ព័ត៌មាន

នាយ​ឧត្តម​សេនីយ៍ ​វង្ស​ ពិសេន ​បើក​កិច្ច​ប្រជុំ​បូក​សរុប​លទ្ធផ​ល​ការ​ងារ​ ឆ្នាំ​២០១៩​ និង​ទិស​ដៅ​អនុវត្ត ​ឆ្នាំ​២០២០​ របស់​កង​យោធ​ពល​ខេមរ​ភូមិន្ទ​
នាយកដ្ឋានព័ត៌មាន(៣)
111
1412 នាយ​ឧត្តម​សេនីយ៍ ​វង្ស​ ពិសេន ​បើក​កិច្ច​ប្រជុំ​បូក​សរុប​លទ្ធផ​ល​ការ​ងារ​ ឆ្នាំ​២០១៩​ និង​ទិស​ដៅ​អនុវត្ត ​ឆ្នាំ​២០២០​ របស់​កង​យោធ​ពល​ខេមរ​ភូមិន្ទ​

     នាយឧត្តមសេនីយ៍ វង្ស ពិសេន អគ្គមេបញ្ជាការ​កងយោធពលខេមរភូមិន្ទ នៅព្រឹកថ្ងៃទី២១ ខែមករា ឆ្នាំ​២០២០​នេះ​ បាន​អញ្ជើញ​ជា​អធិបតីភាព ​បើកកិច្ចប្រជុំបូកសរុបលទ្ធផលការងារ ឆ្នាំ២០១៩ និងទិសដៅអនុវត្ត ឆ្នាំ​២០២០​ របស់​កងយោធពល​ខេមរ​ភូមិន្ទ​។ ពិធីនេះ​បានធ្វើឡើងនៅបញ្ជាការដ្ឋានកងយោធពលខេមរភូមិន្ទ  ដោយ​មាន​ការ​អញ្ជើញចូលរួមពីសំណាក់​ថ្នាក់ដឹកនាំអគ្គមេបញ្ជាការរង ព្រមទាំងនាយទាហាន នាយទាហានរង និងពលទាហាន នៃ​កង​យោធ​ពល​ខេមរ​ភូមិន្ទយ៉ាងច្រើនផងដែរ។

នាយឧត្តមសេនីយ៍ វង្ស ពិសេន អគ្គមេបញ្ជាការ​កងយោធពលខេមរភូមិន្ទ


     បើ​តាម​សន្ទរកថា​ របស់​នាយឧត្តមសេនីយ៍ វង្ស ពិសេន បាន​ឱ្យ​ដឹង​ថា​៖ កិច្ចប្រជុំនេះ គឺដើម្បីវាយតម្លៃអំពីចំណុច​ខ្លាំង ​និងចំ​ណុច​ខ្សោយ​ នៃ​ការ​អនុវត្ត​ការងា​រ​រយៈពេលមួយឆ្នាំកន្លងទៅ និងពិភាក្សាផ្លាស់ប្តូរយោបល់ដក​ពិសោធន៍ កែលម្អចំណុចខ្វះខាត បញ្ហាប្រឈមនានាដែលមាន ព្រមទាំងដាក់ចេញ នូវទិសដៅភារកិច្ចឱ្យ កាន់​តែ​សុក្រឹត្យ​សម្រាប់​ពេល​ខាង​មុខ ​ស្របពេល​ដែល​កង​យោធពលខេមរភូមិន្ទ បានបន្តភារកិច្ចដោយម៉ឺងម៉ាត់ ការពារខឿនឯករាជ្យយ៉ាងរឹងមាំ រក្សាបាននូវសន្តិភាព ស្ថិរភាព សន្តិសុខ និងសណ្ដាប់ធ្នាប់សង្គម រួមចំ​ណែក​យ៉ាង​សកម្ម ​ជា​មួយ​រាជ​រដ្ឋាភិបាល​ក្នុង​ការ​កសាងជាតិ ​និង​លើក​កិត្យានុភាព​របស់​កម្ពុជា​លើ​ឆាក​អន្តរ​ជាតិ​។​ នាយឧត្តមសេនីយ៍ បានបន្តថា៖ កងយោធ​ពលខេមរភូមិន្ទ បានរួមសហការជាមួយនឹងកងនគរបាលជាតិ ​ធ្វើជាកម្លាំងស្នូលក្នុងការរក្សាសន្តិសុខ សណ្ដាប់ធ្នាប់សង្គម ជាពិសេសបានរួមសហការយ៉ាងជិតស្និទ្ធ ជា​មួយ​សមត្ថកិច្ចគ្រប់លំដាប់ថ្នាក់ ទប់ស្កាត់ប្រកបដោយប្រសិទ្ធភាព នូវការប៉ុនប៉ងធ្វើរដ្ឋប្រហារផ្តួលរំលំរាជរដ្ឋា​ភិបាល​ស្រប​ច្បាប់​របស់​ពួក​ឧទ្ទាម​ កាលពីអំឡុងខែវិច្ឆិកា ឆ្នាំ២០១៩ កន្លងទៅ។ កងយោធពលខេមរភូមិន្ទ រួមជាមួយ​ប្រជាជននៅទូទាំងប្រទេស​ បានអបអរសាទរយ៉ាងក្លៀវក្លាបំផុតចំពោះខួបគម្រប់៦៦ឆ្នាំ នៃទិវាឯក​រាជ្យ​ជាតិ ​និង​កំណើត​កងយោធពល​ខេមរភូមិន្ទ​ដ៏មហោឡារិក ព្រះរាជពិធីបុណ្យអុំទូក សំពះព្រះខែ និងអក​អំបុក​​ដ៏​សប្បាយ​រីករាយ​ គួប​ជា​មួយ​នឹង​ការអបអរខួបលើកទី៤១ នៃ​ការបង្កើតរណៈសិរ្សសាមគ្គីសង្គ្រោះជាតិ ខួប​លើក​ទី២១​ នៃ​ការ​បញ្ចប់សង្គ្រាមស៊ីវិលនៅកម្ពុជា និងការអនុវត្តដោយជោគជ័យនយោបាយឈ្នះ-ឈ្នះ ដែលនាំ​មក​នូវ​សន្តិភាពពេញលេញ និងការអភិវឌ្ឍ។ នាយ​ឧត្តមសេនីយ៍ បានលើកឡើងថា៖ នាយទាហាន នាយទាហានរង និងពលទាហានទាំងអស់ ក្នុងកង​យោធ​ពលខេមរភូមិន្ទ សូមសម្តែងនូវការដឹងគុណ ចំពោះកិច្ចខិតខំប្រឹងប្រែង និងអបអរសាទរយ៉ាងក្លៀវក្លា ចំពោះ​សមិទ្ធ​ផល​យ៉ាង​ធំធេង លើគ្រប់វិស័យ​របស់​រាជរដ្ឋា​ភិបាល​កម្ពុជា​ ដែល​មាន​ សម្តេច​អគ្គ​មហា​សេនា​បតី​តេ​ជោ​​ ហ៊ុន ​សែន​ នាយក​រដ្ឋមន្ត្រី​ នៃ​ព្រះ​រាជាណាចក្រ​កម្ពុជា ជាប្រមុខ​លើការ​ដឹក​នាំ​នាវា​កម្ពុជា​ ឱ្យ​មាន​សន្តិភាព ​និង​អភិវឌ្ឍន៍​​។​ នៅ​ក្នុង​ឱកាស​នេះ ​នាយ​ឧត្តម​សេនីយ៍ ​វង្ស​ ពិសេន​ បាន​ថ្លែង​ការ​កោត​សរសើរ ​និង​វាយតម្លៃខ្ពស់ចំពោះថ្នាក់​ដឹក​នាំ ​នាយទាហាន ​នាយ​ទាហាន​រ​ង និង​ពល​ទាហាន​ទូទាំងក​ងយោធពលខេមរ​ភូមិន្ទ​ទាំង​អស់​ ដែលបាន​ខិតខំប្រឹងប្រែងសម្រេចបានរាល់នូវភារកិច្ច​ ដែលរាជរដ្ឋាភិបាលបានប្រគល់ជូន​។​ ព្រមជាមួយនេះ កិច្ចប្រជុំ​ក៏​សូម​ថ្លែង​អំណរគុណដោយ​ស្មោះ​ អស់ពីចិត្ត​ចំពោះ សប្បុរសជន ក្រុមហ៊ុនឯកជន អង្គភាពសម្ព័ន្ធមេត្រីភាព​ទាំង​ឡាយ ​ដែល​បានរួមចំ​ណែកយ៉ាងធំធេង ក្នុងការកសាងកងយោធពលខេមរភូមិន្ទ​ ក្នុងបុព្វហេតុជាតិនិង​ប្រជាជ​នយើង​។​

     បើតាម​សន្ទរក​ថា​របស់ ​នាយឧត្តមសេនីយ៍ វង្ស ពិសេន ដដែល​បាន​បញ្ជាក់​ថា​៖ យើង​ទាំងអស់គ្នាជាកង​យោធ​ពល​ខេមរភូមិន្ទ មានភារកិច្ចដ៏ថ្លៃថ្លា​ ការពាររាជរដ្ឋាភិបាលស្របច្បាប់ ដែលដឹកនាំដោយ សម្ដេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រ​កម្ពុជា ​និង​ប្រឆាំង​ដាច់​ខាត​ពួក​អមិត្ត​ទាំង​ឡាយ ​ដែល​មាន​បំណង​បំផ្លិច​បំផ្លាញ​សន្តិភាព​ និង​ការ​អភិវឌ្ឍ​នៅ​កម្ពុជា​នាពេល​បច្ចុប្បន្ន​នេះ​។ ដូច្នេះ​ដើម្បីប្រមូលធាតុចូល  និង​ជា​គុណ​ប្រយោជន៍ដល់ការដឹកនាំបញ្ជា និងគ្រប់គ្រងកងយោធពលខេមរភូមិន្ទ នៅក្នុងកិច្ចប្រជុំបូកសរុប នា​ឱកាស​នេះ​ នាយឧត្តមសេនីយ៍ បានស្នើសុំឱ្យសមាជិកសមាជិកា ចូលរួមពិភាក្សាលើរបាយការណ៍ បូកសរុបលទ្ធផលការងារ ឆ្នាំ២០១៩ និងទិសដៅអនុវត្ត ឆ្នាំ២០២០ ដោយផ្តោតការយកចិត្តទុកដាក់​ ធ្វើការសន្និដ្ឋានអំពីសភាពការណ៍ទូទៅ ក្នុងកងយោធពលខេមរភូមិន្ទ ក្នុងបរិការណ៍នៃការប្រែប្រួលសភាពការណ៍​ នៅ​ក្នុង​តំបន់ ​និង​ពិភព​លោក​ នា​ឆ្នាំ២០២០​នេះ។​ ទន្ទឹមនឹងនេះ កិច្ចប្រជុំរបស់យើងក៏ត្រូវយកចិត្តទុកដាក់ ពិនិត្យនូវការកំណត់​ទិស​ដៅ​ភារកិច្ចសម្រាប់ពេលខាងមុខ តើមានអ្វីត្រូវបំពេញបន្ថែម ឬក៏មានសំណូមពរអ្វីចាំបាច់ ដើម្បីប្រសិទ្ធ​ភាព​ការ​ងារ​នៅ​តាម​ក​ងឯកភាព​ និង​ស្ថាប័ន​មុនពេលផ្សព្វផ្សាយ និងចាត់តាំងអនុវត្ត?។ សូម​រំលឹ​កនូវ​ប្រសាសន៍​របស់​ សម្ដេចតេជោ ហ៊ុន សែន នាយករដ្ឋមន្រ្តីនៃកម្ពុជាថា៖ ខឿនការពារេជាតិរបស់កម្ពុជា ជាខឿនការពារជាតិ ដែលផ្អែកលើប្រជាជជន ដោយមានកងយោធពលខេមរភូមិន្ទជាស្នូល។ កងទ័ពកើតឡើងដោយ​សារ​ប្រជាជន​ជា​របស់​ប្រជាជន បម្រើ​ប្រជាជន និងរួមសុខរួមទុក្ខជាមួយនឹងប្រជាជន នៅគ្រប់កាលៈទេសៈ។ ពេល​ប្រជាជន​មាន​ទុក្ខលំបាក​ ​កងទ័ពត្រូវមានមុខជានិច្ច​ជា​មួយ​ប្រជាជន​ ហើយរាល់ជ័យជំនះរបស់កងទ័ព ក៏ជា​ជ័យ​ជំនះរបស់ប្រជាជនដែរ ៕


អត្ថបទថ្មីៗ

សេចក្តីប្រកាស

សារជូនពរ

វីដេអូ