បន្ទាប់ពីបំពេញបេសកកម្មរបស់អង្គការសហប្រជាជាតិ ប្រកបដោយជោគជ័យ និងនិវត្តន៍មកកាន់កម្ពុជាវិញ ដោយសុវត្ថិភាព នាព្រឹកថ្ងៃទី១០ ខែមិថុនា ឆ្នាំ២០១៥នេះ នៅមូលដ្ឋានទ័ពអាកាសពោធិ៍ចិនតុងគណៈកម្មាធិការជាតិ បានរៀបចំពិធីទទួលដំណើរកងអាវុធហត្ថលេខ១១៧ កងពេទ្យកំរិត២លេខ៨០៩ ដែលបានបញ្ចប់បេសកកម្មរក្សាសន្តិភាពរបស់អ.ស.ប នៅប្រទេសស៊ូដង់ខាងត្បូង និងកងវិស្វកម្មព្រលានយន្តហោះលេខ៨១៩ កងកំទេចគ្រាប់មិនទាន់ផ្ទុះលេខ២១៣ ដែលបានបញ្ចប់បេសកកម្មនៅប្រទេសម៉ាលី។
ពិធីបានប្រព្រឹត្តិទៅក្រោមអធិបតីភាព ឯកឧត្តមនាយឧត្តមសេនីយ៍ ទៀ បាញ់ឧបនាយក រដ្ឋមន្ត្រី រដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់ សម្តេចអគ្គសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាព្រមទាំងភ្ញៀវជាតិ និងអន្តរជាតិសំខាន់ៗជាច្រើនអញ្ជើញមកចូលរួម នាព្រឹកថ្ងៃទី10 ខែមិថុនាឆ្នាំ2015 វេលាម៉ោង៨:០០ នៅមូលដ្ឋានកងទ័ពអាកាសពោចិនតុង។
នៅក្នុងពិធីនេះ ឯឧត្តម ប្រាក់ សុខន រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងជាប្រធានគណៈកម្មាធិការជាតិ បានរាយការណ៍ជូនអង្គពិធីជ្រាប អំពីលទ្ធផលការងាររបស់កងកម្លាំងកម្ពុជា ដែលទៅបំពេញបេសកកម្មរបស់អង្គការសហប្រជាជាតិ នៅប្រទេសម៉ាលី និងនៅប្រទេសស៊ូដង់ខាងត្បូង ក្នុងរយៈពេល០១ឆ្នាំកន្លងមកនេះ ទទួលបានជោគជ័យគួរជាទីមោទនៈ ដូចតទៅ៖
បេសកកម្មនៅប្រទេសស៊ូដង់ខាងត្បូង កងអាវុធហត្ថលេខ១១៧ ចំនួន៧៣នាក់ បានពង្រាយ និងបែងចែកកម្លាំងក្នុងរដ្ឋចំនួន០៦ ដែលទទួលបន្ទុកការងារដាក់ប៉ុស្តិ៍ត្រួតពិនិត្យចរាចរណ៍ផ្លូវគោក ការល្បាតដោយថ្មើរជើងនិងរថយន្តការចុះស៊ើបអង្កេតវាស់វែងករណីគ្រោះថ្នាក់ចរាចរណ៍ ការការពារថ្នាក់ដឹកនាំ ការចុះហ្វឹកហ្វឺនកងអាវុធហត្ថស៊ូដង់ខាងត្បូង និងការសិក្សាច្បាប់ផ្សេងៗរបស់អាវុធហត្ថ។
ចំពោះកងពេទ្យកំរិត២លេខ៨០៩ ចំនួន៧៩នាក់ មានភារកិច្ចផ្តល់សេវាសុខាភិបាលជូនដល់មន្ត្រី-បុគ្គលិកUNMISS, ប្រជាពលរដ្ឋស៊ូដង់ និងមន្ត្រី-បុគ្គលិកស្ថានទូតទាំងអស់ ដែលមាននិវេសនដ្ឋាននៅប្រទេសស៊ូដង់ ព្រមទាំងបំពេញការអារមនុស្សធម៌មួយចំនួនទៀត។ល។
បេសកកម្មនៅប្រទេសម៉ាលី កងវិស្វកម្មព្រលានយន្តហោះលេខ៨១៩ ចំនួន១៦១នាក់ បានបំពេញការងារនៅតំបន់គីដាល់ និងតេសាលីត ភាគខាងជើងប្រទេស ដែលមានភារកិច្ចសាងសង់ជម្រកសុវត្ថិភាព របាំងការពារចំណតរថយន្ត, ឃ្លាំងប្រេង, ឃ្លាំងគ្រាប់ ព្រមទាំងការកសាងហេដ្ឋារចនាសម្ព័ន្ធមួយចំនួនទៀត។
ដោយឡែក កងកំទេចគ្រាប់មិនទាន់ផ្ទុះលេខ២១៣ ចំនួន១៥៤ បានបំពេញបេសកម្មទទួលបន្ទុកការបន្សាបគ្រឿងផ្ទុះកែឆ្នៃ ព្រមទាំងបោសសំអាតមីន និងកម្ទេចចោលយុទ្ធភ័ណ្ឌមិនទាន់ផ្ទុះ។ល។
នៅក្នុងសុន្ទរកថារបស់ឯកឧត្តម ម៉ាក ឌឺវើវ (Marc Derveeuw) អ្នកសម្របសម្រួលស្តីទីរបស់អ.ស.បប្រចាំកម្ពុជា បានសម្តែងការកោតសរសើរ និងវាយតម្លៃខ្ពស់ចំពោះកងកម្លាំងកម្ពុ
ជា ដែលបានបំពេញភារកិច្ចទទួលលទ្ធផលល្អប្រសើរ គឺជាពន្លឺដ៏ត្រចះត្រចង់ដល់ការតាំងចិត្ត ដើម្បីសន្តិភាព សន្តិសុខ និងសាមគ្គីភាព។ទង្វើទាំងនេះ ពិតជាផ្តល់នូវតម្លៃដែលជាស្នូលរបស់ អង្គការសហប្រជាជាតិ ដែលបានរៀបចំឡើងសម្រាប់សង្គ្រោះដល់មនុស្សជំនាន់ក្រោយៗពីសង្គ្រាមរាំរ៉ៃ ។ កងកម្លាំងកម្ពុជាពិតជាគំរូដល់ពិភពលោកទាំងមូលក្នុងការលះបង់បូជាដើម្បីជួយសង្គ្រោះដល់ប្រជាជនដ៏ទៃ និង ការចែករំលែកបទពិសោធន៍ដល់បណ្តាប្រទេសនានា
ដែលរងគ្រោះដោយជម្លោះនានា។
ទន្ទឹមនេះ ឯកឧត្តម ម៉ាក ឌឺវើវ បានសម្តែងនូវការដឹងគុណយ៉ាងជ្រាលជ្រៅបំផុត ចំពោះរាជរដ្ឋាភិបាលកម្ពុជា ដែលបានអនុវត្តការប្តេជ្ញាចិត្តយ៉ាងមុតមាំ ក្នុងការចូលរួមបំពេញបេសកកម្មរបស់អង្គការសហប្រជាជាតិ ដែលជាការឆ្លុះបញ្ចាំងបង្ហាញឲ្យឃើញពីភាពជោគជ័យដ៏ត្រចះត្រចង់របស់កម្ពុជាលើឆាកអន្តរជាតិ និង កិត្តិយសដ៏ធំធេងសម្រាប់កម្ពុជា ដែលជាប្រទេសមួយប្រកបដោយសន្តិភាព សន្តិសុខ និងមិត្តភាព ហើយបានធ្វើឲ្យកម្ពុជាក្លាយជាប្រទេសគំរូមួយសម្រាប់ពិភពលោក ក្នុងការចូលរួមចំណែកបង្កើតឲ្យមានសន្តិភាពដល់បណ្តាប្រទេសផ្សេងៗនៅលើពិភពលោក។
ថ្លែងទៅកាន់អង្គពីធី ឯកឧត្តម ឧបនាយករដ្ឋមន្ត្រី ទៀ បាញ់ បានសង្កត់ធ្ងន់ថា ក្នុងនាម សម្តេចតេជោនាយករដ្ឋមន្ត្រី និងក្នុងនាមឯកឧត្តមផ្ទាល់ សូមសម្តែងការកោតសរសើរ និងវាយតម្លៃខ្ពស់ចំពោះសមិទ្ធផលជាច្រើន ដែលកងយោធពលខេមរភូមិន្ទសម្រេចបានជោគជ័យលើវិស័យរក្សាសន្តិភាពនេះ ហើយបានការគាំទ្រ និងវាយតម្លៃខ្ពស់ពីសំណាក់សាធារណជនជាតិ-អន្តរជាតិ និងមន្ត្រីរបស់អង្គការសហប្រជាជាតិ។
សមិទ្ធផលសម្រេចបាននាពេលកន្លងមកនេះ គឺជាស្នាដៃរបស់កងយោធពលខេមរភូមិន្ទ ដែលបានលះបង់ខ្ពស់ក្នុងការចូលរួមបំពេញេបេសកកម្មរក្សាសន្តិភាពនៅក្នុងប្រទេសមួយចំនួន ដែលជាចំណុចក្តៅនៅលើពិភពលោក។ នេះជាភារកិច្ចដ៏មានកិត្តិយសសម្រាប់ប្រជាជាតិកម្ពុជា ដែលជាសក្ខីកម្មបញ្ជាក់ថា ប្រជាជនកម្ពុជាពិតជាមាន “សុខដុមនីយកម្មជាតិ” មានសមត្ថភាពគ្រប់គ្រាន់ក្នុងការកសាងប្រទេសជាតិរបស់ខ្លួន ឲ្យសម្រេចបានវិបុលភាព អភិវឌ្ឍភាព និងសុខដុមភាព ដូចអារ្យប្រទេសជាក់ជាមិនខាន និងជាប្រទេសមួយដែលកំពុងដើរតួយ៉ាងសកម្ម ដោយស្មើសិទ្ធ ស្មើភាព ក្នុងគ្រប់កិច្ចការតំបន់ និងនៅលើឆាកអន្តរជាតិ។
ឯកឧត្តម ឧបនាយករដ្ឋមន្ត្រី ទៀ បាញ់ បានបញ្ជាក់បន្ថែមថា ស្របពេលជាមួយជោគជ័យនៃការបំពេញបេសកកម្មមនុស្សធម៌នេះ កងយោធពលខេមរភូមិន្ទបាននឹងកំពុងពង្រឹង និងបង្កើនទំនាក់ទំនងល្អ ក្នុងកិច្ចសហប្រតិបត្តិការទ្វេភាគី និងពហុភាគី ជាមួយដៃគូសន្តិសុខ ក្នុងនិងក្រៅតំបន់ ដើម្បីលើកស្ទួយកិត្យានុភាពរបស់ខ្លួនក្នុងការចូលរួមចំណែកនូវកិច្ចខិតខំប្រឹងប្រែងពង្រឹងសន្តិសុខ និងសន្តិភាពនៅក្នុងតំបន់។
សមិទ្ធផលដែលទទួលបានពីការបំពេញបេសកកម្មជាមនុស្សធម៌នាពេលនេះ ជាស្នាដៃដែលមានតម្លៃមិនអាចកាត់ថ្លៃបាន ប្រកបដោយកិត្តិយសជូនជាតិមាតុភូមិនៃយើង និងបញ្ជាក់ពីការយកចិត្តទុកដាក់គោរពប្រតិប្រត្តិយ៉ាងម៉ឺងម៉ាត់នូវលក្ខន្តិកៈរបស់កងយោធពលខេមរភូមិន្ទ ព្រមទាំងមានការហ្វឹកហ្វឺនរៀនសូត្រគ្រប់លក្ខណៈសម្បត្តិ តាមបទដ្ឋានអន្តរជាតិនានា ដែលបានកំណត់។
ឯកឧត្តម ឧបនាករដ្ឋមន្រ្តី ទៀ បាញ់ បានមានប្រសាសន៍ណែនាំបន្ថែមថា ថ្វីត្បិតតែកងយោធពលខេមរភូមិន្ទ បានឆ្លងកាត់មេរៀន និងមានបទពិសោធន៍ជាច្រើនលើវិស័យរក្សាសន្តិភាពក៏ពិតមែន ប៉ុន្តែទាមទារឲ្យថ្នាក់ដឹកនាំគ្រប់ស្ថាប័ន គ្រប់លំដាប់ថ្នាក់ ត្រូវបន្តយកចិ្តទុកដាក់បន្ថែមទៀតក្នុងការជម្រុញ ការកសាង ការលើកកម្ពស់ធនធានមនុស្សវ័យក្មេងជំនាន់ក្រោយ ដែលជាអ្នកបន្តវេនក្នុងការដឹកនាំ និងអនុវត្តការងារវិស័យរក្សាសន្តិភាពនេះ ឲ្យកាន់តែមានប្រសិទ្ធភាពបន្ថែមទៀត។
ឯកឧត្តម ឧបនាយករដ្ឋមន្ត្រី ទៀ បាញ់ ក៏បានថ្លែងអំណរគុណចំពោះកងកម្លាំងនៃបណ្តាប្រទេស ដែលរួមបេសកកម្មបរបស់អង្គការសហប្រជាជាតិនៅប្រទេសម៉ាលី និងស៊ូដង់ខាងត្បូងទាំងអស់ ដែលបានគាំទ្រសហការជាមួយកងកម្លាំងកម្ពុជាក្នុងការបំពេញបេសកកម្មមនុស្សធម៌ ដើម្បីសន្តិភាពជាប្រវត្តិសាស្រ្តនេះ ព្រមទាំងផ្លែងអំណរគុណចំពោះបណ្តាប្រទេសជាមិត្តទាំងអស់ ដែលបានជួយគាំទ្រឧបត្ថម្ភដល់កងកម្លាំងកម្ពុជា ទាំងស្មារតី ឧបករណ៍ សម្ភារៈ និងបានបញ្ជូនគ្រូយោធាចារ្យប្រកបដោយសមត្ថភាព និងបទពិសោធន៍ល្អៗ មកបង្ហាត់បង្រៀនជំនាញរក្សាសន្តិភាពដល់កងកម្លាំងកម្ពុជា ឲ្យមានសមត្ថភាពគ្រប់គ្រាន់ ជំនាញត្រឹមត្រូវតាមនិយាមរបស់អង្គការសហប្រជាជាតិ។
រាជធានីភ្នំពេញ ថ្ងៃទី១០ ខែមិថុនា ឆ្នាំ២០១៥
