ព័ត៌មាន

អដ្ឋិ​ធាតុ​យុទ្ធជន​កង​កម្លាំង​ប្រដាប់​អាវុធ​សាមគ្គី​សង្គ្រោះ​ជាតិ​កម្ពុ​ជា ចំនួន​ ៤៩​​រូប​ បាន​ធ្វើ​មាតុ​ភូមិនិវត្តន៍​ពី​ឡុង​យ៉ាវ ​ប្រទេស​វៀត​ណាម​ ម​ក​ដល់​តំបន់​ប្រវត្តិ​សាស្ត្រ​យោធា​កោះ​ថ្ម ​អិច ​១៦
នាយកដ្ឋានព័ត៌មាន(៣)
1084
2993 អដ្ឋិ​ធាតុ​យុទ្ធជន​កង​កម្លាំង​ប្រដាប់​អាវុធ​សាមគ្គី​សង្គ្រោះ​ជាតិ​កម្ពុ​ជា ចំនួន​ ៤៩​​រូប​ បាន​ធ្វើ​មាតុ​ភូមិនិវត្តន៍​ពី​ឡុង​យ៉ាវ ​ប្រទេស​វៀត​ណាម​ ម​ក​ដល់​តំបន់​ប្រវត្តិ​សាស្ត្រ​យោធា​កោះ​ថ្ម ​អិច ​១៦

       បន្ទាប់​ពី​ក្រុមការងារ​បច្ចេកទេស នៃ​ប្រទេស​ទាំង​ពីរ​កម្ពុជា​ វៀត​ណាម ​បាន​ធ្វើ​ការ​ជីក​គាស់​បើក​ផ្នូរ​ រើស​យក​អដ្ឋិធាតុ ​យុទ្ធជន​កង​កម្លាំង​ប្រដាប់​អាវុធ​សាមគ្គី​សង្គ្រោះ​ជាតិ​កម្ពុជា​ ចំនួន ​៤៩​រូប​ ដែល​បាន​បញ្ចុះ​នៅ​ឡុង​យ៉ាវ​ ខេត្ត​ដុង​ណាយ​ សាធារណ​រដ្ឋ​សង្គម​និយម​វៀត​ណាម ​អស់​រយៈ​ពេល​ ៥ ​ថ្ងៃ ​រួច​មក​ នៅ​ព្រឹក​ថ្ងៃ​ទី​ ០១​ ខែធ្នូ​ ឆ្នាំ​២០២២ ​អដ្ឋិធាតុ​យុទ្ធជ​ន កង​កម្លាំង​ប្រដាប់​អាវុធ​សាមគ្គី​សង្គ្រោះ​ជាតិ​កម្ពុជា​ទាំង​៤៩​ រូប​ ត្រូវ​បាន​រៀប​ចំ​មាតុភូមិ​និវត្តន៍​ ពី​សាធារណរដ្ឋ​សង្គម​និយម​វៀត​ណាម​ មក​កាន់​ កម្ពុជា​ វិញ​នៅ​តំបន់​ប្រវត្តិសាស្ត្រយោធា​កោះ​ថ្ម អិច​ ១៦​ ក្នុង​ស្រុក​មេមត់ ​ខេត្ត​ត្បូង​ឃ្មុំ​។ 

       ពិធី​ផ្ទេរ​ប្រគល់​អដ្ឋិធាតុ យុទ្ធជន​កង​កម្លាំង​ប្រដាប់​អាវុធ​សាមគ្គី​សង្គ្រោះ​ជាតិ​កម្ពុជា​ ទាំង​ ៤៩​ រូប បានប្រព្រឹត្ត​ទៅ​ក្រោម​អធិប​តី​ភាព​ នាយ​ឧត្តម​សេនីយ៍​ សៅ សុខា អគ្គ​មេ​បញ្ជាការ​រង​ នៃ​កង​យោធ​ពល​ខេមរ​ភូមិន្ទ មេ​បញ្ជាការ​ កង​រាជ​អាវុធ​ហត្ថ​លើ​ផ្ទៃ​ប្រទេស​ និង​ជា​ប្រធាន​ក្រុម​ការងារ​បច្ចេក​ទេស​គណៈ​កម្មការ​អន្ត​រ​ក្រសួង​ដើម្បី​រៀបចំ​មាតុ​ភូមិនិវត្ត​ន៍​អដ្ឋិធាតុ​យុទ្ធជ​នកង​កម្លាំង​ប្រដាប់​អាវុធ​សាមគ្គី​សង្គ្រោះ​ជាតិ​កម្ពុជា​ ពី​សាធារណ​រដ្ឋ​សង្គម​និយម​វៀត​ណាម​ និង​ឧត្តមសេនីយ៍​ឯក​បំរុង ដូ កាំង អនុ​ប្រធាន ​អគ្គ​ស្នង​ការ​នយោ​បាយ​ និង​ជា​តំណាង​ក្រសួង​ការ​ពារ​ប្រទេស​វៀត​ណាម​។

        នៅ​ក្នុង​ពិធី​ផ្ទេរ​ប្រគល់​ ឧត្តម​សេនីយ៍​ឯក​បំរុង​ ដូ កាំង បាន​សំ​ដែង​ការ​កោត​សរសើរ​ដល់​ក្រុម​ការ​ងារ​បច្ចេកទេស​ នៃ​ប្រទេស​ទាំង​ពីរ​កម្ពុជា​ វៀត​ណាម​ដែល​បាន​ខិត​ខំ​ប្រឹង​ប្រែង​បំពេញ​ការ​ងារ​ប្រកប​ដោយ​ស្មារតី​ទទួល​ខុស​ត្រូវ​ខ្ពស់ ​និង​ទទួល​បាន​លទ្ធផល​ប្រកប​ដោយ​ជោគ​ជ័យ​។

        នាយ​ឧត្តម​សេនីយ៍ សៅ សុខា បាន​ចាត់​ទុក​ពិធី​ផ្ទេរ​ប្រគល់​ពេល​នេះ​ គឺ​ជា​ព្រឹត្តិការ​ប្រវត្តិ​សាស្ត្រ​ដែល​គណៈ​កម្មការ​អន្ត​រ​ក្រសួង​ នៃ​ព្រះ​រាជាណាចក្រ​កម្ពុជា ​សហការ​ជា​មួយ​ភាគី​មិត្ត​វៀត​ណាម​ រៀប​ចំ​ពិធី ​ប្រគល់​-​ទទួលអដ្ឋិធាតុ​យុទ្ធជន​កង​កម្លាំង​ប្រដាប់​អាវុធ​សាមគ្គី​សង្គ្រោះ​ជាតិ​កម្ពុជា​ ចំនួន​៤៩​រូប​ ដែល​ធ្វើ​មាតុ​ភូមិ​និវត្តន៍​ពីប្រទេស​វៀត​ណាម​ មក​កាន់​កម្ពុជា​វិញ​។ ឆ្លៀត​ក្នុង​ឱកាស​នេះ ​ឯកឧត្តម ថ្លែង​អំណរគុ​ណ​ចំពោះ ​ឧត្តមសេនីយ៍​ឯក​បម្រុង ​ដូ កាន់ អនុប្រធាន​អគ្គស្នង​ការ​នយោ​បាយ ​នៃ​កង​ទ័ព​ប្រជាជន​វៀត​ណាម ​តំណាង​ក្រសួង​ការ​ពារប្រទេស​ នៃ​សាធារណ​រដ្ឋ​សង្គ​ម​និយម​វៀត​ណាម​ ព្រម​ទាំង​ប្រតិភូ​អម​ដំ​ណើរ ដែល​បាន​អញ្ជើញ​ចូល​រួម ​ក្នុង​ពិធី​ប្រគល់​-​ទទួល ​អដ្ឋិធាតុ​យុទ្ធជន​កង​កម្លាំង​ប្រដាប់​អាវុធ​សាមគ្គីស​ង្គ្រោះ​ជាតិ​កម្ពុជា​ ជា​ប្រវត្តិសាស្ត្រ​នានា​ពេលនេះ​។​ ឯកឧត្តម សៅ សុខា បានបញ្ជាក់​ថា​៖​ អនុវត្តតាម​អនុសាសន៍​ណែ​នាំដ៏​ខ្ពង់​ខ្ពស់​របស់​ សម្តេច​តេជោ ​ហ៊ុន សែន នាយ​ក​រដ្ឋមន្ត្រី​ និងវ​ត្តមានឯ​កឧត្តម​ ផាម មិញជីញ នាយក​រដ្ឋមន្ត្រី​ នៃ​សាធារណ​រដ្ឋ​សង្គម​ និយ​ម​វៀត​ណាម​ នៅ​ក្នុង​ពិធី​ប្រារព្ធ​ខួបលើ​ក​ទី​៤៥ ​នៃ​ទិវាចងចាំ​ដំណើរ​ឆ្ពោះទៅផ្ដួល​រំលំរប​ប​ប្រល័យ​ពូជ​ សាសន៍​ ប៉ុល ​ពត​ កាល​ពី​ថ្ងៃទី២០​ ខែ​មិថុនា ​ឆ្នាំ​២០២២ នៅ​តំបន់ប្រវត្តិសាស្ត្រ​យ៉ាត់​តេ​ជោ​កោះ​ថ្ម x16​ នេះ ​សម្តេច​តេជោ ​នាយករដ្ឋមន្ត្រី បាន​រំឭក​ឡើងវិ​ញពី​ប្រវត្តិកាល​ តស៊ូ​យ៉ាង​លំបាក​ ក្នុ​ងកា​រប្រយុទ្ធ​ប្រឆាំងនឹ​ង​ របប​ប្រល័យ​ពូជ​សាសន៍ ​ប៉ុល ពត ដើម្បី​សង្គ្រោះ​ជាតិ​ ប្រជាជន​កម្ពុជា​ឱ្យរួចផុតពី​ការ​សម្លាប់​យ៉ាង​អយុត្តិធម៌​បំផុត ​ពី​ពួក​ខ្មែរ​ក្រហម ​ទើប​មាន​យុទ្ធជន​ក​ងកម្លាំង​ប្រដាប់​អាវុធ​សាមគ្គី​សង្គ្រោះ​ជាតិ​កម្ពុជា​ ពលី​ជីវិត​ ចំនួន​៤៩​ រូប​នេះ​។ សព​យុទ្ធជនទាំង​៤៩​រូប ​ត្រូវ​បាន​អនុញ្ញាត​ពី​បក្ស ​រដ្ឋាភិបាល ក្រសួងកា​រពារ​ប្រទេស​វៀតណាម​រៀប​ចំ​បញ្ចុះ​នៅ​វិមាន​សពយុទ្ធជន​ក្នុង​តំបន់​ឡុងយ៉ា​វ ​ខេត្ត​ដុង​ណាយ​ ប្រទេស​វៀត​ណាម​។ ទន្ទឹ​ម​នេះ ​សម្តេច​​តេជោ ​នាយក​រដ្ឋមន្ត្រី​ ​ក៏​បាន​ប្រគល់​ភារកិច្ច​ជូន​ សម្តេច​ពិជ័យ​សេនា ទៀ បាញ់ ឧបនាយក​រដ្ឋមន្ត្រី ​រដ្ឋមន្ត្រី​ ក្រសួង​ការ​ពា​រជាតិ​ ពិ​ចារណា​សហការ​ជា​មួយ​មិត្ត​វៀត​ណាម​ រៀប​ចំ​ធ្វើ​មាតុភូមិ​និវត្ត​ន៍​អដ្ឋិធាតុ​យុទ្ធ​ជន​ទាំង​៤៩​ រូប​ ម​កកាន់​កម្ពុជា​វិញ​។

​         ក្នុ​ង​នាម​រាជ​រដ្ឋាភិបាល ក្រសួង​ការពារ​ជាតិ​ នៃ​ព្រះ​រាជាណាចក្រ​កម្ពុជា​ ឯកឧត្ដម សៅ សុខា បាន​​ថ្លែង​អំណរ​គុណ​យ៉ាង​ជ្រាល​ជ្រៅ​ចំពោះ​បក្ស ​រដ្ឋា​ភិបាល ​និង​ក្រសួង​ការពា​រ​ប្រទេស​វៀត​ណាម​ ដែល​បាន​ផ្តល់​ ទី​តាំង​សម្រាប់​បញ្ចុះ​សព​យុទ្ធជន​ កង​កម្លាំង​ប្រដាប់​អាវុធ​សាមគ្គី​សង្គ្រោះ​ជាតិ​កម្ពុជា​ទាំង​៤៩​រូប​ និង​បាន​កសាង​ផ្នូរ​សមរម្យ​ ថែ​ទាំ​ដោយ​យក​ចិត្ត​ទុក​ដាក់​ពី​សំណាក់​អង្គភាព​កង​ពល​ធំ​លេខ​៣០២​ អស់​រយៈពេ​ល​៤៥ ​ឆ្នាំ​កន្លង​មក​ ហើយ​នៅ​ក្នុង​រយៈ​ពេល​ប៉ុន្មា​ន​ថ្ងៃ​នេះ​ ក្រុម​ការងារ​ភាគី​វៀតណាមបា​ន​សហការ​យ៉ាង​ជិ​តស្និទ្ធ​ ជា​មួយ​ក្រុម​ការងារ​បច្ចេក​ទេសក​ម្ពុជា​ក្នុង​ការបើ​ក​ផ្នូរ​លាង​សម្អាត​ និង​វេច​ខ្ចប់​អដ្ឋិធាតុ មុ​ន​ពេល​ធ្វើ​មាតុភូមិ ​និវត្តន៍​នាថ្ងៃ​នេះ។​

         ពីធី​ដង្ហែ​អដ្ឋិធាតុ​នា​ពេល​នេះ​ បាន​ប្រព្រឹត្ត​ទៅ ​ស្រម​ទៅ​តា​មប្រពៃណី​ព្រះ​ពុទ្ធ​សាសនា និ​ង​ពិធី​ការ​កង​​ទ័ព​ ដោយ​បាន​ដង្ហែរ​ឆ្ល​ងកាត់​ព្រំ​ដែន​កម្ពុជា​ វៀត​ណាម​ ចូល​មក​តំបន់​ប្រវត្តិ​សាស្ត្រ​យោធា​កោះថ្ម​ អិច ​១៦​ ក្នុ​ង​ឃុំ​ទន្លូង​ ស្រុក​មេម​ត់​ ខេត្ត​ត្បូង​ឃ្មុំ​ ៕


អត្ថបទថ្មីៗ

សេចក្តីប្រកាស

សារជូនពរ

វីដេអូ