ព័ត៌មាន

ឯកឧត្តម​ ​ម៉ឹង ​​សំផន ​ដឹក​នាំ​កិច្ច​ប្រជុំ​បូក​សរុប​ការងារ​ភស្តុភារ​ហិរញ្ញវត្ថុ​ឆ្នាំ​២០២២ ​និង​ទិស​ដៅ​ឆ្នាំ​២០២៣​
នាយកដ្ឋានព័ត៌មាន(៣)
1309
2994 ឯកឧត្តម​ ​ម៉ឹង ​​សំផន ​ដឹក​នាំ​កិច្ច​ប្រជុំ​បូក​សរុប​ការងារ​ភស្តុភារ​ហិរញ្ញវត្ថុ​ឆ្នាំ​២០២២ ​និង​ទិស​ដៅ​ឆ្នាំ​២០២៣​

      នា​ព្រឹក​ថ្ងៃ​ទី​០១ ​ខែ​ធ្នូ ​ឆ្នាំ​២០២២ ​នៅ​ទីស្តីការ​ក្រសួង​ការ​ពារ​ជាតិ ​បាន​បើក​កិច្ច​ប្រជុំ​បូក​សរុប​ការងារ​ភស្តុភារ​ហិរញ្ញវត្ថុ ​ឆ្នាំ​២០២២ ​និង​ទិស​ដៅ​ឆ្នាំ​២០២៣​ ផ្សារ​ភ្ជាប់​ជា​មួយ​មុខ​ងារ​ក្នុង​ប្រព័ន្ធ ​FMIS តាម​កម្មវិធី​កែទម្រ​ង់ការ​គ្រប់​គ្រង​ហិរញ្ញវត្ថុ​សាធារណៈ ​ក្រោម​អធិបតី​ភាព​ ឯកឧត្ដម ​នាយ​ឧត្តម​សេនីយ៍ ​ម៉ឹង សំផន រដ្ឋ​លេខា​ធិការ​ ទទួល​បន្ទុក​ការងារ​ភស្តុភារ​ហិរញ្ញវត្ថុ ជា​ប្រធាន​ក្រុម​ការងារ​កែ​ទម្រង់​ការ​គ្រប់​គ្រង​ហិរញ្ញ​វត្ថុ​សាធារណៈ ​និង​ជា​ប្រធាន​ក្រុម​ការ​ងារ​អនុវត្ដ​ គម្រោង​ប្រព័ន្ធ​បច្ចេក​វិទ្យា​ព៌ត​មាន​ សម្រាប់​ការ​គ្រប់​គ្រង​ហិរញ្ញ​វត្ថុ​សាធារណៈ ក្រសួ​ង​ការ​ពារ​ជាតិ​។

        ឧត្តម​សេនីយ៍​ឯ​ក លី កុសល អគ្គ​នាយក​ស្តី​ទី​ អគ្គនាយក​ដ្ឋា​ន​ភស្តុភារ​ ហិរញ្ញ​វត្ថុ ​ក្រសួង​ការ​ពារ​ជាតិ ​បាន​ឲ្យដឹង​ថា ​ដើម្បី​អនុវត្ត​ការ​កែទ​ម្រង់​ឲ្យ​កាន់​តែ​ស៊ី​ជម្រៅ ​អគ្គនាយក​ដ្ឋាន​ភស្តុភារ​ ហិរញ្ញ​វត្ថុ​ ក្រសួង​ការ​ពារ​ជាតិ ​បាន​រៀប​ចំ​កម្ម​វិធី​នេះ​ឡើង​ ដើម្បី​បង្ហាញ​កាលា​នុវត្តភាព​ប្រចាំ​ឆ្នាំ ​ចែក​រំលែក​ពត៌​មាន​បទ​ពិសោធន៍​ថ្មីៗ ​និង​ស្វែង​យល់​ពី​គ្នា​ទៅវិ​ញទៅ​ម​ក អំពី​ការ​កំណត់​ និង​ការ​ប្រើប្រាស់​ថវិកា​សមស្រប​ក្នុង​កា​រចូល​រួម​កម្ម​វិធី​កែ​ទម្រង់​គ្រប់​គ្រង​ហិរញ្ញ​វត្ថុ​សាធារណៈ ​ឈាន​ទៅ​ដល់​ការ​អនុវត្ត​លទ្ធ​កម្ម​ដំណាក់​កាល​ទី៤​រប​ស់​រាជ​រដ្ឋាភិបាល ​ដែល​ជាប្រធាន​បទ​គន្លឹះ​សម្រាប់​ការ​ធានា​ជោគ​ជ័យ​នូវ​ការ​ងារ​កែទ​ម្រង់​ ដោយ​ផ្តើម​ចេញ​នៃ​ការ​បណ្តុះ​បណ្តាល​ឆន្ទៈ ​ការ​ប្តេជ្ញា​ និង​កែ​ទម្រង់​ ការ​បង្កើត​ភាព​ជា​ម្ចាស់ ​និង​ការបំពាក់​បំប៉ន​ស្មារតី​ នៃ​ភាព​ចាំបា​ច់​ និង​បន្ទាន់​ក្នុងការងារ​ហ្វឹកហ្វឺន​រៀន​សូត្រ​តាម​បែប​ផែន​ប្រព័ន្ធ​ថ្មី​ FMIS ​ឲ្យ​កាន់​តែ​មាន​ភាព​ល្អ​ប្រសើរ​ឡើង​ថែ​ម​មួយ​កម្រិត​ទៀត​ ដើម្បី​បង្កើន​សមត្ថ​ភាព​ពេញ​លេញ​ក្នុង​ការ​អនុវត្ត​ការ​ងារ​ប្រចាំ​ថ្ងៃ​។​ ចំពោះ​ការងារ​ភស្តុភារ​ប្រចាំ​ឆ្នាំ​នីមួយៗ ​បែរ​ទៅ​អនុវត្ត​តាម​កម្ម​វិធី​យ៉ាង​សកម្ម​ដាក់​ដេញ​ថ្លៃ​ទំនិញ​សម្ភារៈ​ស្បៀង​អាហារ​ និង​បរិក្ខា​ឱសថ​ បរិក្ខាពេទ្យ​ ប្រេង​ឥន្ទនៈ ​និង​សម្ភារៈ​មួយ​ចំនួន​ទៀត​ ដោយ​ប្រើប្រាស់​កញ្ចប់​ថវិកា​ដែល​ក្រសួង​សេដ្ឋកិច្ច​ហិរញ្ញវត្ថុ​បាន​កំណត់​។​ ឧត្តមសេនីយ៍ឯ​ក លី កុសល បាន​បញ្ជាក់​ថា ​ពេលនេះ​ការងារ​ភស្តុភារ​ហិរញ្ញវត្ថុ​ ត្រូវ​តែ​មាន​ការ​ផ្សារ​ភ្ជាប់​គ្នា​ទៅ​វិញ​ទៅម​ក​ដោយ​មិន​អាច​កាត់​ផ្តាច់​បាន​ដោយ​គ្មាន​ថវិកា​ ទំនិញ​សម្ភារៈ​ទាំង​អស់​នោះ​ក៏​មិនអាច​ទិញ​បាន​ដែ​រ ហើយ​ការ​ប្រើប្រាស់​ទាម​ទារ​ឲ្យ​មាន​ការ​ពិនិត្យ​គម្រោង​សេចក្តី​ត្រូវ​ការ​ជា​មុន​សិន ​ទើប​ធ្វើ​ការ​បើកផ្តល់​និង​ទូទាត់​មក​វិញ​តាម​នីតិវិធី​ជំនាញ​ដែល​បាន​កំណត់​។

        កិច្ច​ប្រជុំ​ក៏​បាន​តាម​ស្តាប់​នូវ​លទ្ធផ​ល​ការ​ងារ​ភស្តុភារ​ហិរញ្ញវត្ថុ​ ឆ្នាំ​២០២២​ និងទិ​ស​ដៅ​ឆ្នាំ​២០២៣ ​និង​បញ្ហាប្រឈម​មួយ​ចំនួន​នៃ​ជំនាញ​ការងារ​ភស្តុភារ​ហិរញ្ញវត្ថុ​ នៅ​តាម​បណ្តា​ប្រភេទ​ទ័ព​ មាន៖​ កង​ទ័ព​ជើង​គោក​ ជើងទឹក​ និង​កង​ទ័ព​ជើង​អាកាស ​និង​តាម​បណ្តា​យោធ​ភូមិ​ភាគ​ផង​ដែរ​។

       ​នាយ​ឧត្តម​សេនីយ៍ ម៉ឹង សំផន បាន​មាន​ប្រសាសន៍​ថា​ កន្លង​មក​នេះ ​ដោយ​សា​រមាន​វិបត្តិការ​រាត​ត្បា​តនៃ​ជង្ងឺ​កូវីដ​-​១៩ បា​ន​ធ្វើ​ឲ្យ​មាន​ការ​ខកខា​ន​នៃ​ការ​ជួប​ប្រជុំ​ជំនាញ​ការ​ងារ​ភស្តុភា​រ​ហិរញ្ញវត្ថុ​ ក្រសួង​ការ​ពារ​ជា​តិ ក្នុង​រយៈពេល​ជា​ង២​ឆ្នាំ​កន្ល​ង​មក​នេះ។​ ហើយ​នេះ​គឺជា​ឱកាស​ដ៏​ល្អ​ ដែល​យើង​បាន​មក​ជួប​ជុំ​គ្នា​នៃ​បណ្តា​ស្ថាប័ន​កង​ឯកភា​ពជំនាញ​ការងា​រភស្តុភារ​ហិរញ្ញវត្ថុ ​នៅ​ទូទាំង​ ខ.ភ.ម​ ដើម្បី​មាន​ភាព​ងាយ​ស្រួល ​និង​ក្តាប់​បាន​នូវការ​លំបាក​នានា​ ជុំវិញ​ការងារ​ចិញ្ចឹម​ទ័​ព ការ​គ្រប់​គ្រង​សម្ភារៈ​បច្ចេក​ទេស​ នៃ​បណ្តា​កង​ឯក​ភាព​នានា ​ធ្វើ​គម្រោង​រាយ​ការណ៍​ទៅ​ថ្នាក់​លើ​ ដើម្បី​បំពេញ​កង្វះ​ខាត​ទាំង​នេះ។​ ឯកឧត្តម​ បាន​បញ្ជាក់ថា​ សំខាន់​ណាស់​ នៅក្នុង​កង​ទ័​ពប្រសិន​បើ​កិច្ច​ការងារ​ភស្តភារ​ហិរញ្ញវត្ថុ​ខ្សោយ​ហើយ​ នោះ​កិច្ច​ការ​ប្រតិបត្តិការ​ក៏​មិន​ដើរ​បា​នដែរ ព្រោះ​ការងារ​ភស្តុភារ​ហិរញ្ញវត្ថុ​ គឺ​ជា​ការ​ងារ​ធានា​ការ​ចំណាយ​ផ្សេងៗ​ទាំង​អស់​។

        នាយ​ឧត្តម​សេនីយ៍ ម៉ឹង សំផន បាន​លើក​ឡើងថា​ កម្ពុជា​ពិត​ជា​មាន​ភព្វ​សំណាង​ ដែល​សម្តេច​អគ្គ​មហាសេនា​បតី​តេជោ ​ហ៊ុន សែន នាយក​រដ្ឋមន្ត្រី នៃ​ព្រះ​រាជាណាចក្រ​កម្ពុជា ​និង​សម្តេច​កិត្តិ​ព្រឹទ្ធ​បណ្ឌិត​ ប៊ុន រ៉ានី ​ហ៊ុន​សែន ​ជា​អគ្គភស្តុភារ​ជាន់​ខ្ពស់​នៃ​ ខ.ភ.ម ​ហើយ​បាន​មាន​ការ​យក​ចិត្ត​ទុក​ដាក់​យ៉ាង​ខ្លាំង​ចំពោះសុ​ខ​ទុក្ខកង​ទ័​ព តែង​តែ​បាន​ជួយ​ផ្គត់​ផ្គង់​ជា​និច្ច​កាល​មក​ដល់​កង​ទ័ព​ នៅ​ក្នុង​ពេល​រដូវ​រងារ​បាន​បើក​ផ្តល់​អាវ​រងារ ​ពេល​រដូរ​ធ្លាក់​ភ្លៀង​ផ្ត​ល់​អាវ​ភ្លៀង ​ហើយ​បាន​ផ្តល់​ដី​សម្បទាន​សង្គម​កិច្ច​ និង​ផ្ទះ​ជា​ច្រើន​ខ្នង​មក​ដល់​គ្រួសារ​កង​ទ័ព​ អតីត​យុធ្ធជន​ និង​បាន​ផ្ត​ល់ប្រាក់​ឧបត្ថម្ភ​លើក​ទឹក​ចិត្ត​ជា​ច្រើន​ទៀត​មក​ដល់​ ខ.ភ.ម ​ទាំង​ក្នុង​បុណ្យ​ចូល​ឆ្នាំ​ថ្មី​ប្រពៃណី​ជាតិ​ និ​ងបុណ្យ​ភ្ជុំ​បិណ្ឌ​ផង​ដែរ​។​

       ក្នុង​នាមថ្នាក់​ដឹក​នាំ​ក្រសួង​ការ​ពារ​ជាតិ,​ នាយ​ឧត្តម​សេនីយ៍ ​ម៉ឹង សំផន បាន​ថ្លែង​នូវ​ការ​កោត​សរសើរ​ និង​វាយ​តម្លៃ​ខ្ព​ស់ចំពោះ​នាយ​ទាហាន ​និង​ពល​ទាហាន ​ជំនាញ​ភស្តុភារ​ហិរញ្ញវត្ថុ​ ដែល​បាន​ខិត​ខំ​បំពេញ​តួនាទី​ភារកិច្ចនា​ពេល​កន្ល​ងមក​ ហើយ​និង​បាន​ផ្តាំ​ផ្ញើឲ្យ​បន្ត​ស្នាដៃ​បំពេញ​ភារកិច្ច​ការងារ​ជា​បន្ត​ទៅ​ទៀត​ ដើម្បី​ ខ.ភ.ម​ លើ​ការ​ការពារ​សុខ​សន្តិភាព​ និង​ការពារ​អធិប​តេយ្យ​បូរណ​ភាព​ទឹក​ដី​ និង​ប្រជាជន​កម្ពុជា​ ៕