CoE) ផ្នែកគីមីសាស្ត្រ ជីវសាស្ត្រ វិទ្យុសកម្ម និងនុយក្លេអ៊ែរ សហការជាមួយ អគ្គលេខាធិការដ្ឋាន អាជ្ញាធរជាតិ ទប់ស្កាត់អាវុធគីមី ជីវសាស្ត្រ វិទ្យុសកម្ម និងនុយក្លេអ៊ែរ ក្រសួងការពារជាតិ និងបណ្ដាស្ថាប័នពាក់ព័ន្ធរបស់រាជរដ្ឋាភិបាល អង្គការក្រៅរដ្ឋាភិបាល បានរៀបចំធ្វើអង្គសិក្ខាសាលាមួយ ស្ដីពីការកាត់បន្ថយហានិភ័យផ្នែកគីមីសាស្ត្រ ជីវសាស្ត្រ វិទ្យុសកម្ម និងនុយក្លេអ៊ែរ គម្រោង ៨១ នៅសណ្ឋាគារ ហ៊ីយ៉ាត រីជែនស៊ី ភ្នំពេញ កាលពីព្រឹកថ្ងៃច័ន្ទ ទី១៣ ខែមីនា ឆ្នាំ២០២៣ កន្លងទៅនេះ ក្រោមវត្តមាន ឯកឧត្តម វេជ្ជបណ្ឌិត លី សុវណ្ណ អ្នកនាំពាក្យ និងជានាយក នាយកដ្ឋានប្រយុទ្ធ និងជំងឺឆ្លង ក្រសួងសុខាភិបាល ឧត្តមសេនីយ៍ទោ អឿ ចាន់ណា អគ្គលេខាធិការរង នៃអគ្គលេខាធិការដ្ឋានអាជ្ញាធរជាតិ អាវុធគីមី តំណាង ឯកឧត្តម អគ្គលេខាធិការ នៃអគ្គលេខាធិការដ្ឋានអាជ្ញាធរជាតិអាវុធគីមី ក្រសួងការពារជាតិ និង លោក ចន ចូនីស(John Jones) ប្រធានក្រុមការងារជំនាញ មកពីមជ្ឈមណ្ឌលឧត្តមភាព នៃសហភាពអឺរ៉ុបផ្នែកគីមី ជីវសាស្ត្រ វិទ្យុសកម្ម និងនុយក្លេអ៊ែរ (EU CBRN CoE)។
សិក្ខាសាលានេះ និងប្រព្រឹត្តទៅរយៈពេល ៥ ថ្ងៃ គឺចាប់ពីថ្ងៃទី១៣ ដល់ថ្ងៃទី១៧ ខែមីនា ឆ្នាំ២០២៣។ ដែលក្នុងរយៈពេល ៥ ថ្ងៃនេះ គឺ ២ ថ្ងៃជាថ្ងៃបើកអង្គសិក្ខាសាលា និងពិភាក្សា ផ្លាស់ប្ដូរយោបល់គ្នាពីស្ថាប័នមួយទៅស្ថាប័នមួយ ហើយ ២ ថ្ងៃបន្ទាប់ទៀត គឺជាថ្ងៃចុះដកពិសោធន៍ ពិនិត្យការងារជាក់ស្ដែង តាមមន្ទីរពិសោធន៍ដូចជានៅមន្ទីរពិសោធន៍ប៉ាស្ទ័រ, មន្ទីរពិសោធន៍ជាតិសុខភាពសាធារណៈ, មន្ទីរពិសោធន៍សុខភាពសត្វ និងផលិតកម្មជាតិ និងចុះពិនិត្យច្រកចេញចូលក្នុងព្រលានយន្តហោះផ្នែក គយនិងរដ្ឋាករ និងមួយថ្ងៃ គឺជាថ្ងៃបិទអង្គសិក្ខាសាលា។
ឧត្តមសេនីយ៍ទោ អឿ ចាន់ណា បានថ្លែងក្នុងអង្គសិក្ខាសាលាថា៖ អគ្គលេខាធិការដ្ឋាន អាជ្ញាធរជាតិ អាវុធគីមី ជីវសាស្ត្រ វិទ្យុសកម្ម និងនុយក្លេអ៊ែរ ក្រសួងការពារជាតិ បានរៀបចំធ្វើសិក្ខាសាលា ស្ដីពីការកាត់បន្ថយហានិភ័យផ្នែកគីមីសាស្ត្រ ជីវសាស្ត្រ វិទ្យុសកម្ម និងនុយក្លេអ៊ែរ គម្រោង ៨១ (Project 81BIOSEC) របស់មជ្ឈមណ្ឌលឧត្តមភាព នៃសហភាពអឺរ៉ុប (EU CBRN CoE) ដើម្បីរៀបចំគម្រោងថវិកា និងផែនការ ដែលពាក់ព័ន្ធទៅនឹងសុវត្ថិភាព សន្តិសុខ ជីវៈសាស្ត្រ វិទ្យុសកម្ម គីមី និងនុយក្លេអ៊ែរ។ ឯកឧត្តម បានបន្ថែមទៀតថា ការងារដែលយើងរៀបចំធ្វើនេះ គឺដើម្បីរៀបចំផែនការក្នុងការឆ្លើយតបបានទាន់ពេលវេលា និងការពារពាក់ព័ន្ធទៅនឹងសុវត្ថិភាព ជីវសាស្ត្រ និងសន្តិសុខ សុខភាពសាធារណៈនៅច្រកចេញចូលព្រលានយន្តហោះ, ច្រកចេញចូលតាមព្រំដែន, រួមទាំងការនាំចេញ នាំចូលគ្រប់មុខទំនិញសព្វសារពើពន្ធ ដែលទាមទារឲ្យយើងត្រូវតែមានការត្រួតពិនិត្យឲ្យបានហ្មត់ចត់ ច្បាស់លាស់ ថាតើមុខទំនិញទាំងនោះមាន មេរោគ ឬវ៉ាយរុស្ត និងផលប៉ះពាល់ដល់សុខភាពសាធារណៈដែរឬទេ ដើម្បីការពារបានរាល់ការឆ្លងរីករាលដាលនៅគ្រប់បណ្ដាលរោគរាតត្បាតទាំងឡាយចូលមកក្នុងប្រទេសកម្ពុជា ដែលមានហានិភ័យ អាចឆ្លងពីសត្វទៅមនុស្ស ពីមនុស្សទៅសត្វ និងពីមនុស្សម្នាក់ទៅមនុស្សម្នាក់។ ឯកឧត្តម បន្តថា៖ សិក្ខាសាលា ក៏នឹងធ្វើកាលពិនិត្យពិភាក្សាផ្លាស់ប្ដូរយោបល់គ្នាផងដែរ លើបីចំណុចធំៗសំខាន់ៗ ដែលពាក់ព័ន្ធទៅនឹងការសម្អាតសារធាតុគីមីពុល ការត្រួតពិនិត្យ និងបញ្ហាដែលពាក់ព័ន្ធទៅនឹងសុវត្ថិភាពសុខភាព សាធារណៈ ដែលបីផែននេះ យើងត្រូវសហការធ្វើរួមគ្នាក្នុងការចូលរួមទប់ស្កាត់ឲ្យបានទាន់ពេលវេលា ៕
