ព័ត៌មាន

នាយ​ឧត្តម​សេនីយ៍​ នាង​ ផាត ​ជួប​សំណេះ​សំណាល​នាយ​ទាហាន​ នាយ​ទាហាន​រង​ និង​ពល​ទាហាន ​កង​ពល​តូច​ថ្មើរ​ជើង​លេខ​ ៥៣​
នាយកដ្ឋានព័ត៌មាន(៣)
740
3003 នាយ​ឧត្តម​សេនីយ៍​ នាង​ ផាត ​ជួប​សំណេះ​សំណាល​នាយ​ទាហាន​ នាយ​ទាហាន​រង​ និង​ពល​ទាហាន ​កង​ពល​តូច​ថ្មើរ​ជើង​លេខ​ ៥៣​

         នា​ឱកាស​រំលឹក​ខួប​អនុស្សាវរីយ៍​លើក​ទី​៤៤ ​ទិវា​ជ័យ​ជំនេះ ​៧ម​ក​រា (៧មករា ​១៩៧៩ -​ ៧​មករា​ ២០២៣) ​នាយ​ឧត្តម​សេនីយ៍ ​នាង ផាត រដ្ឋ​លេខាធិ​កា​រប្រចាំ​កា​រ ក្រសួង​ការ​ពារ​ជាតិ​ អម​ដំណើរ​ដោយ​ ឧត្តម​សេនីយ៍​ឯក ឯក ​សំអូន មេ​បញ្ជាការ​រង​ កង​ទ័ព​ជើង​គោក ​មេ​បញ្ជាការ ​យោធ​ភូមិ​ភាគ​ទី​៥​ និង​ឯកឧត្តម​តំណាង​ស្ថាប័ន​ចំណុះ​ក្រសួង​ការ​ពារ​ជាតិ​ អគ្គ​មេ​បញ្ជាការ​ និង​កង​ទ័ព​ជើង​គោក​ជា​ច្រើន​រូប​ទៀត ​បាន​អញ្ជើញ​ជួប​សំណេះ​សំណាល ​នាយ​ទាហាន​ នាយ​ទាហាន​រ​ង និង​ពល​ទាហាន ​កង​ពល​តូច​ថ្មើរ​ជើង​លេខ​៥៣​ យោធ​ភូមិ​ភាគ​ទី៥​  ក្នុង ​ស្រុក​គំរៀង ​នា​ព្រឹក​ថ្ងៃទី​០៤ ​ខែ​មករា​ ឆ្នាំ​២០២៣​។

         នៅ​ក្នុង​របាយ​ការណ៍​ស្វាគម​ន៍រ​បស់​ ឧត្តម​សេនីយ៍​ត្រី​ កែវ សេងលន មេ​បញ្ជាការ​ ក​ង​ពល​តូច​លេខ​ ៥៣ ​បាន​លើក​ឡើង​ថា​៖ ទិវាជ័យ​ជំនះ​៧​មក​រា ២០២៣ ​ជា​ខួប​លើក​ទី៤​៤​ ដែល​យើង​ទាំង​អស់​​គ្នា នឹង​ប្រារព្ធ​ធ្វើ​នៅ​ពេល​ដ៏​ខ្លីខាង​មុខ​នេះ​ ប្រព្រឹត្តិ​ទៅ​ស្រប​ពេល​ដែល​ប្រជាពល​រដ្ឋ​កម្ពុជា​ ទូទាំង​ប្រទេស​ កំពុង​រួមរស់​ក្រោម​ម្លប់​សន្តិភាព ​ស្ថេ​រ​ភាព​ ឯកភាព​ជាតិ​ ក្រោម​ដំបូល​រដ្ឋធម្មនុញ​ នៃ​ព្រះ​រាជាណា​ចក្រ​កម្ពុជា ​ប្រជាជន​មាន​សិទ្ធិ​សេរីភាព​យ៉ាង​ពេញ​លេញ ​សំបូរ​សប្បាយ​ និង​ពោរ​ពេញ​ទៅ​ដោយ​មោទន​ភា​ព ចំពោះ​សមទ្ធិផល​ដែល​យើង​សម្រេច​បាន​ចាប់​ពីថ្ងៃរំដោះ ​៧​ មករា​ ឆ្នាំ​១៩៧៩ រហូត​មក​ដល់​បច្ចុប្បន្ន​នេះ​ បាន​ធ្វើឲ្យ​ជីវភាព​រស់នៅ​របស់​ប្រជា​ជន ធូរធារ​ សំបូរ សប្បាយ ​ឥត​ឈប់​ឈរ​ និង​រស់នៅ​ស្មើ​មុ​ខ ស្មើ​មាត់​ ជា​មួយ​បណ្តា​ប្រទេស​ ក្នុង​តំបន់​ និង​នៅ​លើ ពិភព​លោក​។​

          ក្នុង​នាម​ថ្នាក់​ដឹកនាំ​ក្រសួង​ការ​ពារ​ជាតិ​ អគ្គ​មេ​បញ្ជាការ​ និង​មេ​បញ្ជាការ​ កង​ទ័ព​ជើង​គោក​, នាយឧត្តម​សេនីយ៍ ​នាង ផាត បាន​សម្តែង​នូវ​ការ​ចូល​រួម​អបអរសាទរ ​ចំពោះ​ស្នាដៃ​ និង​សមិទ្ធផល​នានា ​ដែល​នាយ ​និង​ពល​ទាហាន ​កង​ពល​តូច​លេខ​៥៣ ​បាន​ខិត​ខំ​ប្រឹង​ប្រែង​ យ៉ាង​សកម្ម និង​មា​នប្រសិទ្ធ​ភាព ​ក្នុង​ការ​ដឹកនាំ ​អង្គភាព ​ការ​កសាង​អង្គភាព ​និង​ការ​ចូល​រួម​អនុវត្ត ​បទ​បញ្ជា​របស់​ថ្នាក់​ដឹក​នាំ​នៅ​គ្រប់​លំដាប់​ថ្នាក់​ ដែល​ធ្វើឲ្យកង​ពលតូច​លេខ​៥៣​ មាន​ការវិវត្តន៍​ រី​កចម្រើន​គួរជាទីមោទនៈ​នា​ពេល​កន្លង​មក​។

         ក្នុង​ឱកាស​នោះ​ នាយ​ឧត្តមសេនីយ៍ ​នាង ផាត បាន​លើក​ឡើង​នូវ​ចំនុច​មួយ​ចំនួន ​ដើម្បី​ចូល​រួម​អបអរ​សាទរទិវា​លើក​ទី​៤​៤ ​នៃ​ទិវាជ័យ​ជំនះ​៧​មករា​ និង​បាន​សង្កត់​ធ្ងន់​បន្ថែម​ និង​ស៊ី​ជម្រៅ​នូវ​អត្ថន័យ​ជ័យ​ជំនះ​៧​មករា​ រួម​និង​សភាព​ការណ៍​ផ្សេងៗ​ទៀត ​ដែល​បាន​កើត​ឡើង​ នៅ​ក្នុង​រយៈ​ពេល​១​ឆ្នាំ​កន្លង​មក​ សភាព​ការណ៍​សកល​លោក​ សភាព​ការណ៍​តំបន់ ​និង​សភាព​ការណ៍​ក្នុង​អាស៊ាន ​ក្នុង​នោះ ​នៅពេ​ល​ដែល​កម្ពុជា​បាន​ធ្វើ​ជា​ម្ចាស់ផ្ទះ​ប្តូរ​វេន​កិច្ច​ប្រជុំ​កំពូល​អាស៊ាន ​និង​កិច្ច​ប្រជុំ​ពាក់​ព័ន្ធ​ និង​កិច្ច​ប្រជុំ​រដ្ឋមន្ត្រី​ការពារ​ជាតិ​អាស៊ាន​ក្រៅ​ផ្លូវការ​ និង​កិច្ច​ប្រជុំ​រដ្ឋមន្ត្រី​ការពារ​ជាតិអាស៊ាន​​បូក ​ព្រម​ទាំង​និងបញ្ហា​ប្រឈមមួ​យ​ចំនួន​ដែល​សកល​លោក​កំពុង​ជួបប្រទះ​ និង​លទ្ធផល​ របស់​ ខ.ភ.​ម ​ដែល​បាន​ខិត​ខំ​ក្នុង​រយៈ​ពេល​១​ឆ្នាំ​កន្លង​មក​។ ឯកឧត្តម ​បាន​គូស​បញ្ជាក់​ថា៖ ថ្ងៃ​៧​មករា​ ត្រូវ​បាន​ប្រជាជន​កម្ពុជា​ប្រសិទ្ធ​នាម​ថា​ គឺ​ជា​ថ្ងៃ​កំណើតទី​២​របស់​ខ្លួន​។ បើ​គ្មាន​ ថ្ងៃ ​៧​ មករា​ យើងពិត​ជា​គ្មាន​ជីវិត​រស់នៅ​មក​ដល់​ថ្ងៃ​នេះ​ទេ​ ហើយ​ក៏​គ្មាន​អ្វីៗ​រហូត​មកដល់បច្ចុប្បន្ននេះ​ដែរ​។

         នាយ​ឧត្តម​សេនីយ៍ ​នាង ផាត បាន​ផ្តាំផ្ញើរ​ថា​ យើង​ត្រូវ​ រួប​រួម​សាមគ្គី​គ្នា​ក្រោម​រដ្ឋ​ធម្មនុញ្ញ ​និង​ក្រោម​ ដំបូល​ដ៏​ត្រជាក់​ នៃ​អង្គព្រះ​មហាក្សត្រ​ ​ជា​ទីសក្ការៈ​ ដ៏​ខ្ពង់​ខ្ពស់ ​និង​ការ​ដឹក​នាំ​របស់​ សម្តេច​អគ្គ​មហា ​សេនា​បតី​តេជោ ​ហ៊ុន សែន ប្រមុខ​រាជ​រដ្ឋា​ភិបាល​ ​ហើយយើង​គាំទ្រ​ពេញ​ទំហឹង ​សម្តេច​តេជោ ​ជា​នាយក​រដ្ឋមន្ត្រី ​និង​បេក្ខភាព​ឯកឧត្តម​ ហ៊ុន ម៉ាណែត ជា​នាយក​រដ្ឋមន្ត្រី​បន្ត​វេន​ នា​ពេល​អនាគត​។ បន្ត​ចូល​រួម​ការ​កែ​ទម្រង់​ ខ.ភ.ម និង​ការ​ចាក់​វ៉ាក់​សាំង​បង្ការ​ជំងឺ​កូវី​ដ​១៩​ តាម​ការ​ណែនាំ​របស់​ថ្នាក់​លើ​។ ​ការ​ពារ​សុខ​សន្តិភាព​ និង​សមិទ្ធផល​នានា ​មិន​ឲ្យ​ជន​ក្ប​ត់​ទាំង​ឡាយ​ណា​មក​បំផ្លិច​បំផ្លាញ​បាន​ឡើយ។​

          គួរ​បញ្ជាក់​ដែរ​ថា​៖  ក្នុ​ង​រយៈពេល​១​ឆ្នាំ​ ឆ្នាំ​២០២២​កន្លង​មក​នេះ​ ​កង​ព​ល​តូចថ្មើរ​ជើង​លេខ​៥៣​ ក្រៅ​ពីការ​បំពេញ​ភារកិច្ច​ស្នូល ​បាន​យក​ចិត្ត​ទុក​ដាក់​ហ្វឹក​ហ្វឺន​ដល់​យោធិនរបស់​ខ្លួន​ តាម​ផែន​ការ​ឆ្នាំ​ មាន​ចំនួន​៦​វគ្គ ​វគ្គ​ហ្វឹក​ហ្វឺន​រៀប​រយ​ម្ចាស់​ការ​របស់​អង្គភាព ​ចំនួន​៥​​វគ្គ។ អង្គភាព ​បាន​អប់រំ​ផ្សព្វ​ផ្សាយ​ការ​ងារ​អប់រំ​ចិត្ត​សាស្ត្រ​ ក្នុង​នោះ​ច្បាប់​លក្ខន្តិកៈ​វិន័យ​ទូទៅ​របស់​ ខ.ភ.ម​ ប្រឆាំង​គ្រឿង​ញៀន ​ចរាចរ​ផ្លូវគោក ​វិធាន​ការ​ទ​ប់ស្កាត់​ជម្ងឺ​កូវីដ​១៩ និង​សភាព​ការ​ណ៍​ថ្មីៗ​ ដល់នាយ​ និង​ពល​ទាហាន​ជាប់​ជា​ប្រចាំ​។ ទន្ទឹម​នឹង​នេះ​ បាន​យក​ចិត្តទុ​ក​ដាក់ ​កសាង​អភិវឌ្ឍន៍ ​អង្គភាព ​ដោយ​បាន​កសាង​អគារ​ស្នាក់​នៅ​សិក្ខា​កាម​១ខ្ន​ង​, ចាក់​​ផ្លូវ​កៅស៊ូមុខ​ទី​បញ្ជាការ​, ផ្លូវ​បេតុង ​ជុំវិញ​ទី​បញ្ជាការ​, ផ្លូវ​ក្រាល​គ្រួស​ក្រហម​៨​ខ្សែ,​ ផ្ទះ​បាយ​គំរូ១៣​ខ្ន​ង, រោង​ដាក់​​កាំ​ភ្លើង​, រោង​ម៉ាស៊ីន​ភ្លើង​ និង​កសាង​ហេដ្ឋា​រចនា​សម្ព័ន្ធ​ជា​ច្រើន​ ដោយ​ចំ​ណាយ​អស់​ថវិកា​ជាង​ ៣១៦​លាន​រៀល​ និង​ប្រាក់​ដុល្លា​អស់ជាង​ ​៣​សែន​ ៤​ម៉ឺន ​១ពា​ន់​ដុល្លា​អាមេរិក​ ៕


អត្ថបទថ្មីៗ

សេចក្តីប្រកាស

សារជូនពរ

វីដេអូ