ព័ត៌មាន

ពិធីអបអរសាទរ ខួបលើកទី ៦៩ ទិវាកំណើត កងយោធពលខេមរភូមិន្ទ
នាយកដ្ឋានព័ត៌មាន(៣)
673
2981 ពិធីអបអរសាទរ ខួបលើកទី ៦៩ ទិវាកំណើត កងយោធពលខេមរភូមិន្ទ

       ក្រសួង​ការពារជាតិ បានប្រារព្ធមិទ្ទិញអបអរសាទរខួបអនុស្សាវរីយ៍លើកទី៦៩ ទិវាកំណើត កងយោធពលខេមរភូមិន្ទ ៩ វិច្ឆិកា ១៩៥៣ - ៩ វិច្ឆិកា ២០២២ នាព្រឹកថ្ងៃទី៨ ខែវិច្ឆិកា ឆ្នាំ២០២២ ស្ថិតក្រោមអធិបតីភាព សម្ដេច​ពិជ័យ​សេនា​ ទៀ បាញ់ ឧបនាយក​រដ្ឋមន្ត្រី រដ្ឋមន្ត្រីក្រសួង​ការពារ​ជាតិ​។

        នាយ​ឧត្តមសេនីយ៍ ​វង្ស ពិសេន អគ្គមេបញ្ជាការ នៃកងយោធពល​ខេមរភូមិន្ទ បានលើកឡើងពី​ប្រវត្តិនៃការបង្កើត ខភម ដោយបានបញ្ជាក់ថា៖ ថ្ងៃទី៩ ខែវិច្ឆិកា ១៩៥៣ - ថ្ងៃទី៩ ខែវិច្ឆិកា ២០២២ គឺជាទិវាប្រវត្តិ​សាស្ត្រ​ដែល ខ.ភ.ម ប្រារព្ធមិទ្ទិ​ញ​អបអរសាទរ​ខួប​អនុស្សាវរីយ៍ ដើម្បីរំលឹកឡើង​វិញ​នូវ​ប្រពៃណីដ៏ល្អ​ផូរផង់ ​គំរូវីរភាពដ៏អង់​អាច​ក្លាហ៊ាន ស្មារតីពលីកម្ម​ដ៏​ធំ​ធេង របស់យុទ្ធជនយុទ្ធនារី និងប្រជាជន​ជំនាន់​មុន ក្នុងបុព្វហេតុតស៊ូប្រឆាំង​សត្រូវឈ្លានពាន ដណ្តើមឯករាជ្យ​សង្គ្រោះជាតិមាតុភូមិ និង​ស្នាដៃរួមចំណែក​កសាងអ​ភិវឌ្ឍប្រទេសជាតិនៅគ្រប់ដំណាក់កា​ល​ជាប្រវត្តិសាស្ត្រ។ ឯកឧត្តម បានបញ្ជាក់ថា៖ ទិវាកំណើត កងយោធ​ពល​ខេមរភូមិន្ទ បានចា​ប់​បដិសណ្ឋិ​ដំបូង តាមអនុសញ្ញា​យោធា​បារាំង​ខ្មែរ ថ្ងៃទី៧មករា ឆ្នាំ១៩៤៦​។ ខ.ភ.ម បាន​បំពេញតួនាទីភារកិច្ចដោយ​ផ្សាភ្ជាប់នូវសាច់​ឈាម​ជា​មួយ​ប្រជាពលរដ្ឋ ហើយបាន​ធ្វើពលីកម្មគ្រប់បែបយ៉ាង ដើម្បី​បុព្វហេតុសន្តិភាព ឯករាជ្យ អធិបតេយ្យ​បូរណភាពទឹកដី ការពារ កសាង និង​អភិវឌ្ឍ​ប្រទេស​ជាតិ​។

        ចាប់ពីថ្ងៃទី​៧ ខែមករា ឆ្នាំ១៩៤៦ ដល់ថ្ងៃទី១ ខែកញ្ញា ឆ្នាំ១៩៥៣ គឺជាពេល​វេលា ចាប់ផ្ដើមដំណាក់កាលផ្ទេរ សមត្ថ​កិច្ចយោធា​រវាងប្រទេស​បារាំង និងប្រទេសកម្ពុជា។ ដំណាក់កាលនេះ​ គឺ​ជា​ការបង្កើតអគ្គសេនា​ធិការនៃក្រសួង​ការពារ​ជាតិ ​ក្រោមឱវាទ រដ្ឋមន្ត្រី មានកងឯកភាព​ជើង​គោក​ មានកង​នាវា​ចម្បាំង តាមទន្លេចំនួន​២​កង ​មាន សាលា និងមជ្ឈមណ្ឌលហ្វឹកហ្វឺន គឺសាលាយោ​ធាខ្មែ​រ​សម្រាប់បណ្តុះបណ្តាល​នាយ ទាហាននិងសាលាក្រប​ខ័ណ្ឌថ្មពេជ្រសម្រា​ប់បណ្ដុះ​បណ្តាល នាយ​ទាហាន​រង។

        ថ្ងៃទី២ ខែកញ្ញា ឆ្នាំ១៩៥៣ ដល់ថ្ងៃទី២០ ខែកក្កដា ឆ្នាំ១៩៥៤ គឺជារយៈពេ​ល​បញ្ច​ប់​អរិភាពលើទឹកដីអតីតឥណ្ឌូ​ចិន​របស់អាណានិគម​បារាំង​។​ ព្រះ​រាជាណាចកកម្ពុជា ទទួលបា​នឯ​ករាជ្យភាព​ពេញបរិបូណ៍ថ្ងៃទី៩ ខែវិច្ឆិកា ​ឆ្នាំ១៩៥៣ ដោយចលនា ទាមទាររបស់កងទ័ព និងប្រជារាស្ត្រគ្រ​ប់ស្រទាប់វណ្ណៈ ក្រោមព្រះរាជបូជនីយកិច្ចរបស់ ព្រះករុណា​ព្រះបាទសម្ដេចព្រះ​​នរោត្ដម សីហនុ ព្រះ​បរមរតន​កោដ្ឋ​។​ ដំណាក់កាល ដែលបញ្ជាការ និងកង​កម្លាំង​បារាំង​ចាកចេញពីទឹកដីនៃប្រទេសកម្ពុជា គឺជា​ការ​ចាប់ បដិសន្ធិពេញលក្ខណៈ​នៃកងយោធ​ពលខេមរ​ភូមិន្ទ និងបានបង្កើត​អគ្គសេនា​ធិការ កងយោធពល​ខេមរភូមិន្ទ បញ្ហាការដ្ឋាន​កង​ទ័ព​ជើងអាកាស​ភូមិន្ទ និងបញ្ជាការដ្ឋាន កងទ័ពជើងទឹ​ក​ភូមិន្ទ​។

       ថ្លែង​ក្នុងឱកាសនោះ សម្តេច​ពិជ័យ​សេនា​ ទៀ បាញ់ បានបញ្ជាក់ថា​ រយៈពេល៦៩ឆ្នាំ​មក​នេះ កងយោធ​ពល​ខេមរភូមិន្ទបាន​ឆ្លង​កាត់​ដំណាក់​កាល​ជា​ប្រវត្តិសាស្ត្រយ៉ាង​ច្រើន ទាំងដំណាក់កាល​ប្រកប​ដោយ​មោទនភាពផង ទាំង​ដំណាក់​កាល​ប្រកបដោយភាព​បត់បែន លំបាកស្មុគស្មាញ និង​គ្រោះថ្នាក់ជាទី​បំផុតផង​។​ ប៉ុន្តែទោះបីស្ថិត​ក្នុង​កាលៈទេសៈយ៉ាង​ណាក្តី​ ក៏​កងយោធពល​ខេមរ​ភូមិន្ទនៅតែ​រក្សាខ្ជាប់​នូវគោល​បំណង និងឧត្តម​គតិ​របស់​ខ្លួន​ដើម្បី​កសាង​ និង​ការ​ពារ​ប្រទេសកម្ពុជាជាមួយ​ឯករាជ្យ សន្តិភាព សេរីភាព ប្រជាធិប​តេយ្យ អព្យាក្រឹត ​និងវឌ្ឍនភាព​សង្គម​។​ ពេល​ប្រទេសជាតិត្រូវ​ធ្លាក់​ទៅ​ក្នុង​គ្រោះ​មហន្តរាយ ដែល​របបប្រល័​យ​ពូជ​សាសន៍ ប៉ុល ពត ​បាន​បង្ក​ឡើង ​មាន​តែកងយោធពល​ខេមរ​ភូមិន្ទ​ដ៏​បរិសុទ្ធ​ដែល​ស្មោះ​ត្រង់​ នឹង​គោល​បំណង និងឧត្តមគតិ​របស់​ជាតិ​ប៉ុណ្ណោះ ដែលបានក្រោក​ឈរ​ឡើងធ្វើការតស៊ូ និងប្រមូល​ផ្ដុំរាល់កម្លាំង ស្នេហា​ជាតិ បង្កើត​កង​កម្លាំង​ប្រដាប់​អាវុធសាមគ្គីសង្គ្រោះ​ជាតិ​កម្ពុជា​ “២០ មិថុនា ១៩៧៧ បង្កើត​រណសិរ្ស សាមគ្គី​សង្គ្រោះ​ជាតិកម្ពុជា​ ​“២ធ្នូ ១៩៧៨” ដើម្បីប្រយុទ្ធផ្តួលរំលំរ​បបដ៏យង់​ឃ្ន​ងនេះ​រហូតទទួលបាន​ជ័​យជ​ម្នះ​ជា​ប្រវត្តិសាស្ត្រ នៅថ្ងៃទី៧ ​ខែម​ករា ឆ្នាំ១៩៧៩ ដែលបាន​សង្គ្រោះ​ជាតិ​ឱ្យរស់រានមាន​ជីវិត​ឡើង​វិញទា​ន់​ពេល​វេលា នាំយក​សិទ្ធិសេរីភាពដែល​ត្រូវបាត់​បង់​ទាំង​ស្រុង​ ​ក្នុង​របប​ ប៉ុលពត មកជូន​ប្រជាជនវិញ​បញ្ចប់សករាជដ៏​ខ្មៅ​ងងឹតបំផុត  ហើយ​បើកឡើងនូវសក​រាជ​ថ្មីរបស់​កម្ពុជា ប្រកបដោយ​ពន្លឺនិ​ង​ក្តី​សង្ឃឹម​។ ប្រជាជន​កម្ពុជា​ទាំង​អស់​ ធ្លាប់រងទុក្ខវេទនាក្នុង​របបប្រល័​យ​ពូជសាសន៍ ក៏ដូច​យុវវ័យ​ជំនាន់ក្រោយ​តែងចងចាំ​ជានិច្ចនូវអត្ថន័យ​ដ៏​ធំធេង នៃជ័យជម្នះ​ជា​ប្រវត្តិសាស្ត្រនេះ​ ដែលធ្វើឱ្យមាន​អ្វីៗ​នៅ​ថ្ងៃ​នេះ​។​ សម្តេច​ពិជ័យ​សេនា​ បានបញ្ជាក់ថា៖ នៅលើផ្លូវឆ្ពោះទៅ​មុខ​ទៀត កងយោធពល​ខេមរ​ភូមិន្ទ​ បន្តប្រកាន់​ខ្ជាប់​នូវគោលការណ៍​សាមគ្គី​ប្រជាជាតិ ​ទាំង​មូលក្រោម​ដំបូល​រដ្ឋធម្មនុញ្ញ​ និង ​អង្គព្រះមហាក្សត្រនៃព្រះរា​ជាណាចក្រ​កម្ពុជា ជាទីគោរពសក្ការៈ​ដ៏​ខ្ពង់ខ្ព​ស់​បំផុត ដើម្បី​ការ​ពារ​ឯករាជ្យ អធិបតេយ្យ បូរណភា​ព​ទឹក​ដី​ឱ្យបាន​គង់​វង្ស បន្តអភិវឌ្ឍ​សេដ្ឋកិច្ច សង្គម​ឱ្យមានការរីកចម្រើ​នដូច​អរិយ​ប្រទេស​នានានៅ​ក្នុង​តំបន់​ ជា​សង្គមប្រក​ប​ដោយ​ភាព​សុខ​ដុមរមនា និង សេចក្តី​ស្រឡាញ់ ​ដោយ​គ្មាន​ការ​កើត​ឡើង​ជា​ថ្មី​នូវ​អំពើ​ប្រល័យពូជ​សាសន៍​ សង្គ្រាម និងការបែក​បាក់​ផ្ទៃក្នុងជាតិ ដូចពេល​មុនទៀត។

      កងយោធពលខេមរ​ភូមិន្ទការពារដាច់​ខាត​នូវ​សន្តិភាព ស្ថិរភាព​នយោបាយ ​និង​សន្តិសុខរបស់​ជាតិ ​ដែល ជា​លក្ខខណ្ឌ​ជា​សារវន្ត ដើម្បីធានា​នូវជីវភាព​ដ៏​សុខ​សាន្ត​របស់​ប្រជាជន ប្រកប​ដោយ​សេរីភាព កិត្តិយស និង សេចក្តី​ថ្លៃថ្នូរ និងការអភិវឌ្ឍ​សេដ្ឋកិច្ច​ សង្គម ប្រកបដោយ​ចិរភាព​មិន​ឱ្យ​អនុភាព​ប្រតិកិរិយាណា​ទោះបី​ជាអរ ពិស​យ៉ាង​ណាក៏ដោយ​មកបំផ្លាញ​បាន​ឡើយ។​ ជាមួយគ្នានេះ យើងបន្ត​ចូលរួមយ៉ាង​សកម្ម​ដើម្បី​បុព្វហេតុសន្តិ ភាព ​ស្ថិរភាព សន្តិសុខ និងការប្រយុទ្ធ​ប្រឆាំង​នឹង​បញ្ហា ប្រឈម​នានា​រប​ស់តំបន់ និងពិភព​លោក​។​ កងយោធ​ពលខេមរ​ភូមិន្ទ បន្តអនុវត្ត​តាម​ការដឹកនាំ​របស់​រាជ​រដ្ឋាភិបាល ដោយបោះ​ជំហាន​ទៅ​មុខ​ឥតងាក លើមាគ៌ាប្រជាធិប​តេយ្យ​សេរី​ពហុបក្ស និងនីតិរដ្ឋ ដែល​ស្របទៅនឹ​ង​បរិបទនៃ​សង្គម​កម្ពុជា និងឆ្លើយតប ទាំងស្រុងទៅនឹង​បំណងប្រាថ្នាដ៏​ពិសិដ្ឋ​របស់​ប្រជាជន​។ ព្រមជា​មួយនេះ កងយោធពល​ខេមរ​ភូមិន្ទបដិសេធនូវ រា​ល់សកម្មភាព​ទាំងឡាយនោះចេញ​ពី​ប្រភពណាក្តី ដែលប៉ុន​ប៉ង​នាំ​កម្ពុជា​ឱ្យឃ្លាតចេញ​ពី​មាគ៌ានេះ ឬកៀប សង្កត់​មក​លើ​អធិបតេយ្យ​ភាព​របស់​កម្ពុជា​។ កងយោធ​ពលខេមរ​ភូមិន្ទ ប្រឆាំងដាច់​ខាត​និង​ថ្កោល​ទោស​ចំពោះ​សម្ដីរបស់​ទណ្ឌិត​ សម រង្ស៊ី ដែលបាន ​ប្រមាថយ៉ាងធ្ងន់ធ្ងរបំផុត​ចំពោះ ​អង្គព្រះមហាក្សត្រ ដោយ​បាន​ធ្វើឱ្យប៉ះពាល់​ដល់​សេចក្ដីថ្លៃថ្នូរ និងព្រះកិត្តិ នាមរបស់ ព្រះមហាក្សត្រ នៃព្រះ​រាជាណាចក្រ​កម្ពុជា ដែលជាទីគោរព​សក្ការៈដ៏ខ្ពង់ខ្ពស់​បំផុត​របស់​ ប្រជារាស្ត្រខ្មែរ​ទូទាំង​ប្រទេស​។ កងយោធពល​ខេមរភូមិន្ទ ប្តេជ្ញា​ដាច់​ខាត​ការ​ពាររដ្ឋធម្មនុញ្ញ ការ​ពារ​រាជរដ្ឋាភិបាល ស្រប​ច្បាប់ និងសូមប្រកាស​គាំទ្រចំពោះ ឯកឧត្តម ហ៊ុន ម៉ាណែត ជាបេក្ខភាពនាយក​រដ្ឋមន្ត្រី នា​ពេល​អនាគគ.បន្ត ពីសម្តេចអគ្គ​មហាសេនាបតី​តេជោ ​ហ៊ុន សែន

      ក្នុងនាម​ក្រសួងការពារជាតិ អគ្គបញ្ជាការ​នៃ​កងយោធពល​ខេមរភូមិន្ទ សម្តេ​ចពិជ័យ​សេនា​ បាន​ថ្លែងអំណរគុណ​ដ៏​ជ្រាលជ្រៅ​ចំពោះ​ឯកឧត្តម លោក​ជំទាវ​ តំណាង​ក្រសួង​ ស្ថាប័ន ដែលមានវត្ត​មាន​ចូលរួមក្នុងពិធីមិទ្ទិញ​អបអរសាទរ​ខួប​អនុស្សាវរីយ៍លើក​ទី​៦៩ ទិវាកំណើត​កងយោធពល​ខេមរភូមិន្ទ​នា​ពេល​នេះ​។ សូម​សម្តែងនូវការ កោត​សរសើរ ដោយមនោសញ្ចោតនាគោរព​ស្រឡាញ់​យ៉ាង​ជ្រា​ល​ជ្រៅបំផុត​ ជូន​ចំពោះវីរកង​ទ័ព នាយទាហាន នាយទាហានរង យុទ្ធជន យុទ្ធនារីនៃកង​យោធពលខេមរ​ភូមិន្ទគ្រប់រូប ដែល​កន្លង​មក​ក៏​ដូច​បច្ចុប្បន្នបាន​និង​កំពុង​បន្ត​ បំពេញបេសក​កម្មប្រកប​ដោយ​វីរភាព និងពលិកម្ម​ដ៏​ឧត្តុង្គ​ឧត្តម​ ដើម្បីបុព្វហេតុ​ទាមទារ និងការ​ពារ​ឯ​ក រាជ្យ សន្តិភាព អធិបតេយ្យ បូរណ​ភាព​ទឹក​ដី​ និងសេចក្តី​សុខ ក្សេមក្សាន្ត​របស់​​ប្រជាជន។ សម្តេច​ ពិជ័យ​សេនា​ សូមសម្តែង​នូវការគោរពដឹង​គុណដ៏ស្មោះ​អ​ស់ពី​ដួង​ចិត្ត ចំពោះបង​ប្អូន​ជន​រួមជា​តិ​ទាំងអស់ ដែល​បាន​លះប​ង់កូន​ចៅ​ ប្តីសី និងសាច់ញាតិជាទីស្រឡាញ់​របស់​ខ្លួន​ឱ្យចូលបម្រើក្នុង​ជួរ​កង​ទ័ព​ ដើម្បីការពារជាតិ​មាតុភូមិ និងបានបង្ក​លក្ខណៈ​សម្បត្តិគ្រ​ប់​បែប​យ៉ាង​ជួយ​ឧបត្ថម្ភ​គាំទ្រដល់​សកម្មភាព​របស់​កងយោធ​ពល​ខេមរ​ភូមិន្ទ តាំង ពីដើមរហូត​ដល់​ពេល​បច្ចុប្បន្ន។ 

        សូមផ្តាំផ្ញើសួរសុខទុ​ក្ខប្រកប​ដោយ​មនោសញ្ចេតនា​ គោរពស្រឡាញ់ និងការដឹង គុណយ៉ាង​ជ្រាលជ្រៅចំពោះ​យោធិន​ពិការ​យោធិ​នចូល​និវត្តន៍ បាត់បង់​សមត្ថភាព​ការងារ : គ្រួសារយោធិន​ពលី មរណៈ និងអតីតយុទ្ធជន​កម្ពុជា​ទាំង​អស់​។ សូមឧទ្ទិសនូវ​ទឹក​ចិត្ត​កតញ្ញូកតវេទី​ជូន​ចំពោះវិញ្ញាណក្ខន្ធ​ថ្នាក់​ដឹ​កនាំ ​ក្រសួងការពារជាតិ ថ្នាក់​ដឹ​កនាំ​អគ្គបញ្ញាការដ្ឋាន​មេ​បញ្ជាការ ប្រធានស្ថាប័ន​គ្រប់​ជំនាន់ ​ដែល​បាន​ធ្វើ​ពលិកម្ម ដើម្បីបុព្វហេតុ​ការពារ​ជាតិ និងសេចក្តីសុ​ខ​ក្សេមក្សាន្ត​របស់​ប្រជា​ពលរដ្ឋ​។ ក្នុងខណៈ​នោះ​សម្តេច​ ពិជ័យ​សេនា ​ក៏បាន​ផ្តាំផ្ញើសួរ​សុខទុក្ខចំពោះ​នាយ​ទាហាន ​នាយ​ទាហាន​រង​ និ​ងពល​ទាហាន​នៃ​កងយោធពល​ខេមរ​ភូមិន្ទ ដែល​កំពុងបំពេញ​បេសសកម្ម​ទាំង​ក្នុង​ និង​ក្រៅ​ប្រទេស​ សូមសម្រេចបា​ន​ជោគ​ជ័យ​គ្រប់​ភារកិច្ច។ សូមជូនព​រ​ យោធិនរបួសជំងឺ ​ដែល​កំពុង​សម្រាក​ព្យាបាល​នៅ​តាម​មន្ទីរពេទ្យ និងនៅគ្រប់ទីកន្លែង សូមបងប្អូន​ទាំង​អស់​គ្នា​ ឆាប់ជាសះស្បើយ ​និង​មានសុខភាពជា​ប្រក្រតីភាព​ឡើង​វិញ ៕


អត្ថបទថ្មីៗ

សេចក្តីប្រកាស

សារជូនពរ

វីដេអូ