ទីលានផ្នូរយុទ្ធជនខេត្តកោះកុង ត្រូវបានប្រារព្ធពិធីសម្ពោធជាផ្លូវការនៅរសៀលថ្ងៃទី១៧ ខែមករា ឆ្នាំ២០២៣ ស្ថិតក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ប្រធានក្រុមការងាររាជរដ្ឋាភិបាល ចុះជួយខេត្តកោះកុង និងជាតំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងមានការអញ្ជើញចូលរួមពីឯកឧត្តម ជារដ្ឋមន្ត្រី រដ្ឋលេខាធិការ អភិបាល អភិបាលរង មន្រ្តីរាជការជុំវិញខេត្តកោះកុង មេបញ្ជាការ មេបញ្ជាការរង យោធភូមិភាគទី៣ នាយទាហាន នាយទាហានរង តំបន់ប្រតិបត្តិការសឹករងកោះកុង ប្រជាពលរដ្ឋ សិស្សានុសិស្សក្នុងខេត្តជាច្រើនរូបទៀត។
ក្នុងឱកាសនោះ បន្ទាប់ពី លោកជំទាវ មិថុនា ភូថង អភិបាលនៃគណៈអភិបាលខេត្តកោះកុង បានលើកឡើងថ្លែងសន្ទកថាស្វាគមន៍រួចមក នាយឧត្តមសេនីយ៍ យន្ត មីន រដ្ឋលេខាធិការក្រសួងការពារជាតិ និងជាប្រធានក្រុមការងារសាងសង់ទីលានផ្នូរយុទ្ធជនខេត្តកោះកុង បានឡើងអានរបាយការណ៍ស្តីពីការសាងសង់ទីលានបញ្ចុះសពអតីតយុទ្ធជនខេត្តកោះកុង ដោយបានបញ្ជាក់ថា៖ ទីលានផ្នូរយុទ្ធជនខេត្តកោះកុង បានសាងសង់នៅលើទីតាំងស្ថិតនៅ ភូមិ ៣ សង្កាត់ស្មាច់មានជ័យ ក្រុង ខេមរភូមិន្ទ ខេត្តកោះកុង លើផ្ទៃដីទំហំ ៩២០០ ម៉ែត្រក្រឡា ដែលបានបញ្ចុះសពយុទ្ធជនពលី មានចំនួន ៤៤៨ ផ្នូរ ហើយសពយុទ្ធពលីទាំងអស់មានដើមកំណើតមកពី ១៨ ខេត្តក្នុងព្រះរាជាណាចក្រកម្ពុជា។ សមិទ្ធផលដែលទទួលបានក្នុងការសាងសង់ទីលានផ្នូរយុទ្ធជននេះមាន៖ ខ្លោងទ្វា ស្តូប និងកោដ វេទិការបុណ្យ បន្ទប់ទឹក ផ្នូរសពយុទ្ធជន ឃ្លាំងដាក់សម្ភារៈ និង បន្ទប់ស្នាក់នៅ បន្ទប់ទឹក ផ្ទាំងចម្លាក់រាយនាមយុទ្ធជនពលី មរណៈខេត្តកោះកុងពីឆ្នាំ ១៩៧៩ ដល់ ១៩៩៨ សួនច្បារព័ទ្ធជុំវិញ របងព័ទ្ធជុំវិញ ៤ ទិស និង ចំណតរថយន្ត ដែលសរុបលើកការសាងសង់ជួសជុលទីលានអស់ថវិការចំនួន ៧២៧ ៣៥៣ ដុល្លា ប្រាក់រៀលចំនួន ១៧៣ ៣២៧ ២០០ រៀល និង ប្រាក់បាត ចំនួន ១០០០០ បាត។ ការសាងសង់ និង ជួសជុលទីលានផ្នូរយុទ្ធជនខេត្តកោះកុងនេះ ត្រូវបានប្រើប្រាស់ថវិកា ដែលបានមកពីការជួយឧត្ថម្ភពីសប្បុរសជននានា ដោយពុំមានប្រើប្រាស់ថវិការដ្ឋទេ។
ថ្លែងក្នុងពិធីសម្ពោធទីលានផ្នូរយុទ្ធជនខេត្តកោះកុង នាឱកាសនោះ សម្តេចពិជ័យសេនា ទៀ បាញ់ បានមានប្រសាសន៍ថា៖ ពិធីសម្ភោធ ទីលានផ្លូវយុទ្ធជនខេត្តកោះកុង នាពេលនេះ ស្របពេលដែលមន្ត្រីរាជការ កងកម្លាំងប្រដាប់អាវុធ ប្រជាជនទូទាំងខេត្តកោះកុង រៀបចំប្រារព្ធពិដ៏ខួបលើកទី៤៤ ទិវាជ័យជម្នះ ១៧ មករា ២០២៣។
ក្នុងនាមក្រុមការងាររាជរដ្ឋាភិបាលចុះមូលដ្ឋានខេត្តកោះកុង សម្តេចពិជ័យសេនា ទៀ បាញ់ បានសំដែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារសាងសង់ ដែលបានសហការ យ៉ាងជិតស្និទ្ធជាមួយអាជ្ញាធរមានសមត្ថកិច្ច និងស្ថាប័នពាក់ព័ន្ធទាំងអស់ អនុវត្តការងារប្រកបដោយការយកចិត្តទុកដាក់សាងសង់ដំណើរការបានរលូន ចាប់តាំងពីថ្ងៃដំបូង រហូតដល់ថ្ងៃបញ្ចប់ជាស្ថាពរ និងសម្ពោធដាក់ឱ្យប្រើប្រាស់ជាផ្លូវការនាពេលនេះ។ សម្តេចពិជ័យសេនា បានចាត់ទុកទីលានផ្នូរយុទ្ធជនខេត្តកោះកុង ដែលបានកសាងឡើងនាពេលនេះ គឺជាភស្តុតាងប្រវត្តិសាស្ត្រក្នុងកងយោធពលខេមរភូមិន្ទ រួមចំណែកដ៏សំខាន់ ក្នុងការលើកកម្ពស់តួនាទីដឹកនាំរបស់នាយទាហានជំនាន់ក្រោយយកជាគំរូ និងជា និមិត្តរូបនៃការអភិវឌ្ឍរីកចម្រើន។ ទីលាននេះ ជាសំណង់មួយក្នុងចំណោមសំណង់ជាច្រើន ដែលកងយោធពលខេមរភូមិន្ទសម្រេច បាន ក្នុងពេលប្រទេសជាតិមានសុខសន្តិភាព ស្ថេរភាពនយោបាយ ឯកភាពជាតិពេញលេញ ក្នុងស្មារតី គោរពដឹងគុណដ៏ជ្រាលជ្រៅបំផុតចំពោះបុព្វការីជន ថ្នាក់ដឹកនាំ យុទ្ធជន យុទ្ធនារី និងអ្នកស្នេហាជាតិ គ្រប់ជំនាន់ ដែលបានតស៊ូពុះពារធ្វើពលិកម្មប្រកបដោយវីរភាពនៅគ្រប់ដំណាក់កាល ដើម្បីឯករាជ្យ សន្តិភាព សេរីភាព អធិបតយ្យ បូរណភាពទឹកដី និងវឌ្ឍនភាពរបស់ប្រជាជនខ្មែរ។ សម្តេចពិជ័យសេនា បានសង្កត់ធ្ងន់ថា៖ សមិទ្ធផលដែលសម្រេចបាននាពេលនេះ មិនអាចបំភ្លេចបានពីការលះបង់ ក្រោមការដឹកនាំដ៏ឆ្នើម ប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលជាស្ថាបនិក មគ្គុទ្ទេសក៍ឯក និងប្រតិបត្តិករដ៏ស្មោះត្រង់ បានដឹកនាំអនុវត្តសម្រេច ជោគជ័យនៃនយោបាយឈ្នះ ឈ្នះ ឆ្នាំ១៩៩៨ បាននាំឱ្យប្រទេសជាតិមានសន្តិភាព និងការឯកភាពជាតិ ពេញលេញ និងការអភិវឌ្ឍរីកចម្រើនលើគ្រប់វិស័យ រហូតមកដល់បច្ចុប្បន្ននេះ។ ក្នុងនាម សម្តេចតេជោ ហ៊ុន សែន សម្តេចពិជ័យសេនា បានសំដែងនូវសេចក្តីសោមនស្សរីករាយ និងមោទនភាពក្រៃលែង ដែលក្រុមការងារបានសាងសង់ទិលានផ្នូរយុទ្ធជននេះឡើង (មិនត្រឹមតែជាទីឋានរំលឹកដល់កម្មាភិបាល យុទ្ធជន យុទ្ធនារី ដែលបានពលីជីវិត ដើម្បីជាតិ មាតុភូមិ និងប្រជាជនប៉ុណ្ណោះទេ តែទីលាននេះនឹងក្លាយជាសំណង់ប្រវត្តិសាស្ត្របង្កប់ និង បង្ហាញនូវតម្លៃរួបរួមសាមគ្គី វប្បធម៌ កតញ្ញូតា និរន្តភាពនៃសង្គមជាតិទៀតផង។ មួយវិញទៀត ពិធីសម្ពោធទីលានផ្នូរយុទ្ធជនខេត្តកោះកុងនេះ ក៏ជាសក្ខីភាពបានបង្ហាញពី តម្លៃសន្តិភាព និងការឯកភាពជាតិពេញលេញ តាមរយៈនយោបាយឈ្នះ ឈ្នះ បានធ្វើឱ្យប្រទេសជាតិ មានសុខសន្តិភាព និងការអភិវឌ្ឍរីកចម្រើនលើគ្រប់វិស័យក្រោមការដឹកនាំដ៏ឈ្លាសវៃប្រកបដោយគតិ បណ្ឌិតរបស់ សម្តេចតេជោ នាយករដ្ឋមន្ត្រី ដែលប្រជាជនទូទាំងប្រទេសប្រសិទ្ធនាមថា ជាស្ថាបនិកឯក និងជាមគ្គុទ្ទេសក៍ឯក។ សម្តេចពិជ័យសេនា ទៀ បាញ់ បានសំដែងនូវសេចក្តីសង្ឃឹម និងជឿជាក់យ៉ាងមុតមាំថា ទីលានផ្នូរយុទ្ធជននេះនឹងក្លាយជាទីតាំងសច្ចភាពប្រវត្តិសាស្ត្រយោធា បង្ហាញពីការតស៊ូ លះបង់ ស្នេហាជាតិ ដើម្បីបូរណភាពទឹកដីសម្រេចបាន នូវការកសាងសុខសន្តិភាព ការអភិវឌ្ឍលើគ្រប់ វិស័យ និងភាពសម្បូរសប្បាយរបស់ប្រជាជាតិកម្ពុជា មក ដល់បច្ចុប្បន្ន។ ជាងនេះទៅទៀត ទីលានផ្នូរយុទ្ធជននឹងជួយបណ្តុះស្មារតីស្នេហាជាតិ សាមគ្គីភាព ការ ឱ្យតម្លៃនិងដឹងគុណដល់កុលបុត្រកុលធីតាខ្មែរ ជំនាន់ក្រោយទៅលើការលះបង់ តស៊ូរបស់វិរៈយុទ្ធជន យុទ្ធនារី ដើម្បីជាតិ មាតុភូមិនៅគ្រប់ពេលវេលា គ្រប់កាលៈទេសៈដោយមិនគិតពីទុក្ខលំបាក ដើម្បីជាតិ រហូតកម្ពុជាមានភាពរីកចម្រើនលើគ្រប់វិស័យនាពេលបច្ចុប្បន្ននេះ ៕
