នៅថ្ងៃទី០៣ ខែកញ្ញា ឆ្នាំ២០២៤ លោកជំទាវ នាយឧត្ដមសេនីយ៍ ដាំ ដារីនី រដ្ឋលេខាធិការក្រសួងការពារជាតិ និងជាប្រធានក្រុមការងារសម្ព័ន្ធមេត្រីភាព បានអញ្ជើញជាអធិបតីដ៏ខ្ពង់ខ្ពស់ នៅក្នុងពិធីចុះពិនិត្យវឌ្ឍនភាពការងារសម្ព័ន្ធមេត្រីភាព រវាងអង្គភាពនៃកងយោធពលខេមរភូមិន្ទ ជាមួយស្ថាប័នអង្គភាពស៊ីវិល នៅទីបញ្ជាការដ្ឋានរថក្រោះ រថពាសដែក កងទ័ពជើងគោក។
នៅក្នុងឱកាសនោះ លោកជំទាវ នាយឧត្តមសេនីយ៍ ដាំ ដារីនី បានមានប្រសាសន៍លើកឡើងថា៖ ការងារសម្ព័ន្ធមេត្រីភាព រវាងអង្គភាពនៃកងយោធពលខេមរភូមិន្ទ ជាមួយនឹងស្ថាប័នអង្គភាពស៊ីវិល គឺជាគំនិតផ្ដួចផ្ដើមរបស់ សម្ដេចតេជោ អតីតនាយករដ្ឋមន្ត្រី ហើយយន្តការនេះត្រូវបានយកចិត្តទុកដាក់អនុវត្តបន្ត ដោយរាជរដ្ឋាភិបាលនីតិកាលទី៧ នៃរដ្ឋសភា ដឹកនាំដោយ សម្ដេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី ក្នុងគោលដៅរួមចំណែក ក្នុងការកសាង និងពង្រឹងខឿនការពារជាតិ។ លោកជំទាវបានមានប្រសាសន៍បន្តទៀតថា៖ កិច្ចការសម្ព័ន្ធមេត្រីភាព រវាងអង្គភាពបញ្ជាការដ្ឋានរថកោះកងទ័ពជើងគោក នៃកងយោធពលខេមរភូមិន្ទ ជាមួយស្ថាប័នអង្គភាពស៊ីវិល ក្រោមប្រធានបទ “រួមគ្នាពង្រឹងខឿនការពារជាតិ” មានគោលបំណងដើម្បីបន្តការលើកទឹកចិត្តដល់ដៃគូសម្ព័ន្ធមេត្រីភាព បន្តជំរុញប្រពៃណីសិល្បៈនៃការចែករំលែក ជួយគ្នាទៅវិញទៅមក ការងារសម្ព័ន្ធមេត្រីភាពនេះ បានវិវត្តរីកចម្រើនជាលំដាប់ ហើយមកដល់ពេលនេះយើងមានស្ថាប័នអង្គភាពរដ្ឋ សហគ្រាសក្រុមហ៊ុនឯកជន ហើយនៅតែបន្ត ព្រោះវាមានសារៈសំខាន់ ឆ្លើយតបទៅនឹងវិធានការយុទ្ធសាស្ត្រនានា របស់រាជរដ្ឋាភិបាលនីតិកាលទី៧ នៃរដ្ឋសភា ដែលបានដាក់ចេញក្នុងស្ថានភាពនៃតម្រូវការជាក់ស្ដែងរបស់ប្រទេសជាតិ ដោយឈរលើស្មារតីទទួលខុសត្រូវចំពោះឧត្តមប្រយោជន៍ និងសាមគ្គីជាតិខ្ពស់ ហើយមួយផ្នែកនៃជំនួយសម្ព័ន្ធមេត្រីភាព បម្រើទស្សនវិស័យយូរអង្វែង ដូចជាការស្ថាបនាសំណង់អគារ និងហេដ្ឋារចនាសម្ព័ន្ធនានា រួមគ្នាជាមួយដៃគូសម្ព័ន្ធមេត្រីភាពដែលមានស្រាប់ សហការផ្ដួចផ្ដើមគម្រោង និងហេដ្ឋារចនាសម្ព័ន្ធនានា រួមគ្នាជាមួយនឹងដៃគូសម្ព័ន្ធមេត្រីភាព ដោយសារការផ្ដួចផ្ដើមគម្រោងអភិវឌ្ឍន៍បណ្ដុះបណ្ដាលជំនាញវិជ្ជាជីវៈ និងជំនាញបច្ចេកទេស ដើម្បីទ្រទ្រង់ដល់ជីវភាព និងសុខុមាលភាពយោធិន គ្រួសារយោធិន និងយោធិនត្រៀមចូលនិវត្តន៍។
ឆ្លៀតនៅក្នុងឱកាសនោះ លោកជំទាវ នាយឧត្តមសេនីយ៍ ដាំ ដារីនី ក៏បានផ្ដាំផ្ញើដល់កងទ័ព ត្រូវចូលរួមឲ្យបានសកម្ម និងមានប្រសិទ្ធភាពក្នុងការបំពេញតួនាទីភារកិច្ចរបស់កងយោធពលខេមរភូមិន្ទ ដោយត្រូវគោរពបទវិន័យ ច្បាប់ស្តីពីលក្ខន្តិកៈទូទៅចំពោះយោធិន នៃកងយោធពលខេមរភូមិន្ទ។ ត្រូវយកចិត្តទុកដាក់គោរព និងអនុវត្តឲ្យបានម៉ឺងម៉ាត់តាមប្រសាសន៍ដ៏ខ្ពង់ខ្ពស់របស់ សម្តេចតេជោ ប្រធានព្រឹទ្ធសភា ដែលបានថ្លែងសារពិសេសនាថ្ងៃទី១២ ខែសីហា ឆ្នាំ២០២៤ និងអនុសាសន៍ដ៏ខ្ពង់ខ្ពស់របស់ សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដើម្បីលើកកម្ពស់វិស័យការពារជាតិកាន់តែរឹងមាំ ធានាដល់ការការពារសន្តិភាព ឯករាជ្យអធិបតេយ្យភាពជាតិ បូរណភាពទឹកដី ការពារសន្តិសុខសណ្ដាប់ធ្នាប់សាធារណៈ និងសុវត្ថិភាពសង្គម ទោះនៅគ្រប់កាលៈទេសៈ។
តាមរបាយការណ៏របស់ ឧត្តមសេនីយ៏ឯក ពៅ ស៊ីថា មេបញ្ជាការរងកងទ័ពជើងគោក និងជាមេបញ្ជាការរថក្រោះ រថពាសដែក កងទ័ពជើងគោក បានឲ្យដឹងថា៖ ការចងសម្ព័ន្ធមេត្រីភាពជាមួយស្ថាប័នអង្គភាពស៊ីវិល របស់បញ្ជាការដ្ឋានរថក្រោះ រថពាសដែក កងទ័ពជើងគោក គឺអគ្គនាយកដ្ឋានពន្ធដា ក្រៅពីនោះក៏មានជំនួយពីថ្នាក់ដឹកនាំរាជរដ្ឋាភិបាល, ថ្នាក់ដឹកនាំខេត្ត និងសប្បុរសជននានាជាច្រើន ៕
