ការហ្វឹកហ្វឺនបំប៉នការងារឋានលេខា និងសេនាធិការផែនទី គឺជាការចូលរួមយ៉ាង សកម្មក្នុងកម្មវិធីកែទម្រង់ ខ.ភ.ម របស់រាជរដ្ឋាភិបាល ដែលមានសម្តេចអគ្គមហា សេនាបតីតេជោ ហ៊ុនសែន ជាប្រមុខ, សំដៅពង្រឹង ខ.ភ.ម មួយមានគុណភាពខ្ពស់ សមត្ថភាពគ្រប់គ្រាន់ សក្តិសមជាកងទ័ពអាជីពពិតប្រាកដ បំរើបានល្អកិច្ចការពារ ជាតិមាតុភូមិ និងការអភិវឌ្ឍន៍ប្រទេសជាតិក្នុងពេលបច្ចុប្បន្នក៏ដូចទៅអនាគត។
នេះជាប្រសាសន៍របស់ឯ.ឧ នាយឧត្តមសេនីយ៍ នាង ផាត រដ្ឋលេខាធិការ ក្រសួង ការពារជាតិ ដែលបានលើកឡើងនៅក្នុងពិធីបើកវគ្គបំប៉នមុខវិជ្ជាឋានលេខា និងការ ងារសេនាធិការផែនទីដល់នាយទាហានទូទាំង ខ.ភ.ម លើកទី១៨ ឆ្នាំ២០១៥ នៅទី ស្តីការក្រសួងការពារជាតិ នាព្រឹកថ្ងៃទី២៧ ខែឧសភានេះ។
តាមរបាយការណ៍បើកវគ្គរបស់ឯ.ឧ ឧត្តមសេនីយ៍ឯក ទេព ចំរើន នាយក នាយក ដ្ឋានភូមិសាស្ត្រ ក្រសួងការពារជាតិ បានឲ្យដឹងថា ការហ្វឹកហ្វឺនជាភារកិច្ចចាំបាច់ ត្រូវធ្វើព្រមៗគ្នាគ្រប់ផ្នែក គ្រប់ថ្នាក់ គ្រប់ជំនាញ គ្រប់កងឯកភាពនោះ នាយកដ្ឋាន ភូមិសាស្ត្រ ក្រសួងការពារជាតិ បានបើកដំបូងពីឆ្នាំ១៩៩៩ មកដល់ឆ្នាំ២០១៥នេះ បានចំនួន ១៨វគ្គ ដែលមានសិក្ខាកាមមកពីគ្រប់កងឯកភាពទូទាំងប្រទេស ព្រមទាំង នាយនគរបាលជាតិផងដែរ។ វគ្គបំប៉នទី១៨នេះ មានរយៈពេល១២០ថ្ងៃ ដោយចាប់ ផ្តើមពីថ្ងៃទី២៧ ខែឧសភានេះតទៅ ដោយមានសិក្ខាកាមចូលរួមចំនួន ៦៥នាក់ មកពីបណ្តាកងឯកភាពនានា ពិសេសកងឯកភាពតាមបណ្តោយព្រំដែន។ វគ្គបំប៉ន បានផ្តោតលើខ្លឹមសារសំខាន់ៗស្តីពីភូមិសាស្ត្រយោធា និងរបៀបប្រើប្រាស់ភូមិ សាស្ត្រ, របៀបស៊ើបការណ៍ និងវាយតម្លៃភូមិសាស្ត្រ, សិក្សាអំពីការប្រើប្រាស់ផែនទី គ្រប់ប្រភេទមាត្រដ្ឋាន និងរបៀបប្រើប្រាស់ឧបករណ៍ឋានលេខាផ្សេងៗ ពិសេស ជីភីអេស(GPS) កែវឆ្លុះ និងត្រីវិស័យ សំដៅឲ្យមានការឯកភាពទូទាំង ខ.ភ.ម អំពីមុខ វិជ្ជាឋានលេខា និងសេនាធិការផែនទីដែលបាន និងកំពុងប្រើប្រាស់បច្ចុប្បន្ននៅក្នុង កងទ័ព។
ក្នុងនាមឯ.ឧ នាយឧត្តមសេនីយ៍ ទៀ បាញ់ ឧបនាយករដ្ឋមន្ត្រី ក្រសួងការពារជាតិ, ឯ.ឧ នាយឧត្តមសេនីយ៍ នាង ផាត សម្តែងនូវកោតសរសើរចំពោះនាយទាហាន ពលទាហាននាយកដ្ឋានភូមិសាស្ត្រ ដែលបានពុះពារខិតខំយកចិត្តទុកដាក់បំពេញ ភារកិច្ច សំដៅពង្រីកវិស័យឯកទេសវិទ្យាសាស្ត្រមួយមានប្រសិទ្ធខ្ពស់រួមចំណែកក្នុង
ការកែទម្រង់ ខ.ភ.ម ប្រកបដោយគុណភាព ហើយបានអនុវត្តយ៉ាងត្រឹមត្រូវតាម ផែនការហ្វឹកហ្វឺនប្រចាំឆ្នាំរបស់ខ្លួន ក្នុងការចាត់តាំងបើកវគ្គហ្វឹកហ្វឺនបំប៉នជំនាញ ភូមិសាស្ត្រ និងសេនាធិការផែនទីលើកទី១៨ ឆ្នាំ២០១៥នេះ ដើម្បីឆ្លើយតបទៅនឹង សំណូមពរភារកិច្ចការពារ និងកសាងមាតុភូមិកម្ពុជា។
ឯ.ឧ រដ្ឋលេខាធិការ បានបញ្ជាក់ថា ក្រោមការដឹកនាំដ៏ឈ្លាស់វៃរបស់សម្តេចតេជោ ហ៊ុនសែន នាយករដ្ឋមន្ត្រី, ប្រទេសជាតិរបស់យើងមានការអភិវឌ្ឍន៍យ៉ាងខ្លាំង នៅ គ្រប់ច្រកល្ហកពីទីក្រុងរហូតដល់ជនបទ និងព្រៃភ្នំដែលមានប្រព័ន្ធធារាសាស្ត្រ ហេដ្ឋា រចនាសម្ព័ន្ធផ្លូវគមនាគមន៍លាតសន្ធឹងខ្វាត់ខ្វែងពាសពេញប្រទេស រួមទាំងតំបន់អភិ វឌ្ឍន៍ជាច្រើនទៀត ធ្វើឲ្យភូមិសាស្ត្រជាក់ស្តែងប្រែប្រួលខុសស្រឡះពីផែនទី ដែល តម្រូវឲ្យមានការកែតម្រូវជបន្ទាន់ឲ្យស៊ីគ្នាទាំងភូមិសាស្ត្រ និងផែនទីជៀសវាងការជះ ឥទ្ធិពលរបស់ភូមិសាស្ត្រទៅលើសកម្មភាពយោធា និងការអភិវឌ្ឍន៍ប្រទេសជាតិ។ ឯ.ឧ បានផ្តាំផ្ញើរដល់វគ្គបំប៉នទាំងគ្រូ និងសិក្ខាកាមត្រូវខិតខំរកគ្រប់វិធីដើម្បី បង្រៀន និងរៀនឲ្យបានល្អ សំដៅបង្កើនសមត្ថភាពសេនាធិការបច្ចេកទេសផែនទីឲ្យកាន់តែ ខ្ពស់ថែមទៀតនៅពេលបញ្ចប់វគ្គ។
ក្នុងឱកាសនោះ ឯ.ឧ នាង ផាត បានឧបត្ថម្ភថវិកាក្រសួងការពារជាតិដល់នាយកដ្ឋាន ភូមិសាស្ត្រ ចំនួន ០៣លានរៀលសម្រាប់កិច្ចដំណើរការហ្វឹកហ្វឺន៕
