នៅថ្ងៃទី១៥ ខែកក្កដា ឆ្នាំ២០២៤ នៅអគារសាលប្រជុំរដ្ឋបាលខេត្តសៀមរាប ឯកឧត្តម នាយឧត្តមសេនីយ៍ កិត្តិសង្គហបណ្ឌិត គន់ គីម ទេសរដ្ឋមន្ត្រី ប្រធានអនុគណៈកម្មការសាងសង់ស្តូបឈ្នះឈ្នះអន្លង់វែង បានអញ្ជើញដឹកនាំកិច្ចប្រជុំត្រួតពិនិត្យឆ្លងការងារខ្លឹមសារប្រវត្តិសាស្ត្ររបស់រដ្ឋបាលខេត្តទាំង៤ គឺខេត្តកំពង់ធំ ខេត្តសៀមរាប ឧត្តរមានជ័យ និងព្រះវិហារ សម្រាប់រៀបចំចម្លាក់នៅស្ដូបឈ្នះឈ្នះអន្លង់វែង។
គិតមកដល់ពេលនេះការងារសាងសង់ស្តូបឈ្នះឈ្នះលង្វែក សម្រេចបាន៥២ភាគរយហើយ ក្រុមការងារខ្លឹមសារបានខិតខំស្វែងរកនូវប្រភពឯកសារ តឹកតាងចាស់ៗ សម្រាប់តាក់តែងនូវខ្លឹមសារ ឲ្យឃើញគុណតម្លៃនយោបាយឈ្នះឈ្នះ និងវឌ្ឍនភាពសង្គមកម្ពុជាបច្ចុប្បន្ន ដើម្បីឲ្យប្រជាពលរដ្ឋកាន់តែយល់ច្បាស់ ខិតខំរបស់ស្ថាបនិកនយោបាយឈ្នះឈ្នះ និងជាស្មារតីរួមគ្នាថែរក្សាសន្តិភាព។
ឯកឧត្តម ទេសរដ្ឋមន្ត្រី បានណែនាំឲ្យក្រុមការងារទាំងអស់ ត្រូវបន្តសិក្សាលើព្រឹត្តិការណ៍ការពារបូរណភាពទឹកដី ចន្លោះឆ្នាំ២០០៨ ដល់ឆ្នាំ២០១១ សមិទ្តសមិទ្ធផលរបស់សមាគមអតីតយុទ្ធជនកម្ពុជា គណៈកម្មាធិការជាតិគ្រប់គ្រងគ្រោះហន្តរាយ ប្រវត្តិនៃការបង្កើតខេត្ដ អត្តសញ្ញាណសមិទ្ធផលរបស់ខេត្តទាំង៤ ដើម្បីចម្លាក់តាមជញ្ជាំងស្តូបឈ្នះឈ្នះអន្លង់វែង ដោយសហការជាមួយក្រុមការងារសាងសង់ លើការកំណត់ទំហំខ្នាតចម្លាក់ និងខ្លឹមសារសេចក្ដីពន្យល់។ ឯកឧត្តមប្រធានអនុគណៈកម្មការ បានថ្លែងនៅការកោតសរសើរអនុគណៈកម្មការសាងសង់ស្តូបឈ្នះឈ្នះអន្លង់វែង មេបញ្ជាការកងពល យោធភូមិភាគ តំបន់ប្រតិបត្តិការសឹករង និងរដ្ឋបាលខេត្តទាំង៤ ព្រមទាំងសហការី ដែលបានខិតខំប្រឹងប្រែងរៀបចំស្តូបឈ្នះឈ្នះអន្លង់វែង ដើម្បីធ្វើយ៉ាងណាឲ្យអត្ថន័យ និងគុណតម្លៃនយោបាយឈ្នះឈ្នះ បានជ្រួតជ្រាបសុះសាយទៅដល់គ្រប់ស្រទាប់មហាជន និងមានលក្ខណៈបន្តវេន ក្នុងន័យចូលរួមថែរក្សាអភិរក្ស និងអភិវឌ្ឍនយោបាយឈ្នះឈ្នះទៅជាមេរៀន និងបទពិសោធសម្រាប់សាធារណជនទូទៅ យកទៅអនុវត្តលើគ្រប់វិស័យ ដើម្បីវឌ្ឍនភាពសង្គម ប្រកបដោយចិរភាព សុខដុម និងការអភិវឌ្ឍយូរអង្វែង ៕
