ឯកឧត្តម ម៉ឹង សំផន ដឹកនាំក្រុមកីឡាករក្រសួងការពារជាតិ ប្រកួតកីឡាវាយសី មិត្តភាព ដើម្បីអបអរខួបអនុស្សាវរីយ៍លើកទី៤២ ទិវាជ័យជម្នះ ៧ មករា ឆ្នាំ២០២១
ក្នុងឱកាសចូលរួមអបអរសាទរខួបលើកទី៤២ ទិវាជ័យជម្នះ ៧មករា (៧មករា១៩៧៩-៧មករា២០២១) ឯកឧត្តម នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ បានដឹកនាំក្រុមកីឡាករក្រសួងការពារជាតិ ប្រកួតកីឡាវាយសី មិត្តភាព ដើម្បីអបអរខួបអនុស្សាវរីយ៍លើកទី៤២ ទិវាជ័យជម្នះ ៧ មករា ឆ្នាំ២០២១ ដែលជាថ្ងៃបានធ្វើឲ្យប្រជាជនកម្ពុជាទូទាំងប្រទេស បានរស់រានមានជីវិតឡើងវិញ និងមានអ្វីៗគ្រប់បែបយ៉ាងមកដល់សព្វថ្ងៃនេះ។
ឯកឧត្តម ម៉ឹង សំផន បានលើកឡើងថា៖ ថ្ងៃជ័យជំនះ ៧មករា ជាថ្ងៃជ័យជំនះរបស់យើងទាំងអស់គ្នា។ សម្រាប់ប្រជាជនកម្ពុជា ថ្ងៃនេះកាលពី៤២ឆ្នាំមុន ជាថ្ងៃដែលយើងបានជួបជុំក្រុមគ្រួសារយើងជាថ្មី និងក៏ជាថ្ងៃដែលយើងដណ្តើមបានមកវិញនូវសិទ្ធិ និងសេរីភាពពេញលេញពីរបបដ៏ខ្មៅងងឹត នៃបនប្រល័យពូជសាសន៍។ ឯកឧត្តម បានថ្លែងថា៖ «ថ្ងៃនេះ កាលពី៤២ឆ្នាំមុន ក៏ជាថ្ងៃដែលយុវជនយើងជំនាន់មុន សម្រេចបាននូវលទ្ធផលដ៏ត្រចះត្រចង់ ជូនជាតិ និងមាតុភូមិ ដែលភាពជោគជ័យនេះ កើតចេញពីការលះបង់ ការដាក់ប្រយោជន៍បុគ្គលម្នាក់ៗដោយឡែក ហើយមករួបរួមគ្នា ពុះពារដើម្បីសម្រេចនូវបុព្វហេតុរួមខាងលើ។ ដោយយល់ច្បាស់ពីពលិកម្មមិនអាចកាត់ថ្លៃបានរបស់យុវជនជំនាន់មុន ក្នុងបុព្វហេតុស្វែងរកសុខសន្តិភាពជូនជាតិ និងមាតុភូមិ យុវជនជំនាន់ក្រោយក៏តោងចងចាំ និងបេ្តជ្ញាឲ្យបានមុះមុតក្នុងការការពារឲ្យបានដាច់ខាតនូវភាពសុខដុមរមនា បូរណភាពទឹកដី និងអធិបតេយ្យភាពជាតិយើង បន្តទៅថ្ងៃអនាគត។
សូមបញ្ជាក់ថា៖ នៅថ្ងៃទី០៧ ខែមករា ឆ្នាំ២០២១នេះ ជាខួបលើកទី៤២ឆ្នាំ នៃថ្ងៃរំដោះ៧មករា។ នៅឆ្នាំនេះ រដ្ឋាភិបាល និងគណបក្សប្រជាជនកម្ពុជា ពុំបានរៀបចំអង្គមិទ្ទិញឱ្យបានធំដុំដូចសព្វដងនោះទេ ដោយសារតែការរីករាលដាលជំងឺកូវីដ១៩ ដែលបន្តពីឆ្នាំមុន។ ទោះជាយ៉ាងនេះក្តី នៅតាមបណ្តាញសង្គម Facebook ទាំងអ្នកនយោបាយ យុវជន និងប្រជាពលរដ្ឋ បានបង្ហោះសាទរដល់ខួបលើកទី៤២ឆ្នាំ នៃថ្ងៃកំណើតទី២ «៧មករា» ផងដែរ ៕
