ព័ត៌មាន

សម្តេច​ពិជ័យ​សេនា ​ទៀ ​បាញ់ ​ពិនិត្យ​ការ​ដ្ឋាន​សាង​សង់​ស្តូប​ឈ្នះ ​ឈ្នះ ​ខេត្ត​កោះ​កុង​
នាយកដ្ឋានព័ត៌មាន(៣)
65
2057 សម្តេច​ពិជ័យ​សេនា ​ទៀ ​បាញ់ ​ពិនិត្យ​ការ​ដ្ឋាន​សាង​សង់​ស្តូប​ឈ្នះ ​ឈ្នះ ​ខេត្ត​កោះ​កុង

      កាល​ពី​ថ្ងៃ​ទី​១៦ ​ខែ​មករា ​ឆ្នាំ​២០២១ ​សម្តេច​ពិជ័យ​សេនា​ ទៀ ​បាញ់ ​ឧប​នាយក​រដ្ឋ​មន្ត្រី​ រដ្ឋមន្ត្រី​ក្រសួង​ការ​ពារ​ជាតិ​ អម​ដំណើរ​ដោយ ​ឯកឧត្តម ​ជា​រដ្ឋ​លេខា​ធិការ ​អនុ​រដ្ឋ​លេខា​ធិកា​រ ក្រសួង​ការ​ពារ​ជាតិ​ អគ្គ​មេ​បញ្ជា​ការ​រង​ ឯកឧត្តម ​ជា​អគ្គនាយក ​អគ្គនាយក​រង​ អភិបាល ​អភិបាល​រង​ មន្ត្រី​រាជ​ការ ​កង​កំលាំង​ប្រដាប់​អាវុធ​ក្នុង​ខេត្ត​កោះ​កុង​ ជា​ច្រើន​រូប​ទៀត ​បាន​អញ្ជើញ​ទៅ​ពិនិត្យ​ការ​ដ្ឋាន​សាង​សង់​ស្តូប​អនុស្សាវរីយ៍​នយោ​បាយ​ឈ្នះ ឈ្នះ ​នៅ​ខេត្ត​កោះ​កុង​ ដែល​បាន​បើក​ការ​ដ្ឋាន​សាង​សង់​ចាប់​តាំង​ពី​ថ្ងៃ​ទី​៣០ ​ខែ​ឧសភា ​ឆ្នាំ​២០២០​​។

​       នៅ​ក្នុង​ឱកាស​នោះ ​បន្ទាប់​ពី​បាន​អញ្ជើញ​ទៅ​ដល់​ការ​ដ្ឋាន​សាង​សង់​ស្តូប​អនុស្សាវរីយ៍​នយោ​បាយ​ឈ្នះ ឈ្នះ ​នៅ​ខេត្ត​កោះ​កុង ​សម្តេច​ពិជ័យ​សេនា​ ទៀ ​បាញ់ ​ព្រម​ទាំង​ឯកឧត្ត​ម លោក​ជំទាវ​អម​ដំណើរ​ទាំង​អស់​បាន​អញ្ជើញ​ពិនិត្យ​ស្រះ​ទឹក​មួយ​កន្លែង​ ស្ថិត​នៅ​ក្នុង​បរិវេណ​ការ​ដ្ឋាន​សាង​សង់​ស្តូប​ឈ្នះ ​ឈ្នះ​។​

       ក្នុង​ឱកាស​នោះ​ដែរ​ នាយ​ឧត្តម​សេនីយ៍ ​ប៊ុន ​លើត​ រដ្ឋ​លេខា​ធិការ​រដ្ឋ​លេខាធិការ​ក្រសួង​ការ​ពារ​ជាតិ​ និង​ជា​ប្រធាន​អនុគណៈ​កម្មាការ​សាង​សង់​ស្តូប​ ឈ្នះ ​ឈ្នះ ​ខេត្ត​កោះ​កុង ​និងឧត្តម​សេនីយ៍​ឯក​ សឿន ​រឿត ​ទី​ប្រឹក្សា ​សម្តេច​ពិជ័យ​សេនា​ និង​ជា​ប្រធាន​ក្រុម​ការ​ងារ​សាង​សង់​ស្តូប ​ឈ្នះ ​ឈ្នះ ​ខេត្ត​កោះ​កុង បាន​រាយ​ការណ៍​ជូន​ សម្តេច​ពិជ័យ​សេនា​ អំពី​ដំណើរ​ការ​សាង​សង់​ស្តូប​ ឈ្នះ ​ឈ្នះ ​នៅ​ខេត្ត​កោះ​កុង ​ដែល​កង​វិស្វកម្ម​លេខ​ ១៧៨ ​ស្ពាន ​ថ្ន​ល់ នាយក​ដ្ឋាន​វិស្វកម្ម ​ក្រសួង​ការ​ពារ​ជាតិ​បានខិ​ត​ខំ​សាង​សង់​ ធ្វើ​ផ្លូវ ​និង​ជីក​ស្រះ​ក្នុង​ពេល​កន្លង​មក​។​ សូម​បញ្ជាក់​ថា​៖​ ស្រះ​ទឹក​ដែល​បាន​ជីក​ក្នុង​បរិវេណ​ស្តូប​ឈ្នះ ​ឈ្នះ ​ខេត្ត​កោះ​កុង​ មាន​ទំហំ​ប្រមាណ ​៤​ហិក​តា​ ស្ថិត​ជាប់​ផ្លូវ​ជាតិ​លេខ​៤៨​​។ ​ស្រះ​នេះ​មាន​ជម្រៅ​ចាប់​ពី​១ម​ ដល់​៤​ម ដែល​ផ្ទៃ​បាត​ស្រះ ​មាន​សភាព​មិន​ស្មើ​គ្នា​ដោយ​សារ​មាន​ថ្ម​ច្រើន​នៅ​ខាង​ក្រោម ​ដែល​បាន​ធ្វើ​អោយ​មាន​ការ​លំបាក ​ក្នុង​ការ​ជីក​ស្រះ​នេះ​។ ក្រៅ​ពី​នេះ​កម្លាំង​កង​វិស្វកម្ម​លេខ​ ១៧៨ ​ស្ពាន​ ថ្នល់​ ក៏​បាន​កសាង​ផ្លូវ ​និង​ទំនប់​ជុំ​វិញ​ស្រះ​ទឹក​ធំ​នេះ​ ដែល​នៅ​ជាប់់​ថ្នល់​ជាតិ​លេខ​៤៨ ​មាន​ប្រវែង ​៩៨០​ម ​ទទឹង​ ៥​ម​។ ​ក្រៅ​ពី​ជីក​ស្រះ ​កម្លាំង​វិស្វកម្ម​ក៏​បាន​ចុះ​ខួង​អណ្ដូង​ទឹក​ចំនួន​១​កន្លែង​​ដោយ​មាន​មុខ​កាត់​ ០.១៥ម ​និង​​ជម្រៅ​ ៨៥ម សម្រេច​បាន​ ១០០% ​ផង​ដែរ​​។

សម្តេច​ពិជ័យ​សេនា ​ទៀ ​បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ​ពិនិត្យ​ការ​ដ្ឋាន​សាង​សង់​ស្តូប​ឈ្នះ ​ឈ្នះ ​ខេត្ត​កោះ​កុង


​       បន្ទាប់​ពី​បាន​ត្រួត​ពិនិត្យ​ស្រះ​ទឹក​រួច​មក​ សម្តេច​ពិជ័យ​សេនា​ ទៀ ​បាញ់ ​ព្រម​ទាំង ​ឯកឧត្តម​ លោក​ជំទាវ​អម​ដំណើរ​ទាំង​អ​ស់ ក៏​បា​នអញ្ជើញ​ឡើង​ទៅ​លើ​កំពូល​ភ្នំ​ ដើម្បី​ពិនិត្យ​មើល​ទី​តាំង​ដែល​ត្រូវ​រៀប​ចំ​ ទី​សក្ការៈ​បូជា​សាសនា​ផង​ដែរ​។ ​នៅ​លើ​កំពូល​ភ្នំ​ ដែល​ជា​ទីតាំង​សាង​សង់​ស្តូប ឈ្នះ​ ឈ្នះ ​ខេត្ត​កោះ​កុង​នេះ ​គឺ​ជា​ចំនុច​ខ្ពស់ ​ដែល​អាច​មើល​ឃើញ​ទិដ្ឋភាព​ក្រុង​ខេមរ​ភូមិន្ទ ​ទី​រួម​ខេត្ត​កោះ​កុង​ និង​ផ្ទៃ​សមុទ្រ​ដ៏​ធំ​ល្វឹង​ល្វើង​។ ​សូម​បញ្ជាក់​ផង​ដែល​ថា​៖​ ស្ដូប​អនុស្សាវរី​យ៍នយោ​បាយ​ឈ្នះ​ ឈ្នះ ​ខេត្ត​កោះ​កុង ​បាន​ប្រារព្ធ​​ពិ​ធីបញ្ចុះ​បឋម​​​សិ​លា​សម្ពោធ​ការ​ដ្ឋាន​សាង​សង់​កាល​ពី​ថ្ងៃទី​៣០ ​ខែឧ​សភា​ ឆ្នាំ​២០២០ ​ក្រោម​អធិបតី​ភាព​ដ៏​ខ្ពង់​ខ្ពស់​របស់​ សម្ដេច​ពិជ័យ​សេនា​ ទៀ បាញ់ ​ឧបនាយក​រដ្ឋមន្ត្រី ​រដ្ឋមន្ត្រី​ក្រសួង​ការ​ពារ​ជាតិ​ និង​លោក​ជំទាវ​។​ សំណង់​ស្ដូប​អនុស្សាវរីយ៍​នយោបាយ ​ឈ្នះ​ ឈ្នះ ​ខេត្ត​កោះ​កុង ​ត្រូវ​បាន​សាង​សង់​នៅ​លើ​ផ្ទៃ​ដី​ប្រមាណ​ ២១៦​ហិក​តា​។​ បន្ទាប់​ពី​សាង​សង់​ហើយ​ស្តូប​ឈ្នះ ​ឈ្នះ ​ខេត្ត​កោះ​កុង​​នេះ​រួច​ ទី​នេះ​នឹ​ងក្លាយ​ជា​សំណង់​ប្រវត្តិ​សាស្ត្រ​ នៅ​ក្នុង​ខេត្ត​កោះ​កុង ​និង​ជា​តំបន់​សិក្សា​ស្រាវ​ជ្រាវ​ ប្រវត្តិ​សាស្ត្រ​ ដែល​ទាក់​ទង​ទៅ​នឹ​ង​នយោ​បាយ​ឈ្នះ ឈ្នះ ​នៅ​ក្នុង​ខេត្ត​កោះ​កុង​ និង​ជា​តំបន់​ទេសចរណ៍ ​វប្បធ៌ម​ និង​សាសនា ​ផង​ដែរ​។

       បន្ទាប់​ពី​បាន​អញ្ជើញ​ឡើង​ទៅ​លើ​កំពូល​ភ្នំ​ ដើម្បី​ពិនិត្យ​មើល​ទីតាំង​ដែល​ត្រូវ​រៀប​ចំ​​ទី​​សក្ការៈ​បូជា​សាសនា​រួច​មក​ សម្តេច​ពិជ័យ​សេនា​ ទៀ ​បាញ់ ​ព្រម​ទាំង ​ឯកឧត្តម​ លោក​ជំទាវ​ អម​ដំណើរ​ទាំង​អ​ស់ ក៏​បាន​អញ្ជើញ​ចុះ​ទៅ​ពិនិត្យ​ការដ្ឋាន​សាង​សង់​ស្តូប​ឈ្នះ ឈ្នះ ដែល​ចាប់​តាំង​ពី​ថ្ងៃ​បើ​ក​ការ​ដ្ឋាន​ រហូត​មក​ដល់​ពេល​នេះ ​បាន​ចាក់​គ្រិះ​ជើង​តាង​រួច​រាល់ ​១០០% ​ហើយ​​។ ក្រៅ​ពី​នេះ​ កម្លាំង​កង​វិស្វកម្ម​លេខ ​១៧៨ ​ស្ពាន​ ថ្នល់​ បាន​រៀប​ចំ​ប្រព័ន្ធ​ផ្លូវ​ថែ​ទាំ​ និង​ជួស​ជុល​ផ្លូវ​នានា ​រៀប​ចំ​ការិយា​ល័យ​ប្រចាំ​ការ​ដ្ឋាន ​រៀប​ចំ​ប៉ុស្ដ៍​យាម​ ដង​ទង់​ជាតិ ​និង​ប្រព័ន្ធ​បញ្ចៀស​ទឹក​ភ្លៀង​ក្នុង​ការ​ដ្ឋាន​ ដាំ​ដើម​ឈើ​លំអរ​មុខ​ផ្ទាំង​ប៉ាណូ​ ប៉ុស្ដ៍​យាម​ និង​ការិយា​ល័យ​។​ កម្លាំង​កង​វិស្វកម្ម​លេខ ​១៧៨​ ស្ពាន ​ថ្នល់​ បាន​រៀប​ចំ​ប្រព័ន្ធ​ផ្លូវ​ចំនួន ​៥​ខ្សែ ​ដោយ​ជួស​ជុល​ផ្លូវ​ចាស់​បាន​ចំនួន ​២​ខ្សែ ​និង​បង្កើត​ផ្លូវ​ថ្មី​បាន​៣​ខ្សែ​។​

        ឯកឧត្តម ​សឿន ​រឿត​ ប្រធាន​ក្រុម​ការ​ងារ​សាង​សង់​ស្តូប​ ឈ្នះ​ ឈ្នះ ​ខេត្ត​កោះ​កុង ​បាន​បញ្ជាក់​អោយ​ដឹង​ថា​៖​ ប្លង់​ស្ថាបត្យកម្ម ​និង​រចនា​សម្ព័ន្ធ​សាង​សង់​ស្តូប​ ឈ្នះ ​ឈ្នះ ​ខេត្ត​កោះកុ​ង​ បាន​បង្កើត​ឡើង​តាម​ទម្រង់​វិមាន ​​ឈ្នះ ​ឈ្នះ ​នៅ​រាជ​ធានី​ភ្នំពេញ ​ដែលមា​ន​ទម្រង់ ​៣​សំខាន់​ គឺ ​៣- ៥- ៧ បង្ហាញពី​គោល​ការណ៍​ធានា​៣​យ៉ាង​ នៃ​នយោបាយ ​ឈ្នះ ​ឈ្នះ, ​​​កត្តា​​ទាំ​ង​​៥​ចំណុច ​នៃ​យុទ្ធ​សាស្ត្រ​ឌីហ្វីដ​ DIFID​ និងកត្តាទាំង៧ នៃ​ជ័យ​ជម្នះ​ប្រកប​ដោយ​ប្រសិទ្ធ​ភាព​ខ្ពស់​របស់​នយោ​បាយ​ឈ្នះ ​ឈ្នះ​។

​        សម្តេច​ពិជ័យ​សេនា​ ​ទៀ ​បាញ់ ​បាន​សំ​ដែង​ការ​អបអរ​សាទរ​ចំពោះ​លទ្ធផល​ការ​ងារ​ ដែល​កម្លាំង​កង​វិស្វ​កម្ម​លេខ​ ១៧៨ ​ស្ពាន​ ថ្នល់​ ខិត​ខំ​សំរេច​បាន​ក្នុង​ការ​សាង​សង់​ស្តូប​ ឈ្នះ ​ឈ្នះ ​ខេត្ត​កោះ​កុង​។ សម្តេច​ពិជ័យ​សេនា​ បាន​ជំរុញ​អោយ​ក្រុម​ការ​ងារ​ស្រាវ​ជ្រាវ​ប្រវត្តិ​សាស្ត្រ​យោធា ​បន្ត​កិច្ច​ការ​ស្រាវ​ជ្រា​វ និង​សម្ភាសន៍​ បន្ត​ទៀត​ដើម្បី​ប្រមូល​ផ្តុំ​នូវ​តាក់​តាង​នា​នា​ ដើម្បី​តំកល់​ទុក​នៅ​ស្តូប​អនុស្សាវរីយ៍​នយោ​បាយ​ឈ្នះ ឈ្នះ ​នៅ​ខេត្ត​កោះ​កុង​។ គួរ​កត់​សំគាល់ថា​៖​ នៅ​ខេត្ត​កោះ​កុង​ ក្រោម​ម្លប់​សន្តិភាព​ ដែល​ប្រទេស​កម្ពុ​ជាទទួល​បាន​សុខ​សន្តិភាព​ពេញ​លេញ ​ចាប់​តាំង​ពី​ឆ្នាំ​១៩៩៨​ម​ក បាន​ធ្វើ​ឲ្យ​ខេត្ត​កោះ​កុង ​មាន​ឱកាស​អភិវឌ្ឍ​ទាំង​ហេដ្ឋា​រចនា​សម្ព័ន្ធ​រូប​វ័ន្ត ​អរូប​វ័ន្ត​ និង​ការ​វិនិយោគ ​គួរ​ឲ្យ​កត់​សម្គាល់​។​ ជា​មួយ​នឹង​សមិទ្ធិ​ផល​ដ៏​ថ្លៃថ្លា​ដែល​ខេត្ត​កោះ​កុង​ទទួល​បាន​ ក្នុង​ពេល​កន្ល​ង​មក ​នា​ពេល​បច្ចុប្បន្ន​នេះ​ មន្ត្រី​រាជ​ការ​ កង​កំលាំង​ប្រដាប់​អាវុធ និ​ង​ប្រជាពល​រដ្ឋ​ទាំង​មូល ​ទូទាំង​ខេត្ត​កោះ​កុង​ មាន​សេចក្តី​រំភើប​សប្បាយ​រីក​រាយ​ និង​ពោ​ពេញ​ដោយ​មោទនៈភាព​ជា​ទី​បំផុត ​ដោយ​ខេត្ត​កោះ​កុង​នឹង​ទទួល​បាន​សមិទ្ធិ​ផល​ដ៏​ថ្លៃថ្លា​ជា​ប្រវត្តិ​សាស្ត្រ​ មិន​អាច​កាត់​ថ្លៃ​បាន​មួយ​បន្ថែម​ទៀត ​គឺ​ស្តូប​អនុស្សាវរីយ៍​នយោ​បាយ​ឈ្នះ ឈ្នះ​ នៅ​​ខេត្ត​កោះកុ​ង ​ដែល​បាន​កំពុង​ដំណើរ​ការ​សាង​សង់​​នេះ​។​ ហើយ​ស្តូប​អនុស្សាវរីយ៍​នយោ​បាយ​ឈ្នះ ឈ្នះ ​នៅ​ខេត្ត​កោះ​កុង​ដ៏​ថ្លៃថ្លា​នេះ ​នឹង​ផ្តល់​នូវ​កិត្តិយស​ និង​មុខ​មាត់​ថ្មី​​បន្ថែម​ទៀត​ លើ​ទឹក​ដី​ខេត្ត​កោះ​កុង ​៕​


អត្ថបទថ្មីៗ

សេចក្តីប្រកាស

សារជូនពរ

វីដេអូ