ឯកឧត្ដម នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិន្ទ និងជាអនុប្រធានគណៈកម្មាធិការប្រយុទ្ធប្រឆាំងគ្រឿងញៀន ក្រសួងការពារជាតិ បានអញ្ជើញជាអធិបតីភាព ក្នុងពិធីបើកវគ្គបំប៉នជនបង្គោល ក្នុងការអប់រំការប្រយុទ្ធប្រឆាំងគ្រឿងញៀន ក្នុងកងយោធពលខេមរភូមិន្ទ នាព្រឹកថ្ងៃទី០៤ ខែកញ្ញា ឆ្នាំ២០២៤ នៅទីស្ដីការក្រសួងការពារជាតិ។
ក្នុងសុន្ទរកថាស្វាគមន៍របស់ ឧត្តមសេនីយ៍ត្រី ចាន់ សុវណ្ណ នាយករង នាយកដ្ឋាននីតិកម្ម ក្រសួងការពារជាតិ និងជាប្រធានគណៈគ្រប់គ្រងវគ្គបានឲ្យដឹងថា៖ វគ្គបំប៉នជនបង្គោលក្នុងការអប់រំការប្រយុទ្ធប្រឆាំងគ្រឿងញៀន ក្នុងកងយោធពលខេមរភូមិន្ទនាពេលនេះ មានគោលបំណងដើម្បីលើកកម្ពស់គុណភាពការងារអប់រំ ផ្សព្វផ្សាយអំពីបញ្ហាគ្រឿងញៀន ឱ្យកាន់តែមានប្រសិទ្ធភាពខ្ពស់ និងទូលំទូលាយដល់យោធិនគ្រប់កងឯកភាព នៅទូទាំងកងយោធពលខេមរភូមិន្ទ ឈានទៅលុបបំបាត់ទាំងស្រុងពីបញ្ហាគ្រឿងញៀនក្នុងកងទ័ព ស្របតាមគោលការណ៍របស់រាជរដ្ឋាភិបាល និងក្រសួងការពារជាតិ។ វគ្គនេះត្រូវបានរៀបចំឡើងដោយគណៈកម្មាធិការប្រយុទ្ធប្រឆាំងគ្រឿងញៀន ក្រសួងការពារជាតិ រួមសហការជាមួយនឹងអគ្គលេខាធិការដ្ឋានអាជ្ញាធរជាតិ ប្រយុទ្ធប្រឆាំងគ្រឿងញៀន រយៈពេល៣ថ្ងៃ ពីថ្ងៃទី០៤ ដល់ថ្ងៃទី០៦ ខែកញ្ញា ឆ្នាំ២០២៤ ដោយនាយទាហាន និងនាយទាហានរង មានចំនួន៤៤៧នាក់ មកពីបណ្តាកងឯកភាពស្ថាប័នចំណុះក្រសួងការពារជាតិ និងអគ្គបញ្ជាការដ្ឋាន។ ហើយបានផ្ដោតលើខ្លឹមសារសំខាន់ៗ ចំនួន៥គឺ៖ ការយល់ដឹងទូទៅអំពីអត្តសញ្ញាណនៃគ្រឿងញៀន, ការងារប្រយុទ្ធប្រឆាំងគ្រឿងញៀនរបស់អាជ្ញាធរជាតិប្រយុទ្ធប្រឆាំងគ្រឿងញៀន, ការយល់ដឹងអំពីរបៀប នៃការធ្វើតេស្តរហ័សរកសារធាតុញៀនតាមទឹកម៉ូត, ចំណេះដឹងទូទៅស្ដីពីការគ្រប់គ្រង និងការត្រួតពិនិត្យសារធាតុគីមីផ្សំ និងច្បាប់ស្ដីពីការត្រួតពិនិត្យគ្រឿងញៀន។
ក្នុងនាមនាយឧត្តមសេនីយ៍ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងនាយឧត្តមសេនីយ៍ រដ្ឋលេខាធិការប្រចាំការ និងជាប្រធានគណៈកម្មាធិការប្រយុទ្ធប្រឆាំងគ្រឿងញៀន ក្រសួងការពារជាតិ នាយឧត្តមសេនីយ៍ ឥត សារ៉ាត់ បានថ្លែងថា៖ បញ្ហាគ្រឿងញៀនជាបញ្ហាសកល ដែលធ្វើឲ្យប៉ះពាល់សន្តិសុខសង្គម និងបំផ្លាញសុខភាពសុខុមាលភាពរបស់មនុស្ស និងសង្គមជាតិទាំងមូល ហើយការរីករាលដាល និងការប្រើប្រាស់គ្រឿងញៀន និងការធ្វើចរាចរគ្រឿងញៀន បានធ្វើដំណើរនៅទូទាំងពិភពលោក ក្នុងតំបន់ និងព្រមទាំងប្រទេសកម្ពុជាផងដែរ។ ស្ថិតក្នុងសភាពការណ៍នេះ រាជរដ្ឋាភិបាលនីតិកាលទី៧ នៃរដ្ឋសភា ដែលដឹកនាំដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់ចេញយុទ្ធសាស្ត្រទប់ស្កាត់ និងលុបបំបាត់គ្រឿងញៀនជាអាទិភាព ក្នុងការអនុវត្តយុទ្ធសាស្ត្របញ្ចកោណដំណាក់កាលទី១។ ដើម្បីសម្រេចបានជោគជ័យ ក្នុងការប្រយុទ្ធប្រឆាំងគ្រឿងញៀន តាមយុទ្ធសាស្ត្ររបស់រាជរដ្ឋាភិបាលតម្រូវឲ្យ ប្រជាពលរដ្ឋទាំងអស់ ជាពិសេសកងយោធពលខេមរភូមិន្ទ ត្រូវចូលរួមអនុវត្តយុទ្ធសាស្ត្រប្រយុទ្ធប្រឆាំងគ្រឿងញៀននេះ ឲ្យបានសកម្មបំផុត ទើបសង្គមជាតិរបស់យើងបានរួចចាកផុតពីគ្រោះថ្នាក់ដោយសារគ្រឿងញៀន។
នាយឧត្តមសេនីយ៍ ឥត សារ៉ាត់ បានបញ្ជាក់បន្ថែមថា៖ ជាការពិតការចូលរួមទប់ស្កាត់ និងលុបបំបាត់គ្រឿងញៀនតាមយុទ្ធសាស្ត្ររបស់រាជរដ្ឋាភិបាល គ្រប់កងឯកភាព នៃកងយោធពលខេមរភូមិន្ទ ត្រូវអនុវត្តកិច្ចការមួយចំនួន៖ ទី១-ត្រូវធ្វើការអប់រំយោធិន និងគ្រួសារយោធិននីមួយៗ ឲ្យបានយល់ដឹងអំពីច្បាប់នានា ក្នុងការប្រយុទ្ធប្រឆាំងគ្រឿងញៀន និងការគ្រោះថ្នាក់ពីការប្រើប្រាស់គ្រឿងញៀនដល់សុខភាព ភាពសុខដុមនៃគ្រួសារ និងសង្គមជាតិទាំងមូល។ ទី២-ត្រូវសហការទប់ស្កាត់ និងបង្ក្រាបរាល់បទល្មើសគ្រឿងញៀនខុសច្បាប់ ទោះបីរូបភាពណាក៏ដោយ។ ទី៣-មិនត្រូវជួញដូរគ្រឿងញៀន ឬពាក់ព័ន្ធដល់សកម្មភាពតិចឬច្រើន ផ្ទាល់ឬប្រយោលក៏ដោយ ក្នុងការជួញដូរចែកចាយប្រើប្រាស់ និងការផលិតគ្រឿងញៀន។ និងទី៤-ចូលរួមជាមួយសមត្ថកិច្ចគ្រប់ជាន់ថ្នាក់ ក្នុងការផ្តល់ព័ត៌មានអំពីបទល្មើសគ្រឿងញៀន និងអង្គភាពនីមួយៗ ត្រូវទប់ស្កាត់ឲ្យបាន មិនឱ្យយោធិនណាម្នាក់ប្រើប្រាស់ ឬពាក់ព័ន្ធបទល្មើសគ្រឿងញៀននេះឡើយ ៕
