លោកជំទាវបណ្ឌិត ដាំ ដារីនី ជួបប្រតិភូនៃសាលា លី កា្វន់យូ សឹង្ហបូរី
កាលពីរសៀលថ្ងៃទី២០ ខែកញ្ញា ឆ្នាំ២០២២ លោកជំទាវបណ្ឌិត ដាំ ដារីនី រដ្ឋលេខាធិការ ក្រសួងការពារជាតិ បានអនុញ្ញាត ឲ្យគណៈប្រតិភូនៃសាលា លី កា្វន់យូ (Lee Kaun Yew School of Public Policy) ដែលដឹកនាំដោយ លូ ឡូ (Mr. Louis Low) នាយកផ្នែកទំនាក់ទំនងតំបន់ និងភាពជាដៃគូ នៃសាធារណរដ្ឋសង្ហឹបុរី និងសហការីចូលជួបសំដែងការគួរសម និងពិភាក្សាការងារ នៅទីស្តីការក្រសួង។
ក្នុងឱកាសនោះលោក Louis Low បានថ្លែងអំណរគុណដល់លោកជំទាវបណ្ឌិត ដែលឆ្លៀតឱកាសដ៏មមាញឹកអនុញ្ញាត ឲ្យប្រតិភូរបស់លោកបានចូលមកសំដែងការគួរសមនាពេលនេះ។ លោកបានបន្តថា៖ ដោយមើលឃើញព្រះរាជាណាចក្រកម្ពុជា មានការអភិវឌ្ឍ និងរីកចំរើនយ៉ាងឆាប់រហ័ស ក្រោមការដឹកនាំរបស់ សម្តេចតេជោ ហ៊ុន សែន ប្រមុខរាជរដ្ឋាភិបាលសព្វថ្ងៃ ពិសេសលើវិស័យបណ្តុះបណ្តាលធនធានមនុស្ស ដូច្នេះជំនួសមុខឲ្យថ្នាក់ដឹកនាំ សាលា លី កា្វន់យូ លោកមានគំរោងផ្តល់អាហាររូបកណ៍ មួយចំនួន សំរាប់នាយទាហាន ពលទាហាន ដែលមានសមត្ថភាពឲ្យចូលមកសិក្សាថ្នាក់អនុបណ្ឌិត រយៈពេល១ឆ្នាំ និង២ឆ្នាំ នៅសាលា លី កា្វន់យូ។ ចំពោះការជ្រើសរើសនាយទាហាន ពលទាហាន ដែលត្រូវជ្រើសរើសចូលសិក្សា លោក លូ ឡូ (Louis Low) បានបញ្ជាក់ថា៖ ត្រូវបានបញ្ចាប់ថ្នាក់បរិញ្ញាប័ត្រ និងមានកំរិតភាសាអង់គ្លេសចាប់ ៧ចុចឡើងទៅ។
មានប្រសាសន៏ក្នុងឱកាសនោះ ជំនួសមុខឲ្យ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ លោកជំទាវរដ្ឋលេខាធិការ បានថ្លែងអំណរគុណយ៉ាងជ្រាលជ្រៅ ចំពោះសាលា លី ក្វាន់យូ ដែលជាសាលាល្បី១ ក្នុងតំបន់ និងពិភពលោក ដែលបានគិតគូរក្នុងការផ្តល់អាហាររូបករណ៍ចំពោះក្រសួងការពារជាតិនាពេលនេះ។ លោកជំទាវបានបញ្ជាក់ថា៖ សព្វថ្ងៃនេះ នាយ និងពលទាហាន នៃ ខ.ភ.ម បាននឹងកំពុងខិតខំធ្វើកំណែរទំរង់ក្នុងជួរកងទ័ព ដើម្បីដើរឲ្យទាន់សម័យនៃបច្ចេកវិទ្យាទំនើប ដូចកងទ័ពនៃបណ្តាប្រទេសក្នុងតំបន់ និងកងទ័ពលើសាកលលោកផងដែរ។ ហេតុដូច្នេះហើយ បានជាកងទ័ពចាំបាច់ត្រូវការសិក្សា ដើម្បីបង្កើនចំណេះដឹងឲ្យកាន់តែប្រសើរឡើងថែមទៀត។ លោកជំទាវរដ្ឋលេខាធិការ សន្យាថានឹងធ្វើការផ្សព្វផ្សាយដល់ថ្នាក់ដឹកនាំ នាយទាហាន និងនាយទាហានរង ដែលមានបំណង់ចង់បន្តការសិក្សា ដើម្បីបង្កើននូវចំណេះដឹង និងជំនាញឲ្យកាន់តែមានល្អប្រសើរសម្រាប់ចូលរួមគ្រប់ការអភិវឌ្ឍប្រទេសជាតិ ៕
