ព័ត៌មាន

កិច្ច​ប្រជុំ​គណៈ​កម្មាធិការ​ព្រំ​ដែន​ទូទៅ​(GBC​)កម្ពុជា ​ថៃ ​លើក​ទី​១៥​​
នាយកដ្ឋានព័ត៌មាន(៣)
1153
2992 កិច្ច​ប្រជុំ​គណៈ​កម្មាធិការ​ព្រំ​ដែន​ទូទៅ​(GBC​)កម្ពុជា ​ថៃ ​លើក​ទី​១៥​​

        កិច្ច​ប្រជុំគណៈ​កម្មាធិការ​ព្រំ​ដែ​នទូទៅ ​ជី ប៊ី ស៊ី ( GBC )កម្ពុជា ​ថៃ ​លើកទី​​១៥​ ត្រូវ​បាន​ប្រារព្ធ​ធ្វើ​នៅ ​សណ្ឋាគារ ​អាធិននី ​ទីក្រុង​បាងកក​ ប្រទេស​ថៃ រសៀល​ថ្ងៃទី​២៥​ ខែ​វិច្ឆិកា​ ឆ្នាំ​២០២២ ​ក្រោម​អធិបតី​ភាព​ សម្តេច​ពិជ័យ​សេនា​ ទៀ បាញ់ ឧបនាយក​រដ្ឋមន្ត្រី​ រដ្ឋមន្ត្រី​ក្រសួង​ការ​ពារ​ជាតិ​ និង​ជា​ប្រធាន​គណៈ​កម្មាធិការ​ព្រំ​ដែន​ទូទៅ ​(GBC)​កម្ពុជា​ ថៃ ​និង​ឯកឧត្តម ​នាយ​ឧត្តម​សេនីយ៍ ​ប្រាវីត វង្សសុវណ្ណ ឧបនាយក​រដ្ឋមន្រ្តី​ថៃ​ និង​ជា​ប្រធាន​គណៈ​កម្មការ​ព្រំដែន​ទូទៅ ​(GBC ) ថៃ ​កម្ពុជា​។

        ថ្លែង​បើក​កិច្ច​ប្រជុំ ​ឯកឧត្តម ប្រាវីត វង្សសុវណ្ណ បាន​សម្តែង​នូវ​សេចក្តី​សោម​នស្ស​រីក​រាយ​ ដែល​បាន​ធ្វើ​ជា​សហប្រធាន​ជា​មួយ​ សម្តេច​ពិជ័យ​សេនា​ ទៀ បាញ់ សារ​ជាថ្មីម្ត​ងទៀត​ក្នុង​កិច្ច​ប្រជុំ​គណៈកម្មាធិការ​ព្រំ​ដែន​ទូទៅ ​ថៃ-កម្ពុជា​ លើក​ទី​១៥​​។ ឯកឧត្តម ​មាន​ជំនឿ​ជឿ​ជាក់​ថា​៖​ ដោយ​មាន​មេត្រី​ភាព ​មិត្ត​ភាព ​និង​ការ​ប្តេជ្ញា​ចិត្ត​ស្មោះ​ត្រង់​របស់​ភាគី​ទាំង​ពីរ​ ធ្វើ​ឱ្យកិច្ច​ប្រជុំ ​នា​លើក​នេះ​បាន​សម្រេច​ជោគ​ជ័យ​ប្រកប​ដោយ​ភាព​រលូន​ដូច​រៀង​រាល់​លើក​កន្លង​មក​ផង​ដែរ​​។ ដោយ​មាន​ការទំនាក់​ទំនង​ត​ភ្ជាប់​ កិច្ច​សហប្រតិបត្តិការ​ ដែល​មា​នស្រាប់​រួម​ទាំង​ការ​អភិវឌ្ឍ​ឱ្យ​កើត​ឡើង​នូវ​លទ្ធផល​ជាក់​​ស្ដែង​ទ្វេ​ឡើង​ថែម​ទៀត​ បាន​បង្ក​លក្ខណៈ ​ងាយ​ស្រួល​តាម​តំបន់​ព្រំ​ដែន​នៃ​ប្រទេស​ទាំង​ពីរ​ជា​ព្រំ​ដែន​សន្តិភាព​ មិត្តភាព ​និង​កិច្ច​សហប្រតិបត្តិការ​បាន​ល្អ​ប្រសើរ​ និង​មាន​ភាព​ជាក់​លាក់​រវាង​ប្រទេស​ទាំង​ពីរ​។​

         ថ្លែង​សន្ទរក​ថា​បើក​កិច្ច​ប្រជុំ​នា​ឱកា​ស​នោះ​ដែល​ សម្ដេច​ពិជ័យ​សេនា ​ទៀ បាញ់ ក្នុង​នាម​ក្រសួង​ការពារ​ជាតិ​ បាន​ថ្លែង​អំណរ​គុណ​ដល់​ឯកឧត្ដម​ ប្រាវ៉ិត វង្សសុវណ្ណ ដែល​បាន​ចំណាយ​​ពេល​វេលា​ចូល​រួម ​កិច្ច​ប្រជុំ​ចង្អៀត​រដ្ឋមន្ត្រី​ការពារ​ជាតិ​អាស៊ាន​ និង​កិច្ច​ប្រជុំ​រដ្ឋមន្ត្រី​ការ​ពារ​ជាតិ​អាស៊ាន​បូក​លើក​ទី​៩​ នៅ​ខេត្ត​សៀម ​នា​ពេល​កន្លង​ទៅ​ថ្មីៗ​នេះ។​ សម្តេច​ពិជ័យ​សេនា ​បាន​បញ្ជាក់​ថា៖ កិច្ច​ប្រជុំ​គណៈកម្មាធិការ​ព្រំ​ដែន​ទូទៅ ​(GBC) នៃ​ប្រទេស​ទាំង​ពីរ​ដែល​ធ្វើ​ឡើង​ក្នុង​ពេល​នេះ ​ពិត​ជា​មាន​សារៈ​សំខាន់​ខ្លាំ​ង​បំផុត ​ក្នុ​ងកា​រពង្រឹង​ចំណង​សាមគ្គី​ភាព ​មិត្តភាព​ សន្តិភាព ​បង្កើន​កិច្ច​សហប្រតិបត្តិការ​លើ​គ្រប់​វិស័យ​ ដើម្បី​អនុវត្ត​បន្ត​លើ​កិច្ច​ព្រ​ម​ព្រៀង​នានា​តាម​ខ្លឹម​សារ​ (MOU) នៃ (GBC) ឱ្យកាន់​តែមាន​ប្រសិទ្ធ​ភាព​ខ្ពស់​បន្ថែម​ទៀត ​និង​ដើម្បី​បន្ថែម​នូវ​ចំនុច ​សំខាន់ៗ​មួយ​ចំនួន​ស្រប​តាម​កា​រផ្លាស់​ប្ដូរ​ នៃ​បរិប​ទ​ព្រឹត្តិការណ៍​នានា ​ក្នុង​ពិភព​លោ​ក និ​ងក្នុង​តំបន់ ​ជាពិសេស​លើ​បញ្ហា​បម្រែ​បម្រួល​អាកាស​ធាតុ ​ការ​រក្សា​សន្តិសុខ​ ការ​ចូល​រួម​ទប់​ស្កាត់​ គ្រោះ​មហន្តរាយ​ ដែល​អាច​នឹងកើត​មាន​ឡើង​ជាយ​ថាហេតុពី​ធម្មជាតិ​។​

         សូម​បញ្ជាក់​ថា៖ កិច្ច​ប្រជុំ​គណ:កម្មាធិការ​ព្រំដែ​ន​ទូទៅ​(GBC​)​កម្ពុជា​ ថៃ ​លើក​ទី​​១​ បាន​ដំណើរ​ការ​ទៅ​តាម​កិច្ច​ព្រម​ព្រៀង ​ស្តី​ពី​កិច្ច​សហប្រតិបត្តិការ ​តាម​បណ្ដោយ​ព្រំដែន​ រវា​ង​ព្រះ​រាជាណាចក្រ​ថៃ​ និង​ព្រះ​រាជាណា​ចក្រ​កម្ពុជា ​ដែលមា​ន​គោល​បំណង​ ដើម្បី​ជម្រុញ​កិច្ច​សហប្រតិបត្តិការ​លើ​វិស័យ​សន្តិសុខ ​ស្ថេរភាព​ សុវត្ថិភាព ​តាម​បណ្តោយ​ព្រំ​ដែន​ ព្រ​ម​ទាំង​ការ​ពង្រឹង​សម្ព័ន្ធ​មេត្រី​ភាព​រវាង​កងទ័​ព​ និង​កង​ទ័ព​ ជា​ពិសេស​អង្គភាព​ទទួល​បន្ទុក​កិច្ច​ការ​សន្តិសុខ​ ថៃ-កម្ពុជា ឲ្យ​កាន់​តែ​មាន​ភាព​ ជិត​ស្និទ​ទ្វេ​ឡើង​ថែម​ទៀត​។​ កិច្ច​ប្រជុំ​បាន​ផ្តោត​សំខាន់លើ​ កិច្ច​សហប្រតិបត្តិការ​នានា​ រវាង​កង​ទ័ព​ នៃ​ប្រទេស​ទាំង​ពីរ​ នៅ​គ្រប់​អង្គភាព​ពាក់​ព័ន្ធ​ ដែល​បា​នចេញ​ជា​លទ្ធផល​ និង​នាំ​ម​ក​នូវ ​សន្តិភាព ​ស្ថេរភាព ​សន្តិសុខ​តាម​បណ្ដោយ​ព្រំ​ដែន។​ ក្រៅ​ពី​នេះកិ​ច្ច​ប្រជុំ​បានទទួល​ស្គាល់​នូវ​វឌ្ឍនភាព ​លើកិ​ច្ច​សហប្រតិបត្តិការ​តាម​បណ្ដោយ​ព្រំ​ដែន​ ដែល​ជា​ផ្លែផ្កា​ ចេញពី​កិច្ច​ប្រជុំគណៈ​កម្មាធិការ ​ព្រំ​ដែន​ទូទៅ ​(GBC) កម្ពុជា​-​ថៃ ​លើក​ទី​១៤​ ដែល​បាន​ប្រារព្ធ​រៀប​ចំ​ឡើង ​នៅ​រាជ​ធានី​ ភ្នំពេញ ​ព្រះ​រាជាណាចក្រ​កម្ពុជា​ កាល​ពីថ្ងៃ​ទី​១​៤ ខែ​កុម្ភៈ​ ឆ្នាំ​២០១៩​ ដូច​ជា​ កិច្ច​សហប្រតិបត្តិការ​ស្ដីពី​ការ​ឆ្លង​ដែន​ (ការ​ធ្វើដំណើរ​ឆ្លង​ដែន​រប​ស់ពលករ) ​ការ​បោស​សម្អាត​គ្រាប់​មីន​​មិន​ទាន់​ផ្ទុះ​តាម​បណ្ដោយ​ព្រំ​ដែ​ន តាម​ការ​ឯកភាព​គ្នា ការពារ​ទប់​ស្កាត់ ​ការ​បង្ក្រាប​ការ​ជួញ​ដូរ​គ្រឿង​ញៀន ​ការ​បង្កើន​កិច្ច​សហប្រតិបត្តិការ​រវាង​អង្គភាព​ទទួល​ បន្ទុក​កិច្ច​ការ​សន្តិសុខ​ថៃ​ ជា​មួយ​យោធា ​និង​នគរបាល​កម្ពុជា​ ដែល​ឈរ​ជើង​តាម​​បណ្ដោយ​ព្រំដែន​ប្រទេស​ទាំង​ពីរ លើក​កម្ព​ស់​វិស័យ​ពាណិជ្ជកម្ម ​សុខាភិ​បាល​ ការ​ជួយ​សង្គ្រោះ​គ្រោះ​មហន្តរាយ​ ការ​លើក​កម្ពស់​ដល់​ជីវភាព​ការរស់​នៅ​ ការ​សិក្សា​ សាសនា និ​ងវ​ប្បធម៌ ​រប​ស់​ប្រជាជន​ដែល​រ​ស់នៅ​តាម​បណ្តោយ ​ព្រំ​ដែន​។ ភាគី​ក​ម្ពុ​ជា​នឹង​ធ្វើជាម្ចាស់​ផ្ទះ​កិច្ច​ប្រជុំ​គណៈកម្មាធិការ​ព្រំ​ដែ​នទូទៅ (GBC) កម្ពុជា-ថៃ លើកទី១៦ ក្នុងឆ្នាំ ​២០២៣​ ៕


អត្ថបទថ្មីៗ

សេចក្តីប្រកាស

សារជូនពរ

វីដេអូ