ព័ត៌មាន

នាយ​ឧត្តម​សេនីយ៍​ នាង​ ផាត​ ជួប​សំណេះ​សំណាល​យោធ​ភូមិ​ភាគ​ទី​៥​
នាយកដ្ឋានព័ត៌មាន(៣)
732
3001

         ថ្ងៃ​៧​មករា​ ត្រូវ​បាន​ប្រជាជន​កម្ពុជា​ប្រសិទ្ធ​នាម​ថា៖ គឺ​ជា​ថ្ងៃកំណើត​ទី២​របស់​ខ្លួន​។ បើ​គ្មាន​ថ្ងៃ​៧​មករា ​យើង​ពិត​ជា​គ្មាន​ជីវិត​រស់​នៅ​មក​ដល់​ថ្ងៃ​នេះ​ទេ ​ហើយ​ក៏​គ្មាន​អ្វីៗរហូត​មក​ដល់​បច្ចុប្បន្ន​នេះ​ដែរ​។ នាយ​ឧត្តមសេនីយ៍ ​នាង ផាត រដ្ឋ​លេខា​ធិការ​ប្រចាំ​ការ​ ក្រសួង​ការ​ពារ​ជាតិ​ បាន​ថ្លែង​ដូច​នេះ​ ក្នុង​ឱកាស​អញ្ជើញ​ជួបសំណេះ​សំណាល​ នាយ​ទាហាន ​នាយ​ទាហាន​រង​ និង​ពល​ទាហាន ​យោធ​ភូមិ​ភាគ​ទី៥​ (នៅទី​រួម​ខេត្ត​បាត់​ដំបង)​ នាថ្ងៃ​ទី​៣ ខែ​មករា​ ឆ្នាំ​២០២៣​ ស្ថិ​ត​ក្នុង​ឱកាស ​អបអរសារ​ទរ​ ខួប​អនុស្សាវរីយ៍​លើក​ទី​៤៤ ​ទិវា​ជ័យ​ជំនេះ​៧​មករា ​(៧មករា ១៩៧៩ - ៧មករា ២០២៣)។ 

         តាម​របាយការណ៍​ស្វាគមន៍​​របស់ ​ឧត្តម​សេនីយ៍​ឯក ​ឯក សំអូន មេ​បញ្ជាការ​រង​ កង​ទ័ព​ជើង​គោក​ និង​ជាមេ​បញ្ជាការ​ យោធ​ភូមិ​ភាគ​ទី​៥​ បាន​ឲ្យដឹងថា​៖ យោធ​ភូមិ​ភាគ​ទី​៥​ ជា​អង្គភាព​មួយ​ ក្នុង​ចំណោម​ស្ថាប័ន​របស់រាជ​រដ្ឋាភិបាល​ បាន​ប្រកាន់​ខ្ជាប់​ នូវ​ជំហ​រ​ស្មារ​តី​៧មករា​ ហើយ​ស្មារតី​នេះបា​ន​ដក់​ជាប់​នៅក្នុង​ឆន្ទៈ​របស់​កង​ទ័ពគ្រប់​រូប​ ចាប់​តាំង​ពី​ដំណាក់​កាល​ សង្គ្រា​មផ្ទៃ​ក្នុ​ង​ រហូតមកដល់​ប្រទេស​ជាតិ​មាន​សុខ​សន្តិភាព​ ក្រោយ​ពេលមាន​សន្តិភាព រហូតដ​ល់​សព្វ​ថ្ងៃ​នេះ។ ​ឯកឧត្តម​បន្ត​ថា​ នៅឆ្នាំ​២០២២​ ក្រោយ​ប្រទេស​ជាតិ​កម្ពុជា​ទទួល​បាន​ធូរស្រាល​នូវជម្ងឺកូវីដ​១៩​ ក្រោម​នយោបាយ ​ចាក់​វ៉ា​ក់សាំង ​របស់​សម្តេច​តេជោ,​ យោធ​ភូមិ​ភាគ​ទី​៥ បាន​ខិត​ខំពុះពារ​ដឹក​នាំអង្គភាព​លើ​គ្រប់​វិស័យ​ បាន​អនុវត្ត​យ៉ាង​ម៉ឺងម៉ាត់​រាល់​ផែន​ការ​ សារាចរណ៍​ និង​បទ​បញ្ជា​ថ្នាក់​លើគ្រប់​ជាន់​ថ្នាក់​គ្រប់​កាលៈ​ទេសៈ​ ជាក់​ស្តែង​ ដូច​ជា​ការ​ហ្វឹក​ហ្វឺ​ន​ពង្រឹង​​កម្លាំង​ សមត្ថភាព​ បំពេញ​ភារកិច្ច​ រៀបចំកម្លាំង​អន្តរាគមន៍​ រៀប​ចំ​កម្លាំង​ប្រតិបត្តិការ​សង្គ្រោះ​គ្រោះ​មហន្ត​រាយ​ លេខ​៧០៥ ​សម្រាប់​អនុវត្ត​ប​ទបញ្ជា ​និងសហការ​ជា​មួយ​ក​ងកម្លាំង​សមត្ថកិច្ច អាជ្ញាធរ​ដែន​ដី​ ​អន្តរាគម​ន៍​ចុះ​ជួយ​សង្គ្រោះ​ប្រជាពល​រដ្ឋ​រ​ងគ្រោះ​ដោយគ្រោះ​មហន្តរាយ​ផ្សេងៗ​ ដែល​កើត​ចេញ​ក្នុង​ភូមិ​សាស្ត្រ​ទទួល​ខុស​ត្រូវ​ បាន​សហការ​យ៉ាង​ជិត​ស្និត​ជា​មួយ​បណ្តាប្រទេស​ជិត​ខា​ង ដើម្បី​រក្សា​បា​នមិត្តភាព​ សន្តិភាព​ និង​កិច្ច​សហប្រតិបត្តិ​ការ​។​

         ក្នុងនាម​ប្រមុខ​រាជរដ្ឋាភិបាល និងថ្នាក់​ដឹក​នាំ​ក្រសួង​ការពា​រជាតិ,​ នាយ​ឧត្តម​សេនីយ៍ ​នាង ផាត បាន​ថ្លែង​នូវ​ការ​កោត​ សរសើរ​ និង​វា​យតម្លៃ​ខ្ពស់​ ចំពោះ​លទ្ធផល​និង​ស្នាដៃ​ទាំង​ឡាយ​របស់​នាយ​ និង​ពល​ទាហាន ​យោធ​ភូមិ​ភាគ​ទី​៥​ ​ដែល​​ខិត​ខំ​សម្រេច​បាន​នៅ​ក្នុង​រយៈ​ពេល​កន្លង​មក​នេះ​។ ឯកឧត្តម ​នាង ផាត បាន​បញ្ជាក់​ថា​៖ នៅ​ប៉ុន្មាន​ថ្ងៃទៀត ​ជា​ថ្ងៃ៧ ​មករា​ ២០២៣​ខាង​មុខ​ គឺ​ជាថ្ងៃគម្រប់​ខួប​លើក​ទី​៤៤ ​នៃ​ទិវា​ជ័យ​ជំនះជាប្រវត្តិ​សាស្ត្រ​របស់​ប្រជាជន​យើង ​លើ​របប​ប្រល័យ​ពូជ​ សាសន៍ ​ប៉ុល​ពត​ ដែល​បា​នសង្គ្រោះ​ជាតិ​កម្ពុជា​ឲ្យរស់​រានមាន​ជីវិត​ឡើង​វិញ​ទា​ន់ពេល​វេលា​ បញ្ចប់​សម័យ​កាល ​ដ៏​ខ្មៅងងឹត​បំផុត​ ហើយ​បើក​នូវ​សគ្គរាជថ្ងៃ​រប​ស់កម្ពុជា ​ឯករាជ្យ ​សេរីភាព​ ប្រជាធិប​តេយ្យ ​និង​វឌ្ឍនភាព​សង្គ​ម​។ ​បន្ទាប់​ពី​ថ្ងៃ​ជ័យ​ជំនះ ​ជា​ប្រវត្តិសាស្ត្រ​នេះ​ គណៈ​បក្សប្រជាជន​កម្ពុជា ​រណសិរ្ស​សាមគ្គី​សង្គ្រោះ​ជាតិ​កម្ពុជា​ និង​រដ្ឋ​អំណាច​ប្រជាជន​បា​នប្រមូល​កម្លាំង​ប្រជាជន​ខ្មែរទាំង​មូល​ ពុះពារ​ជំនះ​គ្រ​ប់​​ឧបសគ្គ ​និង​ការ​លំបាក​រាប់​ម៉ឺន​សែន​ជំពូក​យ៉ាង​ប្តូរ​ផ្តាច់​ដើម្បី​ការ​ពារការ ​រស់​រានរបស់​ខ្លួន ​ការ​កសាង​ស្តារ​ប្រទេស​ជាតិ​ឡើងវិ​ញ ដែល​ត្រូវចាប់​ផ្តើម​ពី​ចំនុច​សូន្យ​។ ជោគជ័យ​​ក្នុ​ងការ​អនុវត្ត ​ភារកិច្ច​ជា​យុទ្ធសាស្ត្រ​នេះ​ បាន​បង្កើត​បុព្វបទ​ និង​លក្ខណៈ​សម្បត្តិ​ជា​មូលដ្ឋាន​មួយ​សម្រាប់​ការ​ស្វែង​រក​សន្តិភាព ​និង​បង្រួប​បង្រួម​ជាតិ​ និង​ការ​ស្តារ​អភិ​ប្រទេសជា​តិ​ឲ្យ​មាន​ការ​រីក​ចម្រើន​រហូតដ​ល់ពេល​បច្ចុប្បន្ន​នេះ។​ នេះជា​សច្ចធម៌​ប្រវត្តិ​សាស្ត្រ​។​

         នាយ​ឧត្តម​សេនីយ៍ ​បន្ត​ថា​៖ យើងរំលឹក​ព្រឹត្តិការណ៍​ជា​ប្រវត្តិសាស្ត្រ​នេះ​ឡើង​ ក្នុង​ស្មារតី​ចង​ចាំ​ជានិច្ច ​នូវ​មហា​ឧក្រឹដ្ឋ​ ដែល​របប​ប្រល័យ​ពូជ​សាសន៍​ប៉ុល​ពត​ បាន​ប្រព្រឹត្ត​ម​កមាតុភូមិ និ​​ងប្រជាជាតិ​របស់​យើង​។ នៅ​ក្នុង​ស្មារតី​ចង​ចាំ​ជា​និច្ច​នូវ​គុណូប​ការៈ​ដ៏​ថ្លៃថ្លា​បំផុត​រប​ស់កម្មា​ភិបាល​ យុទ្ធជន​យុទ្ធនារី​ នៃ​រណៈសិរ្ស​សាមគ្គី​សង្គ្រោះ​ជាតិ​កម្ពុជា ​និង​កង​ទ័ព​ស្ម័គ្រ​ចិត្ត​វៀត​ណាម​ ដែល​បាន​ពលី​កម្ម​សាច់​ឈាម​ និង​អាយុ​ជីវិត​របស់​ខ្លួន​ប្រកប​ដោយ​វីរភាព ​ក្នុង​ការ​ប្រយុទ្ធ​វាយ​រំ​លំ​របប​ប្រល័យ​ ពូជ​សាសន៍ ​ប៉ុល​ពត​ និ​ង​រាំង​ស្កាត់​មិន​ឲ្យ​របប​អប្រិយ៍​នេះ ​វិល​ត្រឡប់​មក​សារ​ជា​ថ្មី​វិ​ញបាន​។

          ទន្ទឹម​នឹង​នេះ ​ឯកឧត្តម​ នាង ផាត បាន​លើក​ឡើង​ផង​ដែរ​ អំពី​សភាព​ការណ៍​រួម​របស់​សកល​លោក ​ការ​ប្រឈម​ដែល​សកល​លោក​ ដែល​កំពុង​ជួប​ប្រទះ ​កិច្ច​ការ​តំបន់ ​លទ្ធផល​នៃ​កិច្ច​ប្រជុំ​កំពូល​អាស៊ាន​លើក​ទី៤០ ​និង​លើក​ទី៤​១ ​និង​កិច្ច​ប្រជុំ​ពាក់​ព័ន្ធ ​នៅ​រាជ​ធានី​ភ្នំពេញ នាថ្ងៃ​ទី​១០​ ដល់​ទី១៣ ​ខែ​ធ្នូ ឆ្នាំ​២០២២​។​ ការ​វាយ​តម្លៃ ​នៃ​កិច្ច​ប្រជុំ​ កំពូល​អាស៊ាន​លើក​ទី​៤០​ និង​៤១ ​និង​កិច្ច​ប្រជុំ​រដ្ឋមន្ត្រី​ការ​ពារ​ជាតិ​អាស៊ាន ​ឆ្នាំ​២០២២​។ ហើយ​ជា​មួយ​គ្នា​នេះ ​ក៏​បាន​ជំរុញ​ដល់​ នាយ​ទាហាន​ នាយ​ទាហាន​រ​ង និង​ពល​ទាហាន ​យោធ​ភូមិ​ភាគ​ទី​៥​ បន្ត​ការ​អនុវត្តនូវ​តួនាទី​ភារកិច្ច ​ដ៏​ល្អ​របស់​ខ្លួន​ បន្ថែម​ទៀត ​លើ​កិច្ច​ការ​ការ​ពារ​ជាតិ​ សាសនា ​ព្រះ​មហាក្សត្រ​ ការពារ​រដ្ឋធម្មនុញ្ញ ​ការ​ពារ​សុខ​សន្តិភាព ​ការ​ពា​រ រា​ជរ​ដ្ឋាភិបាល​ស្រប​ច្បាប់​ ព្រ​មទាំង​បន្ត​ការ​អនុវត្ត​វិធាន​ការ​សុខាភិបាល ​និង​ការ​ចាក់​វ៉ាក់​សាំង​បង្ការ​ជម្ងឺកូវីដ​១៩​ ដូស​ជម្រុញ ​ជា​បន្ត​បន្ទាប់​ទៀត ​ដើម្បី​បង្កើន​ភាព​ស៊ាំ​សង្គម​ និង​រស់​នៅក្នុង​គន្លង​នៃ​ប្រក្រតី​ភាព​ថ្មី​ ៕


អត្ថបទថ្មីៗ

សេចក្តីប្រកាស

សារជូនពរ

វីដេអូ