ព័ត៌មាន

ឯក​ឧត្តម​ទេស​រដ្ឋមន្ត្រី​ គន់ ​គីម​ ប្រជុំ​សមាគម​អតីត​យុទ្ធជន​
នាយកដ្ឋានព័ត៌មាន(៣)
45
2188 ឯក​ឧត្តម​ទេស​រដ្ឋមន្ត្រី​ គន់ ​គីម​ ប្រជុំ​សមាគម​អតីត​យុទ្ធជន​

       នៅ​ព្រឹក​ថ្ងៃ​ទី​០៦ ​ខែ​មេសា​ ឆ្នាំ​២០២១​ សមាគម​អតីត​យុទ្ធជន​កម្ពុជា ​បាន​បើក​កិច្ច​ប្រជុំ​ពិភាក្សា​​ការ​ងារ ​បន្ទាន់​មួយ​ ដើម្បី​ប្រុង​ប្រៀប​រៀប​ចំ​ទី​កន្លែង​ និង​ក្រុម​គ្រូ​ពេទ្យ​ជំនាញ​ចាក់​វ៉ាក់​សាំង​ ការ​ពារ​ជំងឺ​កូវីត​១៩​ ជូន​ដល់​បង​ប្អូន​សមាជិក​អតីត​យុទ្ធជ​ន​ នៅ​ទូទាំង​ប្រទេស​។ កិច្ច​ប្រជុំ​នេះ​ បានប្រព្រឹត្ត​ទៅ​ស្ថិត​ក្រោម​អធិបតី​ភាព ​ ឯកឧត្តម​ទេស​រដ្ឋមន្ត្រី​ គន់​ គីម ​អគ្គលេខា​សមាគម​អតីត​យុទ្ជជន​កម្ពុជា ​ព្រម​ទាំង​មាន​ការ​ចូល​រួម​ពី​សំណាក់​ឯកឧត្តម​ អស់​លោក​ សមាជិក​ក្រុម​​ការ​ងារ​ សមាគម​អតីត​យុទ្ធជន​កម្ពុជា ​ម​កពី​គ្រ​ប់​យោធ​ភូមិ​ភាគ​ យោធា​រាជ​ធា​នី ខេត្ត​ ក្នុង​ក​ងយោធ​ពល​ខេមរ​ភូមិន្ទ​ ជា​ច្រើន​រូប​។

        ដោយ​អនុវត្ត​តាម​បទ​បញ្ជា​របស់​ប្រមុខ​រាជ​រដ្ឋាភិ​បា​ល ដែល​មា​ន សម្តេច​អគ្គ​មហា​សេនា​បតីតេជោ ​ហ៊ុន សែន ​ជា​ប្រធាន​សមាគម​អតីត​យុទ្ធជន​កម្ពុជា​ បាន​ផ្តល់​កា​រចាក់​វ៉ាក់​សាំង​ការ​ពា​រជំងឺ​កូវីដ​១៩​ ជូន​ដល់​បង​ប្អូនអតីត​យុទ្ធជន​ នៅ​ទូទាំង​ប្រទេស​នោះ​ ​សមាគម​អតីត​យុទ្ធជន​កម្ពុជា ​ក៍​បាន​បើ​ក​កិច្ច​ប្រជុំ​ពិភាក្សា​ការ​ងារ​បន្ទាន់​មួយ​ ដើម្បី​រៀបចំ​ទី​កន្លែង​ និង​ក្រុម​គ្រូពេទ្យ​ជំនាញ​ចាក់​វ៉ាក់​សាំង​ការ​ពារ​ជំងឺ​កូវីត​១៩ ជូន​ដល់​បង​ប្អូន​សមាជិក​អតីត​យុទ្ធជន​នៅ​ទូទាំង​ប្រទេស​។​ កន្លង​ម​កសមាគម​អតីត​យុទ្ធជន​កម្ពុជា​ បាន​ស្នើ​ទៅ​ប្រមុខ​រាជរដ្ឋា​ភិបាល​ សុំ​ចាក់​វ៉ាក់​សាំង​ការ​ពារ​ជំងឺ​កូវីដ​១៩​ ជូន​ដ​ល់បង​ប្អូន​សមាជិក​អតីត​យុទ្ធជន​ ក្នុង​ក្រប​ខ័ណ្ឌ​សមាគម​អតីត​យុទ្ធជន​កម្ពុជា ​ដែល​មាន​ចំនួន​សរុប​ប្រមាណ​ជា ​៧​ម៉ឺន​ ៩​ពាន់​ ៤៦៣​នាក់​ ដោយ​ចែក​ចេញ​ជា​ ៥​មុខ​សញ្ញា ​ដើម្បី​ចូល​រួម​បង្ការ​ទប់​ស្កាត់​ការ​ឆ្លង​រីក​រាល​ដាល​ជំងឺ​កូវីដ​១៩ ក្នុង​សហគមន៍​។

       អនុ​គណ:​កម្មការ​ចាក់​វ៉ាក់​សាំង​ការពារ​ជំងឺ​ឆ្លង​កូវីដ​១៩​ របស់​សមាគម​អតីត​យុទ្ធជន​កម្ពុជា​ បាន​បញ្ជាក់​ថា​៖ គិត​រហូត​មក​ដល់​ពេល​នេះ ​សមាគម បាន​រៀប​ចំ​ត្រៀម​ទី​កន្លែង​ និង​មុខ​សញ្ញា​សមាជិក​អតីត​យុទ្ធជន​ សម្រាប់​ការ​ចាក់​វ៉ាក់​សាំង​ការ​ពារ​ជំងឺ​កូវីដ​១៩​ ដល់​បង​ប្អូន​សមាជិក​អតីត​​យុទ្ធជន​យើង​ រួច​រាល់​ហើយ​ ដែល​ការ​ងារ​នេះ​នឹ​ងត្រូវ​ធ្វើ​ឡើង​សម្រាប់​រាជ​ធានី​ភ្នំពេញ​ ចាប់​ពី​ថ្ងៃ​ទី​០៧​. ទី​០៨ ​ខែ​មេសា ​ឆ្នាំ​២០២១​នេះ​ នៅ​មន្ទីពេទ្យ​ព្រះ​កេតុមាលា ​ហើយ​និង​បន្ត​ចាក់​វ៉ាក់​សាំង​ការ​ពារ​ជំងឺ​កូវីដ​១៩​ ជូន​ដល់​សមាជិក​អតីត​យុទ្ធជន​តាម​បណ្តា​ខេត្ត​គោល​ដៅហា​នីភ័យ​ខ្ព​ស់បន្ត​បន្ទាប់​ ចំនួន​៧​ទៀត​ រួម​មាន​៖​ ខេត្ត​កោះ​កុង​, ខេត្ត​ព្រះ​សីហនុ​, ខេត្ត​កណ្តាល​, ខេត្ត​ព្រៃ​វែង​​, ខេត្ត​ស្វា​​យ​រៀង​, ខេត្ត​ត្បូង​ឃ្មុំ ​និង​ខេត្តសៀមរាប​។ 

ឯកឧត្តម​ទេស​រដ្ឋមន្ត្រី​ គន់​ គីម ​អគ្គលេខា​សមាគម​អតីត​យុទ្ជជន​កម្ពុជា ​


       ឯកឧត្ដម គ​ន់​ គីម​ អគ្គ​លេខា​សមាគម​អតីត​យុទ្ជជន​កម្ពុជា​ បាន​គូស​បញ្ជា​ក់ថា៖ ​ការ​ចាក់​វ៉ាក់​សាំង​ការ​ពារ​ជំងឺ​កូវីដ​១៩​នេះ ​គឺ​ផ្ដល់​នូវ​អត្ថ​ប្រយោជន៍ជា​ច្រើន​ មិ​នថា​ប្រជាពលរដ្ឋ​ទូទៅ ​ឬ​សមាជិក​ អតីត​យុទ្ធជន​នោះ​ទេ​ គឺ​ការ​ចាក់​វ៉ាក់​សាំង​នេះ​ ដើម្បី​ការ​ពារ​ការ​ឆ្ល​ងរាល​ដាល​ជំងឺ​កូវីដ​១៩​ ម​កក្នុង​សហគមន៍​។​ ឯកឧត្ដម​បាន​បន្ដ​ថា​៖ ចំពោះ​បង​ប្អូន​សមាជិក​អតីត​យុទ្ធជន​ ក្រុម​ការងារ​មាន​រៀប​ចំ​​ចាក់​វ៉ាក់​សាំង​ជូន​ដល់​បង​ប្អូន​នេះ​ ដោយ​មើល​ឃើញ​ថា​៖ បង​ប្អូន​សមាជិក​អតីត​យុទ្ធជន​គឺ​ជា​ក្រុម​គោល​ដៅ​​មួយ​ អាច​ប្រឈម​មុខ​ងាយ​រង​គ្រោះ ​និង​មាន​ហានិ​ភ័យ​ផង​ដែរ​ ដូច្នេះ​ប្រមុខ​រាជ​រដ្ឋាភិបាល​បាន​កំណត់​ថា​ បង​ប្អូន​សមាជិក​អតីត​យុទ្ធជន​ក៏​មាន​អាទិភាព​ ក្នុង​ការ​ចាក់​វ៉ាក់​សាំង​ ការ​ពារ​ជំងឺ​កូវីដ​១៩​ដែរ​។ ឯកឧត្ដម ​បាន​ថ្លែង​ទៀតថា​៖​ នេះ​គឺ​ជា​ការ​យក​ចិត្ដទុក​ដាក់​គិត​គូរ​ចំពោះ​សុខ​មាលភាព​ សម្រាប់​បង​ប្អូន​សមាជិក​អតីត​យុទ្ធ​យើង​ ពី​សំណា​ក់ប្រមុខ​រាជ​រដ្ឋាភិបាល​កម្ពុជា​ តាម​រយៈ​នៃ​ការ​ផ្ដល់​វ៉ាក់សាំង​នេះ​ឱ្យ​បាន​ទាន់​ពេល​វេលា​។ ឯកឧត្តម គន់ គីម ក៏​បា​នសំណូមព​រ​ដ​ល់​មេបញ្ជា​ការ​, មេ​បញ្ជាការ​រ​ង ដែ​ល​ជាប្រធាន​ អនុ​ប្រធាន​សមាគម​អតីត​យុទ្ធជន​ថ្នាក់​ខេត្ត​ទាំង​អស់​ ត្រូវ​ផ្សព្វផ្សា​យដល់​បង​ប្អូន​ ដែល​ជា​សមាជិក​អតីត​យុទ្ធជន​ ពេល​អញ្ជើញ​ទៅ​ទទួល​ការ​ចាក់​វ៉ាក់​សាំង​ការ​ពារ​ជំងឺ​កូវីដ​១៩ ត្រូវ​អនុវត្ត​ឲ្យ​បាន​តាម​ការណែ​នាំ​របស់​ក្រសួង​សុខា​ភិបាល ​នៅ​វិធាន​​ការ ៣​កុំ ​៣​ការពារ​ ៕


អត្ថបទថ្មីៗ

សេចក្តីប្រកាស

សារជូនពរ

វីដេអូ