នាយឧត្តមសេនីយ៍ វង្ស ពិសេន អនុញ្ញាតឲ្យអនុព័ន្ធយោធាមីយ៉ាន់ម៉ាប្រចាំកម្ពុជា ទើបចប់អាណត្តិចូលជួបសម្តែងការគួរសម និងជម្រាបលា
កាលពីរសៀលថ្ងៃទី២៧ ខែវិច្ឆិកា ឆ្នាំ២០២០ក្នុងសប្តាហ៍នេះ នាយឧត្តមសេនីយ៍ វង្ស ពិសេន អគ្គមេបញ្ជាការ នៃកងយោធពលខេមរភូមិន្ទ បានអនុញ្ញាតឲ្យ ឧត្ដមសេនីយ៍ត្រី វីន កូកូ អនុព័ន្ធយោធាមីយ៉ាន់ម៉ា ដែលទើបបញ្ចប់អាណត្តិការទូតនៅកម្ពុជា ចូលជួបសម្តែងការគួរសម និងជម្រាបលា។
នៅក្នុងជំនួបដែលបានធ្វើឡើងនៅ អគ្គបញ្ជាកាដ្ឋាននោះ ឧត្ដមសេនីយ៍ត្រី វីន កូកូ បានគូសបញ្ជាក់ថា៖ ក្នុងរយៈពេល៣ឆ្នាំ ដែលលោកបានរស់នៅ និងបំពេញការងារជាអនុព័ន្ធយោធា លោកបានសិក្សាស្រាវជ្រាវជាច្រើនពីវប្បធម៌ និងបេតិកភណ្ឌដ៍តម្លៃរបស់កម្ពុជា។ ជាមួយនោះ លោកអនុព័ន្ធយោធាមីយ៉ាន់ម៉ា ក៏បានសង្កេតឃើញ និងវាយតម្លៃខ្ពស់ នូវសន្ទុះរីកចម្រើនលើគ្រប់វិស័យ ដែលកម្ពុជាសម្រេចបាន ក្រោមការដឹកនាំរបស់រាជរដ្ឋាភិបាលដែលមាន សម្តេចតេជោ ហ៊ុន សែន ជាប្រមុខ ហើយកម្ពុជាមានស្ថិរភាព និងសុខសន្តិភាពពេញផ្ទៃប្រទេស។ អនុព័ន្ធយោធាមីយ៉ាន់ម៉ា បានថ្លែងអំណរគុណយ៉ាងជ្រាលជ្រៅជូន សម្តេចតេជោ ហ៊ុន សែន ព្រមទាំងប្រជាជនកម្ពុជា ដែលបានជួយឧបត្ថម្ភម៉ាសចំនួនជាង២លាន និងបរិក្ខាពេទ្យមួយចំនួនទៀតដល់ប្រទេសមីយ៉ាន់ម៉ា ដើម្បីការពារជំងឺរាតត្បាតកូវីដ១៩។ ឧត្ដមសេនីយ៍ត្រី ចាត់ទុកការបរិច្ចាគរបស់សម្តេចតេជោនាពេលនេះ គឺពិតជាមានតម្លៃ និងឆ្លុះបញ្ចាំងនូវចំណងមិត្តភាពពិតប្រាកដ ដែលកម្ពុជា មានចំពោះមីយ៉ាន់ម៉ា នៅក្នុងកាលៈទេសៈដ៏លំបាកនេះ។
ជាកិច្ចឆ្លើយតប ឯកឧត្ដម វង្ស ពិសេន បានវាយតម្លៃខ្ពស់ចំពោះបេសកកម្មការទូតរបស់អនុព័ន្ធយោធាមីយ៉ាន់ម៉ា ដែលធ្វើឲ្យទំនាក់ទំនងកិច្ចសហប្រតិបត្តិរវាងកងទ័ពប្រទេសទាំងពីរ កាន់តែត្រូវបានពង្រឹង និង ពង្រីកជាបន្តបន្ទាប់។ ឯកឧត្ដម បានរំលឹកថា៖ ប្រទេសទាំងពីរ (កម្ពុជា-មីយ៉ាន់ម៉ា) មានប្រពៃណី និងទំនាក់ទំនងកិច្ចសហប្រតិបត្តិការជាមួយគ្នា តាំងពីឆ្នាំ១៩៥៥ ហើយនៅឆ្នាំ២០២០នេះ គឺជាខួបលើកទី៦៥ នៃការបង្កើតទំនាក់ទំនង រវាងប្រទេសទាំងពីរផងដែរ។ ឯកឧត្ដម វង្ស ពិសេន បានសម្តែងការអបអរសាទចំពោះការបោះឆ្នោតសកលនៅប្រទេសមីយ៉ាន់ម៉ា ដែលបានប្រព្រឹត្តទៅយ៉ាងរលូន សម្រាប់ដល់ការត្រួសត្រាយផ្លូវសន្តិភាព ការបង្រួបបង្រួមជាតិ និងស្ថិរភាពនៅក្នុងប្រទេស។ ឯកឧត្ដម បានបញ្ជាក់ទៀតថា៖ ថ្វីត្បិតកម្ពុជាជាប្រទេសតូចហើយក្រ ក៏សម្តេចតេជោ ហ៊ុន សែន ក្នុងនាមរាជរដ្ឋាភិបាលកម្ពុជា តែងបានយកចិត្តទុកដាក់ដល់កិច្ចការមនុស្សធម៌ ជួយសង្រ្គោះជីវិតមនុស្សនៅលើនាវា វេស ស្តែនដាម (Westerdam) ដោយមិនប្រកាន់ជាតិសាសន៍ ហើយថ្មីៗនេះ សម្តេចតេជោ ហ៊ុន សែន នៅតែបន្តជួយឧបត្ថម្ភម៉ាស និងសម្ភារបរិក្ខាពេទ្យមួយចំនួន ដល់បណ្តាប្រទេសនៅក្នុងតំបន់ ក្នុងនោះមាន ប្រទេសឡាវ, មីយ៉ាន់ម៉ា និងទីម័រ ក្នុងស្មារតីមិត្តភាព សាមគ្គីភាពយូរអង្វែង ក៏ដូចជាការរួមដៃគ្នា ក្នុងកិច្ចខិតខំប្រឹងប្រែងបង្ការការរីករាលដាលជំងឺកូវីដ ១៩ ៕
