ឯកអគ្គរាជទូត ជប៉ុនតែងតាំងថ្មី ចូលជួបសំដែងការគួរសមសម្តេចពិជ័យសេនា ទៀ បាញ់ ឧបនាយករដ្ឋមន្ត្រី
នៅទីស្ដីការក្រសួងការពារជាតិ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ នៅព្រឹកថ្ងៃទី១០ ខែកុម្ភៈ ឆ្នាំ២០២៣ បានអនុញាតិឲ្យឯកឧត្តម អ៊ូអីណូ អាតស៊ុស៊ី (UENO Atsushi) ឯកអគ្គរាជទូតវិសាមញ្ញ និងពេញសមត្ថភាពជប៉ុនថ្មី ប្រចាំនៅព្រះរាជាណាចក្រកម្ពុជា ចូលជួបសម្តែងការគួរសម បង្ហាញមុខ និងពិភាក្សាការងារ ក្នុងឱកាសដែលឯកឧត្តម បានមកបំពេញបេសកកម្មការទូតនៅកម្ពុជា ដើម្បីបន្តពង្រឹងពង្រីកកិច្ចសហប្រតិបត្តិការទំនាក់ទំនង រវាងរាជរដ្ឋាភិបាល កងទ័ព និងប្រជាជន នៃប្រទេសទាំងពីរ ជប៉ុន កម្ពុជា កាន់តែប្រសើរឡើង។
ក្នុងជំនួបនាពេលនោះភាគីទាំងពីរបានពិភាក្សាគ្នាអំពីការពង្រឹងបន្ថែមទៀតនូវកិច្ចសហប្រតិបត្តិការលើវិស័យផ្សេងៗ រួមមាន វិស័យពាណិជ្ជកម្ម និងការវិនិយោគ ការកសាងសន្តិភាព ការដោះមីន ការអភិវឌ្ឍធនធានមនុស្ស សិទ្ធិមនុស្ស និងលទ្ធិប្រជាធិបតេយ្យ វប្បធម៌ ចំណងរវាងប្រជាជន និងប្រជាជន និងទេសចរណ៍ ជាដើម នឹងពិសេសក៏ផ្ដោតសំខាន់ទៅលើកិច្ចសហប្រតិការពង្រឹងទំនាក់ទំនង រវាងកងទ័ពប្រទេសទាំងពីរ កម្ពុជា ជប៉ុន ឱ្យកាន់តែជិតស្និទ្ធផងដែរ។ សម្តេចពិជ័យសេនា ទៀ បាញ់ ក្នុងនាមឲ្យប្រមុខរាជរដ្ឋាភិបាល កងទ័ព និងប្រជាជនកម្ពុជា បានសំដែងនូវការស្វាគមន៍យ៉ាងកក់ក្តៅរីករាយបំផុតចំពោះវត្តមាន ឯកឧត្តម ឯកអគ្គរាជទូតជប៉ុនតែងតាំងថ្មី ប្រចាំនៅកម្ពុជា ដោយសម្តេច បានវាយតំលៃខ្ពស់ចំពោះលទ្ធផលការងាររបស់ឯកឧត្តម ឯកអគ្គរាជទូតជប៉ុនចាស់ ដែលបានធ្វើទំនាក់ទំនង កិច្ចសហប្រតិបត្តិការ ដ៍ល្អជាមួយរាជរដ្ឋាភិបាល កងទ័ព និងប្រជាជនកម្ពុជា ក្នុងអាណត្តិការទូតរបស់ ឯកឧត្តម នៅកម្ពុជា កន្លងមក។ សម្តេចពិជ័យសេនា បានថ្លែងអំណរគុណ នឹងដឹងគុណជានិច្ចចំពោះរាជរដ្ឋាភិបាល កងទ័ព និងប្រជាជនជប៉ុន ដែលជានិច្ចជាកាលតែងតែបានជួយឧបត្ថម្ភគាំទ្រ ទាំងស្មារតី សំភារៈ ថវិកា ក្នុងការផ្តល់នូវជំនួយឥតសំណង ជួយដល់ប្រទេសកម្ពុជា ក្នុងការស្តារ និងអភិវឌ្ឍន៍ឡើងវិញ លើគ្រប់ហេដ្ឋារចនាសម្ព័ន្ធ ក្នុងប្រទេសកម្ពុជា ពិសេសបានជួយយ៉ាងច្រើនដល់កងយោធពលខេមរភូមិន្ទ លើវិស័យដោះមីន និងបណ្តុះបណ្តាលអ្នកជំនាញដោះមីននៅកម្ពុជា។ សម្តេចពិជ័យសេនា សង្ឃឹមយ៉ាងមុតមាំថា៖ ឯកឧត្តម ឯកអគ្គរាជទូតជប៉ុនថ្មី នឹងបន្តពង្រឹងកិច្ចសហប្រតិបត្តិការ ទំនាក់ទំនង រវាងរាជរដ្ឋាភិបាល កងទ័ព និងប្រជាជនប្រទេសទាំងពីរ កម្ពុជា ជប៉ុន កាន់តែល្អប្រសើរថែមទៀតនៅក្នុងអាណត្តិថ្មីនេះ។
ជាការឆ្លើយតប ឯកឧត្តម អ៊ូអីណូ អាតស៊ុស៊ី (UENO Atsushi) បានជម្រាបជូនសម្ដេចពិជ័យសេនា ថា ៖ ឯកឧត្តម ធ្លាប់បានមកកាន់កម្ពុជាកាលពីឆ្នាំ១៩៩២ ម្ដងរួចមកហើយ ដែលនៅពេលនោះ កម្ពុជាកំពុងតែមានសង្គ្រាមស៊ីវីលក្នុងស្រុក ហើយឯកឧត្តម គឺជាអ្នកសិក្សា និងស្តារឡើងវិញនៅស្ពានឆ្លងទន្លេសាប គឺស្ពានមិត្តភាពកម្ពុជា-ជប៉ុន ជ្រោយចង្វារ។ ហើយនៅពេលនេះកម្ពុជា មានការអភិវឌ្ឍខ្លាំង.មានទាំងស្ថេរភាព និងមានសន្តិភាពពិតប្រាកដ ក្រោមនយោបាយឈ្នះឈ្នះ របស់សម្ដេចតេជោ។ ក្នុងន័យនេះឯកឧត្តម សូមសម្ដែងនូវការគោរពជូនចំពោះ សម្ដេចតេជោ ហ៊ុន សែន នាយករដ្ឋមន្ត្រី នៃប្រទេសកម្ពុជា ក្នុងភាពជាអ្នកដឹកនាំជាទីគោរព និងសម្ដេចពិជ័យសេនា ក្នុងភាពជាអ្នកដឹកនាំប្រមុខការពារជាតិ ជាទីគោរពផងដែរ។ ឯកឧត្តម បានបន្តថា៖ ទំនាក់ទំនងរវាងរាជរដ្ឋាភិបាល កងទ័ព និងប្រជាជនប្រទេសទាំងពីរ គឺល្អបំផុតនៅពេលនេះ។ ក្នុងបេសកកម្មការទូត នៅកម្ពុជា ឯកឧត្តម បានប្តេជ្ញាថា៖ នឹងខិតខំប្រឹងប្រែងឲ្យអស់ពីសមត្ថភាពដើម្បីពង្រឹងពង្រីកទំនាក់ទំនងទ្វេភាគីកម្ពុជា.ជប៉ុន ឱ្យកាន់តែរឹងមាំថែមទៀត តាមរយៈនៃការជំរុញអ្នកវិនិយោគ ជប៉ុនមកកាន់កម្ពុជា ការជំរុញអ្នកទេសចរណ៍ជប៉ុនមកកម្ពុជា និងជួយគាំទ្រកម្ពុជា លើការរៀបចំដំណើរការនៃការប្រកួតកីឡាស៊ីហ្គេម សម្រាប់ឆ្នាំ២០២៣ ដែលកម្ពុជាធ្វើជាម្ចាស់ផ្ទះ .កិច្ចដំណើរការបោះឆ្នោតជ្រើសរើសតំណាងរាស្ត្រ នាខែកក្កដា ខាងមុខ.ការងារនៃកិច្ចសហប្រតិបត្តិការដោះមីន.កិច្ចសហប្រតិបត្តិការលើវិស័យសេដ្ឋកិច្ច.និងការងារដទៃៗទៀតជាច្រើន។ ឯកឧត្តម អ៊ូអីណូ អាតស៊ុស៊ី បានបញ្ជាក់បន្ថែមទៀតថា រាល់ការងារដែលនៅសេសសល់ ដែលឯកឧត្តម ឯកអគ្គរាជទូតចាស់ មិនទាន់បានបំពេញ គឺឯកឧត្តម សន្យានឹងបន្តការងារទាំងនោះ ជាមួយរាជរដ្ឋាភិបាល កងទ័ព និងប្រជាជនកម្ពុជា ដើម្បីពង្រឹងពង្រីកកិច្ចសហប្រតិបត្តិការទំនាក់ទំនងឲ្យកាន់តែល្អជាមួយកម្ពុជា។
ពាក់ព័ន្ធដល់ការអភិវឌ្ឍន៍ទំនើបកម្មកងទ័ពជើងទឹកនៅមូលដ្ឋានសមុទ្ររាម នាខេត្តព្រះសីហនុ សម្តេចពិជ័យសេនា ទៀ បាញ់ បានបញ្ជាក់ច្បាស់ៗ ជូនឯកឧត្តម ឯកអគ្គរាជទូតជប៉ុនថ្មីថា៖ ក្រោយពេលជួសជុល និងស្ថាបនារួចរាល់ កំពង់ផែរាម មូលដ្ឋានកងទ័ពជើងទឹក របស់កម្ពុជាមួយនេះ នឹងបើកទូលាយដល់ការចូលចតនាវា ធ្វើទស្សនកិច្ចផ្លាស់ប្ដូរបទពិសោធន៍ពីគ្នាទៅវិញទៅមក ដោយទូលាយសម្រាប់កងទ័ពជើងទឹកគ្រប់បណ្ដាប្រទេស ដែលមានបំណង ចងមេត្រី នៃការរិតចំណងទំនាក់ទំនង សាមគ្គីភាព មិត្តភាព កិច្ចសហប្រតិបត្តិការជាមួយនឹងកម្ពុជា បានដោយសេរី។ សម្ដេច បានជូនពរដល់ ឯកឧត្តម ឯកអគ្គរាជទូតជប៉ុនថ្មី ឲ្យបំពេញបេសកកម្មកាទូតនៅកម្ពុជា ទទួលបានជោគជ័យ ៕
